Pemansut 28:1-43
28 “Kangauka menyadi nuan, Aron, enggau anak lelaki iya, iya nya Nadap, Abihu, Eleasar, enggau Itamar. Seraraka sida ari orang Israel ngambika sida ulih gawa ke Aku nyadi imam.
2 Gaga gari ti kudus sereta lawa ke menyadi nuan, Aron, kena ngemuliaka iya.
3 Alai nuan bejaku ngagai sida ke landik sereta ke udah diberi Aku penemu-dalam. Asuh sida ngaga gari ke Aron ngambika iya ulih dikuduska lalu gawa ke Aku nyadi imam.
4 “Asuh sida ngaga penutup dada, epod, baju jubah ke enda belengan, baju jubah ke becorak petak, serban, enggau tali pinggang jubah. Sida patut ngaga gari ti kudus tu ke menyadi nuan, Aron, enggau ke bala anak lelaki iya, ngambika sida ulih gawa ke Aku nyadi imam.
5 Bala pekereja ke landik nya mesti ngena ubung emas, ubung biru, ubung ungu ke digaga ari bulu bedus, ubung mirah, enggau kain linin ke alus.
6 “Sida mesti nyulam epod nya ngena ubung emas, ubung biru, ubung ungu ke digaga ari bulu bedus, ubung mirah, enggau ubung linin ti alus.
7 Begian depan enggau begian belakang epod mesti disambungka ba begian bau.
8 Tali pinggang epod mesti ditenun ngena utai ti sama, iya nya ngena ubung emas, ubung biru, ubung ungu ke digaga ari bulu bedus, ubung mirah, enggau ubung linin ti alus. Tali pinggang nya mesti dijait ba epod, lalu iya ulih ditanchang ngambika epod nya enda bekinsit.
9 “Ambi dua igi batu oniks lalu ukirka nama bala anak lelaki Israel ba batu nya.
10 Ukir enam iti nama ba sigi batu lalu enam iti agi nama ba sigi da agi batu nitihka umur sida.
11 Siku tukang ke ngukir batu mesti ngukir nama bala anak lelaki Israel ba dua igi batu nya, sama baka chara iya ngaga ukir ba tinchin.* Batu nya mesti dipasangka ba bingkai emas.
12 Pasangka dua igi batu nya ba kedua-dua piak begian bau epod, nyadika batu pengingat ke orang Israel. Nyadi, Aron deka mai nama sida ba atas bau iya lebuh iya datai ngagai Aku, Jehovah.
13 Gaga bingkai emas
14 enggau dua iti rantai emas ti tulin ke dibelit baka tali. Sambung rantai emas nya ba bingkai nya.
15 “Asuh siku tukang sulam ngaga penutup dada kena ngakim. Penutup dada nya mesti digaga ngena utai ti sama baka ngaga epod, iya nya ngena ubung emas, ubung biru, ubung ungu ke digaga ari bulu bedus, ubung mirah, enggau ubung linin ti alus.
16 Enti penutup dada nya dilipat dua, bentuk iya mesti segi empat. Pemanjai iya 22.2 sentimeter,* lalu buka iya 22.2 sentimeter.
17 Pasangka empat baris batu ti berega ba penutup dada nya. Ba baris ti keterubah, pasangka batu delima, batu topaz, enggau batu zamrud.
18 Ba baris ti kedua, pasangka batu firus, batu nilam, enggau batu jasper.
19 Ba baris ti ketiga, pasangka batu leshem,* batu aget, enggau batu kechubung.
20 Ba baris ti keempat, pasangka batu krisolit, batu oniks, enggau batu jed. Tiap iti batu nya mesti dipasangka ba bingkai emas.
21 Ukir nama 12 iku anak lelaki Israel ba batu-batu nya, sama baka chara ngaga ukir ba tinchin. Ukir siti nama ba tiap iti batu nya. Semua nama nya ngarika 12 iti raban bansa Israel.
22 “Gaga rantai ke dibelit baka tali. Rantai nya mesti digaga ngena emas ti tulin lalu dipasangka ba penutup dada.
23 Gaga dua iti gelang emas ti mit, lalu pasangka gelang mit nya ba dua iti sukut ba begian atas penutup dada nya.
24 Rasukka rantai emas ke dalam dua iti gelang mit nya ke ba sukut penutup dada nya.
25 Sambungka ujung dua iti rantai emas nya ba bingkai emas ke ba begian bau epod, ngambika penutup dada nya ulih diengkahka ba depan epod.
26 Gaga dua iti gelang emas ti mit, lalu pasangka gelang mit nya ba sukut ke ba baruh begian dalam penutup dada, iya nya ba begian ke negu epod.
27 Gaga dua iti da agi gelang emas ti mit ba begian depan epod. Pasangka gelang mit nya ba baruh begian bau, iya nya ba atas tali pinggang epod ke ditenun, semak enggau endur tali pinggang nya enggau epod disambung.
28 Tanchangka tali biru ba gelang mit ke ba penutup dada enggau ba gelang mit ke ba epod, ngambika penutup dada ba epod nya enda bekinsit ba atas tali pinggang ke ditenun.
29 “Lebuh Aron tama ngagai Langkau Sembiang, iya mesti ngena penutup dada kena ngakim ke bisi nama bala anak lelaki Israel, ngambika sida seruran dikingatka Aku, Jehovah.
30 Engkahka Urim enggau Tumim* ba dalam penutup dada kena ngakim. Lebuh Aron datai ngagai Aku, Jehovah, iya mesti ngena penutup dada nya. Aron mesti seruran mai Urim enggau Tumim ke dikena ngakim orang Israel lebuh iya datai ngagai Aku, Jehovah.
31 “Gaga baju jubah ke enda belengan ngena ubung biru. Baju jubah nya deka dikena ba dalam epod.
32 Ba tengah begian atas baju nya, gaga siti lubang alai ngerasukka pala. Ngelingi lubang nya, gaga bingkai ke ditenun siku tukang tenun. Gaga lubang nya sama baka lubang ba baju perang, ngambika iya enda senang charik.
33 Kena ngias ujung baju jubah nya, gaga buah delima ngena ubung biru, ubung ungu ke digaga ari bulu bedus, enggau ubung mirah. Tusun buah delima nya ngelingi ujung baju jubah nya, lalu engkahka gerunung emas ba entara buah delima nya.
34 Tusun buah delima nya beselang-seli enggau gerunung emas ngelingi ujung baju jubah ke enda belengan nya.
35 Aron mesti ngena baju jubah nya lebuh iya bejalaika pengawa, lebuh iya datai ngagai Aku, Jehovah, ba Langkau Sembiang, sereta lebuh iya pansut ari nya. Bunyi gerunung nya mesti ulih didinga ngambika iya enda mati.
36 “Gaga siti keping emas ti tulin sereta bekilat, lalu ukirka jaku tu ba atas keping emas nya: ‘Jehovah nya kudus.’ Chara iya sama baka ngaga ukir ba tinchin.
37 Tanchangka keping emas nya ba depan serban ngena tali biru.
38 Aron mesti ngena keping emas nya ba kening iya. Aron empu deka betanggungjawapka penyalah ti nyadi lebuh orang Israel nyerahka korban ngagai Aku. Semua korban nya pemeri ti kudus ke mesti diserahka sida ngagai Aku. Keping emas nya mesti seruran dikena Aron ba kening iya ngambika sida ulih diterima Aku, Jehovah.
39 “Gaga siti serban ngena kain linin ti alus. Udah nya, tenun tali pinggang jubah enggau baju jubah ke becorak petak ngena kain linin ti alus.
40 “Gaga mega baju jubah, tali pinggang jubah, enggau penutup pala ti lawa sereta bemulia ke bala anak lelaki Aron.
41 Pasukka gari nya ba menyadi nuan, Aron, enggau bala anak lelaki iya. Nuan mesti nata sida, ngelantik sida, lalu nguduska sida ngambika sida ulih gawa nyadi imam ke Aku.
42 Gaga seluar pandak* ngena kain linin kena nutup tubuh sida. Pemanjai seluar nya mesti ari punggung sampai pah sida.
43 Lebuh Aron enggau bala anak lelaki iya tama ngagai langkau gempuru tauka datai ngagai alta deka bejalaika pengawa ba Langkau Sembiang, sida mesti ngena semua gari nya ngambika sida enda bedosa lalu mati. Nya deka nyadi adat ti tetap ke mesti dititihka Aron enggau bala peturun iya.
Nota Kaki
^ Jaku Asal, “chop.”
^ Jaku Asal, “1 jengkal.” Peda Rujukan B14.
^ Sebengkah batu ti berega ke enda ditemu ni bagi. Engka merujuk ngagai batu hiasint, batu ambar, batu baiduri, tauka batu turmalin.
^ Peda Penerang Leka Jaku.
^ Tauka “tanchut dalam.”
