Pemansut 29:1-46
29 “Tu meh utai ke patut digaga nuan kena nguduska sida ngambika sida ulih gawa ke Aku nyadi imam: Ambi siku anak sapi ke lelaki enggau dua iku bedus ke lelaki ke nadai penimpang.
2 Gaga roti ti enda beragi ke bentuk bulat, roti ti enda beragi ke segala baka gelang ke dichampurka enggau minyak, enggau roti nipis ti enda beragi ke dipalit ngena minyak. Gaga semua roti nya ngena tepung gandum ti alus.
3 Engkahka semua roti nya ke dalam bakul. Udah nya, serahka roti nya, sapi ke lelaki nya, enggau dua iku bedus ke lelaki nya ngagai Aku.
4 “Bai Aron enggau bala anak lelaki iya ngagai pintu penama langkau gempuru lalu asuh sida masu diri ngena ai.
5 Udah nya, pasukka baju jubah, baju jubah ke enda belengan, epod, enggau penutup dada ba Aron. Pia mega, tanchangka enggau rat tali pinggang epod ke ditenun ba punggung iya.
6 Engkahka serban ba atas pala iya, lalu tanchangka tanda kudus ti nunjukka diri diserahka ngagai Petara ba serban nya.
7 Ambi minyak ti kudus lalu tuangka minyak nya ba atas pala Aron kena nata iya.
8 “Udah nya, bai bala anak lelaki Aron ke depan lalu pasukka baju jubah
9 enggau penutup pala ba sida. Tanchangka mega tali pinggang jubah ba Aron enggau bala anak lelaki iya. Sida enggau bala peturun sida deka nyadi imam. Tu meh adat ti tetap. Baka tu meh chara nuan patut milih Aron enggau bala anak lelaki iya nyadi imam.
10 “Bai sapi ke lelaki nya ke depan langkau gempuru. Aron enggau bala anak lelaki iya mesti ngengkahka jari sida ba atas pala sapi nya.
11 Sayat sapi nya ba depan Aku, Jehovah, iya nya ba pintu penama langkau gempuru.
12 Ambi darah sapi nya mimit ngena tunjuk jari nuan lalu unsutka darah nya ba tanduk alta. Udah nya, tuangka teda darah nya ba begian baruh alta.
13 Ambi semua lemak ba gelung perut sapi nya, lemak ba ati iya, sereta kedua-dua buah pinggang iya enggau lemak ba buah pinggang nya. Tunu semua nya ba alta ngambika asap niki ke atas.
14 Tang isi, kulit, enggau tai sapi nya mesti ditunu ba luar kem. Nya meh pemeri kena ngulihka pengampun dosa.
15 “Udah nya, ambi siku bedus ke lelaki, lalu Aron enggau bala anak lelaki iya mesti ngengkahka jari sida ba atas pala bedus nya.
16 Sayat bedus nya lalu pechikka darah iya ba semua tisi alta.
17 Tetak bedus nya, basu gelung perut iya enggau betis iya, lalu tusun semua begian nya begulai enggau pala iya.
18 Seluruh tubuh bedus nya mesti ditunu ngambika asap ari alta nya niki ke atas. Nya meh pemeri tunu ke Aku, Jehovah, lalu bau nya ngelantangka ati Aku. Pemeri nya ditunu ke Aku, Jehovah.
19 “Udah nya, ambi siku da agi bedus ti lelaki. Aron enggau bala anak lelaki iya mesti ngengkahka jari sida ba atas pala bedus nya.
20 Sayat bedus nya. Ambi mimit darah iya lalu unsutka darah nya ba cuping pending kanan Aron enggau cuping pending kanan bala anak lelaki iya. Unsutka mega ba tunjuk indu jari kanan sida enggau ba tunjuk indu kaki kanan sida. Pechikka darah nya ba semua tisi alta.
21 Udah nya, ambi mimit darah ari alta sereta ambi mimit minyak ti kudus, lalu pechikka semua nya ba Aron enggau bala anak iya, sereta ba gari sida ngambika iya, bala anak iya, enggau gari sida nyadi kudus.
22 “Ambi lemak bedus ke lelaki nya, iku iya ti belemak, lemak ke ba gelung perut iya, enggau lemak ba ati iya. Ambi mega kaki kanan iya enggau kedua-dua buah pinggang iya sereta lemak ke ba buah pinggang nya. Bedus tu meh ke diserahka nyadi pemeri kena ngelantik imam.
23 Ari bakul roti ti enda beragi ke diengkahka ba depan Jehovah, ambi siti tuku roti ke bentuk bulat, siti tuku roti ti segala baka gelang ke dichampurka enggau minyak, enggau siti roti ti nipis.
24 Engkahka semua nya ba jari Aron enggau ba jari bala anak lelaki iya, lalu nuan mesti ngayunka nya ke depan enggau ke belakang nyadika pemeri ke Aku, Jehovah.
25 Udah nya, ambi pemeri nya ari sida lalu tunu pemeri nya ba alta, iya nya ba atas pemeri tunu. Pemeri nya ditunu ke Aku, Jehovah, lalu bau pemeri nya ngelantangka ati Aku, Jehovah.
26 “Ambi dada bedus ke lelaki ke diserahka nyadi pemeri kena ngelantik Aron nyadi imam, lalu ayunka pemeri nya ke depan enggau ke belakang nyadika pemeri ke Aku, Jehovah. Begian tu deka diempu nuan.
27 Ari bedus ke diserah nyadika pemeri kena ngelantik Aron enggau bala anak lelaki iya, kuduska dada ari pemeri ke diayunka nya enggau kuduska kaki ari begian ti kudus ke udah diayunka.
28 Semua nya begian ti kudus ke deka diempu Aron enggau bala peturun iya. Nya adat ti tetap ke mesti dititihka orang Israel. Lebuh orang Israel nyerahka pemeri bebaik, nya meh begian ti kudus ke patut diberi sida ngagai Aku, Jehovah.
29 “Gari ti kudus ke diempu Aron deka dikena bala peturun iya lebuh sida ditata lalu dilantik nyadi imam.
30 Bala peturun Aron ke deka nganti Aron nyadi imam, enggau ke tama ngagai langkau gempuru lalu bejalaika pengawa sida ba endur ti kudus, mesti ngena gari nya pengelama tujuh hari.
31 “Ambi isi bedus ke udah diserahka nyadi pemeri kena ngelantik imam lalu rebus isi nya ba endur ti kudus.
32 Aron enggau bala anak lelaki iya deka makai isi bedus nya enggau roti ke ba dalam bakul ba pintu penama langkau gempuru.
33 Sida mesti makai semua utai ke udah diserahka kena ngampun dosa lebuh sida dilantik nyadi imam lalu dikuduska. Tang, orang bukai* enda dikemendarka makai nya laban nya utai ti kudus.
34 Enti roti tauka isi bedus ke udah diserahka nyadi pemeri nya enda abis diempa sampai pagi hari siti, roti tauka isi nya mesti ditunu. Anang makai nya laban nya utai ti kudus.
35 “Nuan mesti ngereja semua utai tu ngagai Aron enggau bala anak lelaki iya, nitihka utai ke udah dipadahka Aku ngagai nuan. Pengelama tujuh hari, nuan mesti bejalaika pengawa nuan kena ngelantik sida nyadi imam.
36 Ninting hari, nuan mesti nyerahka sapi ke lelaki nyadika pemeri kena ngulihka pengampun dosa sereta kena nguduska alta. Pechikka minyak ba alta nya ngambika alta nya nyadi kudus.
37 Serahka pemeri kena ngulihka pengampun dosa pengelama tujuh hari kena nguduska alta nya. Nya deka ngasuh alta nya nyadi amat-amat kudus. Orang ke gawa ba alta nya mesti kudus.
38 “Ninting hari, serahka dua iku bedus ke lelaki ke beumur setaun nyadika pemeri ba atas alta nya.
39 Serahka siku bedus maya pagi hari, lalu serahka siku da agi maya lemai hari.*
40 Lebuh nyerahka bedus ti keterubah, serahka satu kilogram* tepung ke alus ke udah dichampurka enggau satu liter* minyak kana ti tulin. Serahka mega satu liter wain nyadika pemeri wain.
41 Lebuh nyerahka bedus ti kedua maya lemai hari,* serahka mega tepung ti alus enggau pemeri wain, sama baka utai ke diserahka nuan maya pagi hari. Pemeri nya ditunu ke Aku, Jehovah, lalu bau pemeri nya ngelantangka ati Aku.
42 Nya meh pemeri tunu ke patut seruran diserahka bala peturun kita ba depan Aku, Jehovah, ba pintu penama langkau gempuru. Ba dia meh Aku deka ngayanka Diri lalu bejaku enggau nuan.
43 “Aku deka ngayanka Diri ba dia ngagai orang Israel, lalu mulia Aku deka nguduska endur nya.
44 Aku deka nguduska langkau gempuru enggau alta. Aku mega deka nguduska Aron enggau bala anak lelaki iya ngambika sida ulih gawa nyadi imam ke Aku.
45 Aku deka diau enggau orang Israel lalu Aku deka nyadi Petara sida.
46 Sida tentu deka nemu Aku tu meh Jehovah, Petara sida. Aku udah mai sida pansut ari Ejip ngambika Aku ulih diau enggau sida. Aku tu meh Jehovah, Petara sida.
Nota Kaki
^ Iya nya, orang ke ukai ari peturun Aron.
^ Engka merujuk ngagai timpuh pengudah mata panas padam, tang sebedau hari petang.
^ Jaku Asal, “satu persepuluh efah.” Peda Rujukan B14.
^ Jaku Asal, “satu perempat hin.”
^ Engka merujuk ngagai timpuh pengudah mata panas padam, tang sebedau hari petang.
