Pemansut 30:1-38
30 “Gaga siti alta ngena kayu akasia nyadi endur alai nunu menyan.
2 Bentuk alta nya mesti segi empat. Pemanjai iya 44.5 sentimeter, buka iya 44.5 sentimeter, lalu peninggi iya 89 sentimeter.* Tanduk alta nya mesti digaga ari kayu ke dikena ngaga alta nya empu.
3 Lapis begian atas alta nya, semua tisi iya, enggau tanduk iya ngena emas ti tulin. Gaga bingkai emas ngelingi alta nya.
4 Ba baruh bingkai alta nya, pasangka dua iti gelang emas, lalu pasangka mega dua iti gelang emas ba sepiak da agi. Kayu ke dikena ngesan alta nya ulih dirasukka ke dalam gelang nya.
5 Gaga kayu nya ngena kayu akasia, lalu lapis kayu nya ngena emas.
6 Engkahka alta nya ba luar tirai, ke semak enggau peti lampang batu Adat sereta semak enggau penutup peti nya. Aku deka ngayanka Diri ngagai nuan ba dia.
7 “Tiap pagi lebuh Aron nyediaka lampu kelita, iya mesti nunu menyan ke bebau rengut ba atas alta nya, ngambika asap ari alta nya niki ke atas.
8 Maya lemai hari,* lebuh Aron nungkun lampu kelita, iya mega mesti nunu menyan. Aron enggau bala peturun iya mesti seruran nunu menyan ke Aku, Jehovah.
9 Anang meri menyan ke enda sah ba atas alta nya. Pia mega, anang nyerahka pemeri tunu, pemeri bijirin, tauka nuangka pemeri wain ba atas alta nya.
10 Aron mesti ngambi mimit darah ari jelu ke diserahka kena ngulihka pengampun dosa, lalu ngunsutka darah nya ba tanduk alta kena nguduska alta nya. Pengawa tu mesti dikereja sekali setaun ari generasi ke generasi.* Ba Aku, Jehovah, alta nya amat kudus.”
11 Udah nya, Jehovah madah ngagai Moses:
12 “Lebuh nuan ngaga banci kena ngitung orang Israel ke lelaki, tiap iku sida mesti meri tebus ke nyawa diri ngagai Aku, Jehovah. Enti enda, sida deka ditinggang penulah lebuh sida direjista.
13 Sida ke udah direjista mesti meri setengah shekel* pirak, nitihka timbang berat ke biasa dikena ba endur ti kudus. Satu shekel sama enggau 20 gera.* Setengah shekel pirak nya pemeri ngagai Aku, Jehovah.
14 Tiap iku orang ke udah direjista, ke beumur 20 taun ke atas, mesti meri pemeri ngagai Aku, Jehovah.
15 Tiap iku orang mesti meri setengah shekel pirak ngagai Aku, Jehovah, kena nebus nyawa diri. Sida ke kaya enda tau meri lebih ari nya, lalu sida ke miskin enda tau meri kurang ari nya.
16 Ambi duit pirak ke diberi orang Israel nya, lalu kena duit nya mayar semua ungkus pengawa ke dipejalaika ba langkau gempuru. Nya duit tebus ke nyawa kita, ngambika Aku, Jehovah, ingatka orang Israel.”
17 Ku Jehovah nampung baru jaku Iya ngagai Moses:
18 “Gaga siti bisin enggau kaki iya ari temaga. Engkahka bisin nya ba entara langkau gempuru enggau alta. Isi ai ke dalam bisin nya kena bebasu.
19 Aron enggau bala anak lelaki iya deka masu kaki enggau jari sida ba dia.
20 Sida mesti masu diri ngena ai nya sebedau sida tama ngagai langkau gempuru, tauka sebedau sida nyemakka diri ngagai alta deka bejalaika pengawa, sereta meri pemeri ke ditunu ngagai Aku, Jehovah. Enti sida enda ngereja nya, sida deka mati.
21 Sida mesti masu kaki enggau jari sida ngambika sida enda mati. Tu deka nyadi adat ti tetap ke Aron enggau bala peturun iya.”
22 Ku Jehovah bejaku baru ngagai Moses:
23 “Gumpul utai ke pemadu manah ke bebau rengut: Enam kilogram getah mur, tiga kilogram kayu manis, tiga kilogram rumput ti bebau rengut,*
24 enggau enam kilogram* kulit kayu kasia, nitihka timbang berat ke biasa dikena ba endur ti kudus. Ambi mega empat liter* minyak kana.
25 Gaga minyak ti kudus ngena semua utai nya. Champurka semua utai nya, sama baka chara siku tukang ti landik nyampurka utai nya. Nya deka nyadi minyak ti kudus.
26 “Tuangka minyak ti kudus nya kena nata langkau gempuru enggau peti lampang batu Adat.
27 Tuangka mega minyak nya ba mija enggau pekekas iya, ba penuduk lampu enggau pekekas iya, ba alta endur alai nunu menyan,
28 ba alta pemeri tunu enggau pekekas iya, sereta ba bisin enggau kaki iya.
29 Nuan mesti nguduska semua utai nya, ngambika semua utai nya nyadi amat kudus. Orang ke negu semua utai nya mesti kudus.
30 Tata Aron enggau bala anak lelaki iya ngena minyak nya. Kuduska sida ngambika sida ulih gawa nyadi imam ke Aku.
31 “Padahka tu ngagai orang Israel: ‘Ba semua generasi kita, minyak tu deka seruran nyadi minyak ti kudus ke Aku.
32 Minyak tu enda tau dikena orang bukai.* Anang ngaga nama-nama utai ti sebaka enggau minyak tu. Minyak tu utai ti kudus. Ba kita, minyak tu mesti seruran kudus.
33 Enti bisi orang ke ngaga minyak ti sebaka enggau tu, lalu orang nya ngena minyak tu ba orang bukai, orang nya mesti diukum bunuh.’”
34 Udah nya, Jehovah bejaku ngagai Moses: “Gumpul utai ke bebau rengut tu: Minyak damar, kulit lukan, getah rasamala, enggau menyan putih ti tulin. Penyampau semua utai nya mesti sama.
35 Champurka semua utai nya kena ngaga menyan, sama baka chara siku tukang ti landik nyampurka utai nya. Tambahka garam, lalu anang nyampurka utai bukai agi ke dalam campuran nya. Tentuka campuran nya kudus.
36 Tutuk campuran nya sampai nyadi serbuk ti alus. Engkahka sekeda ari serbuk nya ba depan peti lampang batu Adat, ke ba dalam langkau gempuru. Ba dia meh Aku deka ngayanka Diri ngagai nuan. Menyan nya mesti nyadi utai ti amat kudus ke kita.
37 Anang ngaga menyan ngena campuran ti sama ke guna diri empu. Ba Aku, Jehovah, menyan tu kudus. Kita mega mesti ngembuan runding ti sama.
38 Enti bisi orang ngaga menyan ke sama baka nya laban iya rindu nyium bau nya, iya mesti diukum bunuh.”
Nota Kaki
^ Jaku Asal, “Pemanjai iya 1 kiubit, buka iya 1 kiubit, lalu peninggi iya 2 kiubit.” Peda Rujukan B14.
^ Engka merujuk ngagai timpuh pengudah mata panas padam, tang sebedau hari petang.
^ Tauka “ari rebak ke rebak.”
^ 1 shekel sama enggau 11.4 g.
^ Peda Rujukan B14.
^ Tauka “500 shekel getah mur, 250 shekel kayu manis, 250 shekel rumput ti bebau rengut.” Peda Rujukan B14.
^ Tauka “500 shekel.”
^ Jaku Asal, “1 hin.” Peda Rujukan B14.
^ Iya nya, orang ke ukai ari peturun Aron.
