Pemansut 34:1-35
34 Udah nya, Jehovah madah ngagai Moses: “Gaga dua iti lampang batu baka ke digaga nuan sebedau tu. Ba dua iti lampang batu nya, Aku deka nuliska jaku ke bisi ba dua iti lampang batu ke udah dipechahka nuan.
2 Nuan mesti besedia, laban pagi pagila nuan deka niki Gunung Sinai, lalu datai ngagai Aku ba tuchung gunung nya.
3 Tang nadai siku pan orang ulih niki enggau nuan, lalu nadai siku pan orang tau bisi ba gunung nya. Indah, jelu sapi enggau jelu bedus pan enda tau makai rumput ba kaki gunung nya.”
4 Nyadi Moses pan ngaga dua iti lampang batu, baka ke digaga iya sebedau tu. Iya dani tumu pagi, lalu niki ngagai Gunung Sinai mai dua iti lampang batu nya, baka ke dipadahka Jehovah ngagai iya.
5 Udah nya, Jehovah nurun dalam remang* lalu bediri semak Moses ba atas gunung nya. Iya madahka nama Diri, Jehovah, ngagai Moses.
6 Jehovah lalu mansa ba depan Moses lalu madahka: “Aku tu meh Jehovah, Petara ti pengasih sereta siru. Aku tu meh Jehovah, Petara ke lubah ringat. Aku ngayanka pengerindu ti setia enggau belimpah, lalu semua utai ke dipadahka Aku amat magang.*
7 Aku setia ngayanka pengerindu ngagai beribu-ribu generasi.* Aku ngampunka penyalah sereta dosa. Tang, Aku enda nejuka orang ke ngereja penyalah lepas ari kena ukum. Aku deka ngukum apai ketegal dosa sida, lalu ukum nya mega deka ninggang bala anak enggau uchu sida, nyentuk ngagai generasi ketiga enggau generasi keempat.”
8 Moses pan terus nyungkurka diri ba tanah lalu besugang.
9 Udah nya, iya madah: “O Jehovah, enti aku udah ngelantangka ati Nuan, mupuk meh enggau kami taja pan kami orang ti degil. O Jehovah, ampunka meh penyalah enggau dosa kami. Terima meh kami nyadi nembiak Nuan.”
10 Ku Petara nyaut: “Aku deka ngaga siti sempekat enggau kita. Ba depan semua kita, Aku deka ngereja utai ti luar biasa ke enda kala digaga Aku ba dunya sereta ba semua bansa. Semua orang ke diau enggau kita deka meda pengawa Aku ti ngalitka ati, ke deka digaga Aku, Jehovah, ke kita.
11 “Pendingka enggau manah utai ke deka dipadahka Aku ngagai kita seharitu. Aku deka muru orang Amor, orang Kanaan, orang Het, orang Peris, orang Ibi, enggau orang Jebus ari menua sida.
12 Bejimat lebuh kita mansang ngagai menua nya. Anang ngaga sempekat enggau orang ke diau ba dia, laban nya deka nyadi panjuk ke kita.
13 Tang kita mesti ngeruntuhka alta sida, mechahka tiang batu keramat sida, sereta nebang tiang kayu keramat sida.
14 Anang besugang ngagai petara bukai. Sembah meh Aku, Jehovah, siku aja. Kita semina tau nyembah Aku aja.
15 Bejimat meh lalu anang ngaga sempekat enggau orang ke diau ba menua nya. Lebuh sida nyembah petara-petara sida* lalu nyerahka pemeri ngagai petara-petara sida, sida deka mai kita lalu kita deka makai pemeri ke diserahka nya.
16 Udah nya, kita tentu deka ngambi anak indu sida nyadika bini anak lelaki kita. Lebuh anak indu sida nyembah petara-petara bukai,* anak lelaki kita mega deka ngereja utai ti sama.
17 “Anang ngaga petara-petara ari besi.
18 “Ba bulan Abib,* kita mesti ngintu Pengerami Roti ti Enda Beragi ba maya ke udah ditetapka, laban ba bulan Abib meh kita pansut ari Ejip. Pengelama tujuh hari, kita patut makai roti ti enda beragi baka ke udah dipadahka Aku ngagai kita.
19 “Tiap iku anak tuai kita ti lelaki enggau anak tuai ti lelaki ari semua jelu tupi kita, enda ngira sapi tauka bedus, diempu Aku magang.
20 Tiap iku anak tuai keledai mesti ditebus ngena siku jelu bedus. Enti keledai nya enda ditebus, kita mesti matahka rekung iya. Tiap iku anak tuai kita ke lelaki mega mesti ditebus. Nadai siku pan kita tau mansang ngagai Aku enti kita nadai mai utai.
21 “Kita ulih kereja pengelama enam hari. Tang ba hari ti ketujuh kita mesti rehat,* taja pan maya nya musin orang ngeradu tanah sereta musin orang ngetau.
22 “Kita mesti ngintu Pengerami Ngetau lebuh kita ngetau asil gandum ti keterubah. Ba ujung taun, kita mesti ngintu Pengerami Belangkau.
23 “Tiga kali setaun, semua bala kita ke lelaki mesti datai ngagai Aku, Jehovah, Tuan ti bendar, Petara orang Israel.
24 Lebuh kita datai ngagai Aku, Jehovah, tiga kali setaun, nadai siku pan orang deka nguji ngerampas menua kita. Aku, Petara kita, deka muru bansa bukai ari kita lalu Aku deka ngasuh menua kita nyadi besai agi.
25 “Anang nyerahka darah korban jelu ngagai Aku begulai enggau nama-nama utai ke beragi. Korban ke diserahka maya Pengerami Paska enda tau ditejuka sampai pagi hari siti.
26 “Kita patut mai asil kita ti keterubah sereta ke pemadu manah ari ladang kita ngagai rumah Aku, Jehovah, Petara kita.
“Anang ngerebus dagin anak kambin dalam ai tusu indai iya.”
27 Ku Jehovah bejaku baru ngagai Moses: “Tuliska jaku tu, laban sejalai enggau jaku tu, Aku ngaga sempekat enggau nuan sereta enggau orang Israel.”
28 Moses ba dia enggau Jehovah pengelama 40 hari enggau 40 malam. Iya nadai makai roti tauka ngirup ai. Iya* nuliska jaku sempekat nya, iya nya Sepuluh Pesan, ba lampang batu.
29 Udah nya, Moses nurun ari Gunung Sinai mai dua iti lampang batu nya. Mua Moses beperenching laban iya udah bejaku enggau Petara. Tang, iya enda nemu pasal nya.
30 Lebuh Aron enggau semua orang Israel meda mua Moses beperenching, sida takut deka datai semak ngagai iya.
31 Tang, Moses ngangauka Aron enggau semua bala tuai orang Israel. Sida pan datai lalu Moses bejaku enggau sida.
32 Udah nya, semua orang Israel datai semak ngagai iya, lalu iya madahka ngagai sida semua pesan ke dipadahka Jehovah ngagai iya ba Gunung Sinai.
33 Tiap kali pengudah Moses bejaku enggau orang Israel, iya deka nutup mua iya ngena kain.
34 Tiap kali Moses tama ngagai langkau, laban deka bejaku enggau Jehovah, iya deka muka kain nya. Lebuh iya pansut ari langkau nya, iya deka madahka orang Israel pasal pesan ke udah diterima iya.
35 Orang Israel meda mua Moses beperenching. Nya alai, Moses nutup mua iya ngena kain nyentukka iya tama baru ngagai langkau nya, laban deka bejaku enggau Petara.
Nota Kaki
^ Tauka “awan.”
^ Tauka “lalu Aku seruran tau dikearapka.”
^ Tauka “serak.”
^ Tauka “nyundalka diri enggau petara-petara sida.”
^ Tauka “nyundalka diri enggau petara-petara sida.”
^ Peda Rujukan B15.
^ Tauka “ngintu Hari Sabat.”
^ Tu merujuk ngagai Jehovah. Peda ayat 1.
