Pemansut 39:1-43
39 Sida ngaga gari ke ditenun enggau lawa ke dikena bejalaika pengawa ba endur ti kudus ngena ubung biru, ubung ungu ke digaga ari bulu bedus, enggau ubung mirah. Sida mega ngaga gari ti kudus ke Aron, baka ke udah dipadahka Jehovah ngagai Moses.
2 Sida ngaga epod ngena ubung emas, ubung biru, ubung ungu ke digaga ari bulu bedus, ubung mirah, enggau ubung linin ti alus.
3 Sida nukul keping emas ngambika nyadi nipis, lalu mutung keping emas nya kena ngaga ubung ti alus. Ubung emas nya disulam enggau ubung biru, ubung ungu ke digaga ari bulu bedus, ubung mirah, enggau kain linin ti alus.
4 Begian depan enggau begian belakang epod disambungka sida ba begian bau.
5 Tali pinggang epod ditenun sida ngena utai ti sama, iya nya ngena ubung emas, ubung biru, ubung ungu ke digaga ari bulu bedus, ubung mirah, enggau ubung linin ti alus. Tali pinggang nya dijait ba epod, lalu iya ulih ditanchang ngambika epod nya enda bekinsit. Sida ngereja nya nitihka utai ke udah dipadahka Jehovah ngagai Moses.
6 Udah nya, sida masangka batu oniks ba bingkai emas, lalu sida ngukir nama bala anak Israel ba batu nya, sama baka chara sida ngaga ukir ba tinchin.*
7 Bezalel masang batu nya ba kedua-dua piak begian bau epod, nyadika batu pengingat ke orang Israel, baka ke udah dipadahka Jehovah ngagai Moses.
8 Udah nya, iya nyulam penutup dada ngena utai ti sama baka ngaga epod, iya nya ngena ubung emas, ubung biru, ubung ungu ke digaga ari bulu bedus, ubung mirah, enggau ubung linin ti alus.
9 Bentuk penutup dada nya segi empat lebuh iya dilipat dua. Pemanjai iya 22.2 sentimeter,* lalu buka iya 22.2 sentimeter.
10 Sida masang empat baris batu ti berega ba penutup dada nya. Ba baris ti keterubah, sida masang batu delima, batu topaz, enggau batu zamrud.
11 Ba baris ti kedua, sida masang batu firus, batu nilam, enggau batu jasper.
12 Ba baris ti ketiga, sida masang batu leshem,* batu aget, enggau batu kechubung.
13 Ba baris ti keempat, sida masang batu krisolit, batu oniks, enggau batu jed. Tiap iti batu nya dipasangka ba bingkai emas.
14 Sida ngukir nama 12 iku anak lelaki Israel ba batu-batu nya, sama baka chara ngaga ukir ba tinchin. Siti nama diukir ba tiap iti batu nya. Semua nama nya ngarika 12 iti raban bansa Israel.
15 Udah nya, sida ngaga rantai ke dibelit baka tali. Rantai nya digaga ngena emas ti tulin lalu dipasangka ba penutup dada.
16 Sida mega ngaga dua iti gelang emas ti mit, lalu masangka gelang mit nya ba dua iti sukut ba begian atas penutup dada.
17 Sida ngerasukka rantai emas ke dalam dua iti gelang mit nya ke ba sukut penutup dada.
18 Sida nyambungka ujung dua iti rantai emas nya ba bingkai emas ke ba begian bau epod, ngambika penutup dada nya ulih diengkahka ba depan epod.
19 Udah nya, sida ngaga dua iti gelang emas ti mit, lalu masangka gelang mit nya ba sukut ke ba baruh begian dalam penutup dada, iya nya ba begian ke negu epod.
20 Sida ngaga dua iti da agi gelang emas ti mit ba begian depan epod. Sida masangka gelang mit nya ba baruh begian bau, iya nya ba atas tali pinggang epod ke ditenun, semak enggau endur tali pinggang nya enggau epod disambung.
21 Kepenudi sekali, sida nanchangka tali biru ba gelang mit ke ba penutup dada enggau ba gelang mit ke ba epod, ngambika penutup dada ba epod nya enda bekinsit ba atas tali pinggang ke ditenun. Sida ngereja semua nya nitihka utai ke udah dipadahka Jehovah ngagai Moses.
22 Udah nya, Bezalel nenun baju jubah ke enda belengan ngena ubung biru. Baju jubah nya deka dikena ba dalam epod.
23 Ba tengah begian atas baju nya, bisi siti lubang alai ngerasukka pala, lalu bingkai ditenun ngelingi lubang nya. Lubang nya digaga sama baka lubang ba baju perang, ngambika iya enda senang charik.
24 Kena ngias ujung baju jubah nya, sida ngaga buah delima ngena ubung biru, ubung ungu ke digaga ari bulu bedus, enggau ubung mirah. Semua ubung nya dibelit sida kena ngaga buah delima nya.
25 Sida mega ngaga gerunung ngena emas ti tulin, lalu ngengkahka gerunung nya ba entara buah delima ke ngelingi ujung baju jubah nya.
26 Sida nusun buah delima nya beselang-seli enggau gerunung emas ngelingi ujung baju jubah ke enda belengan nya. Baju jubah nya deka dikena lebuh bejalaika pengawa imam. Sida ngereja semua nya nitihka utai ke udah dipadahka Jehovah ngagai Moses.
27 Sida nenun baju jubah ngena kain linin ti alus ke Aron enggau bala anak lelaki iya.
28 Sida ngaga serban enggau penutup pala ti lawa ngena kain linin ti alus, sereta ngaga seluar pandak* ngena ubung linin ti alus.
29 Sida mega nenun tali pinggang jubah ngena ubung linin ti alus, ubung biru, ubung ungu ke digaga ari bulu bedus, enggau ubung mirah. Sida ngereja semua nya nitihka utai ke udah dipadahka Jehovah ngagai Moses.
30 Kepenudi sekali, sida ngaga siti keping emas ti tulin sereta bekilat, ke deka nyadi tanda kudus ti nunjukka diri diserahka ngagai Petara. Ba keping emas nya, sida ngukirka jaku tu: “Jehovah nya kudus.” Chara iya sama baka ngaga ukir ba tinchin.
31 Sida nanchangka keping emas nya ba serban ngena tali biru, baka ke udah dipadahka Jehovah ngagai Moses.
32 Semua pengawa kena ngaga Langkau Sembiang, iya nya langkau gempuru, pan tembu digaga. Orang Israel ngereja semua utai ke dipadahka Jehovah ngagai Moses. Sida ngereja semua utai sama baka ke udah dipadahka ngagai sida.
33 Udah nya, sida mai Langkau Sembiang enggau semua pekekas iya ngagai Moses: Pengait, langkar langkau, palang, tiang, enggau pelasar tiang;
34 tudung langkau ke digaga ari kulit bedus ti lelaki ke udah digaga nyadi warna mirah, tudung langkau ke digaga ari kulit anjing laut, enggau tirai ke digantung ba depan peti lampang batu Adat;
35 peti lampang batu Adat enggau kayu kena ngesan iya, sereta penutup peti nya;
36 mija enggau semua pekekas iya, sereta roti ti diberi ngagai Petara;
37 penuduk lampu ke digaga ari emas ti tulin, lampu kelita ke ditusun sebaris enggau semua pekekas iya, sereta minyak kena ngidupka lampu kelita;
38 alta emas, minyak ti kudus, menyan ti bebau rengut, kain tirai ke pintu penama langkau;
39 alta temaga enggau gelegar* temaga, kayu kena ngesan alta nya, enggau semua pekekas alta nya; bisin enggau kaki iya;
40 kain tirai ke laman Langkau Sembiang, tiang enggau pelasar tiang, kain tirai ke pintu penama laman Langkau Sembiang, paku enggau tali langkau, enggau semua pekekas ke dikena bejalaika pengawa ba Langkau Sembiang, iya nya langkau gempuru;
41 gari ke ditenun enggau lawa ke dikena bejalaika pengawa ba Langkau Sembiang, gari ti kudus ke Imam Aron, sereta gari ke bala anak lelaki iya ke gawa nyadi imam.
42 Orang Israel udah ngereja semua pengawa nya nitihka pesan ke udah dipadahka Jehovah ngagai Moses.
43 Lebuh Moses meresa semua pengawa sida, iya meda semua utai nya udah digaga nitihka pesan Jehovah. Moses pan merekatka sida.
Nota Kaki
^ Jaku Asal, “chop.”
^ Jaku Asal, “1 jengkal.” Peda Rujukan B14.
^ Peda nota kaki ba Pemansut 28:19.
^ Tauka “tanchut dalam.”
^ Jaku Asal, “jaring.”
