Pemansut 40:1-38
40 Udah nya, Jehovah madah ngagai Moses:
2 “Ba hari ti keterubah dalam bulan ti keterubah, nuan mesti nirika Langkau Sembiang, iya nya langkau gempuru.
3 Engkahka peti lampang batu Adat ba dalam langkau nya. Gantungka tirai ba depan peti nya.
4 Bai mija ke dalam langkau nya, lalu tusun semua utai ke patut bisi ba atas mija nya. Bai mega penuduk lampu lalu tungkun lampu kelita nya.
5 Udah nya, engkahka alta emas endur alai nunu menyan ba depan peti lampang batu Adat, lalu gantungka kain tirai ke pintu penama Langkau Sembiang.
6 “Engkahka alta pemeri tunu ba depan pintu penama Langkau Sembiang, iya nya langkau gempuru.
7 Engkahka bisin ba entara langkau gempuru enggau alta nya. Isi ai ke dalam bisin nya.
8 Gantungka tirai ngelingi laman Langkau Sembiang, lalu gantungka tirai ke pintu penama laman langkau nya.
9 Ambi minyak ti kudus, lalu unsutka minyak nya ba Langkau Sembiang enggau ba semua utai ke bisi ba dalam langkau nya, kena nata semua utai nya, ngambika semua utai nya nyadi kudus.
10 Kena nata alta pemeri tunu, pechikka minyak ti kudus ba alta nya enggau semua pekekas iya, ngambika alta nya nyadi amat-amat kudus.
11 Pechikka mega minyak nya ba bisin enggau kaki iya, kena nata bisin nya, ngambika bisin nya nyadi tuchi.
12 “Bai Aron enggau bala anak lelaki iya datai semak ngagai pintu penama langkau gempuru. Udah nya, basu sida enggau ai.*
13 Pasukka gari ti kudus ba Aron. Tata iya lalu kuduska iya, ngambika iya ulih gawa nyadi imam ke Aku.
14 Udah nya, asuh bala anak lelaki iya datai semak, lalu pasukka baju jubah ba sida.
15 Nuan mesti nata sida, baka nuan ke nata apai sida, ngambika sida ulih gawa nyadi imam ke Aku. Enggau nya, sida enggau bala peturun sida deka seruran gawa nyadi imam ke Aku.”
16 Moses pan ngereja semua nya. Iya ngereja nya sama baka ke udah dipadahka Jehovah ngagai iya.
17 Langkau Sembiang pan didirika ba hari ti keterubah, dalam bulan ti keterubah, ba taun ti kedua.
18 Baka tu meh chara Moses nirika Langkau Sembiang: Iya ngengkahka pelasar tiang ba baruh, nirika langkar langkau, ngerasukka palang, sereta nirika tiang ke langkau nya.
19 Moses ngerembaika kain kena nutup Langkau Sembiang nya, lalu iya ngengkahka tudung ba atas kain nya, baka ke udah dipadahka Jehovah ngagai iya.
20 Udah nya, iya ngambi dua iti lampang batu Adat lalu ngengkahka nya ke dalam peti lampang batu Adat. Iya ngerasukka kayu ba peti nya lalu nutup peti nya ngena penutup iya.
21 Moses mai peti lampang batu Adat nya ke dalam Langkau Sembiang, lalu ngantung tirai ba depan peti nya, baka ke udah dipadahka Jehovah ngagai iya.
22 Ba dalam langkau gempuru nya, Moses ngengkahka mija ba luar tirai nya, iya nya ba begian utara langkau nya.
23 Iya lalu nusun roti ti diberi ngagai Jehovah ba atas mija nya, baka ke udah dipadahka Jehovah ngagai iya.
24 Ba dalam langkau gempuru, iya ngengkahka penuduk lampu ba depan mija nya, iya nya ba begian selatan langkau nya.
25 Iya nungkun lampu kelita ba depan Jehovah, baka ke udah dipadahka Jehovah ngagai iya.
26 Udah nya, iya ngengkahka alta emas ba depan tirai ba dalam langkau gempuru.
27 Alta nya dikena nunu menyan ke bebau rengut, ngambika asap iya niki ke atas, baka ke udah dipadahka Jehovah ngagai iya.
28 Udah nya, iya ngantung kain tirai ke pintu penama Langkau Sembiang.
29 Moses ngengkahka alta pemeri tunu ba pintu penama Langkau Sembiang, iya nya langkau gempuru. Alta nya dikena iya nyerahka pemeri tunu enggau pemeri bijirin, baka ke udah dipadahka Jehovah ngagai iya.
30 Moses ngengkahka bisin ba entara langkau gempuru enggau alta. Iya ngisi ai ke dalam bisin nya kena bebasu.
31 Moses, Aron, enggau bala anak lelaki Aron masu kaki enggau jari sida ba dia.
32 Sida deka masu diri ngena ai sebedau sida tama ngagai langkau gempuru tauka sebedau sida nyemakka diri ngagai alta, baka ke udah dipadahka Jehovah ngagai Moses.
33 Kepenudi sekali, Moses ngantung tirai ngelingi laman Langkau Sembiang enggau alta. Iya mega ngantung tirai ke pintu penama laman langkau nya.
Moses pan tembu ngereja semua pengawa nya.
34 Udah nya, remang* malut langkau gempuru, lalu Langkau Sembiang nya penuh laban mulia Jehovah.
35 Moses enda ulih tama ngagai langkau gempuru, laban langkau nya dibalut remang, lalu Langkau Sembiang penuh laban mulia Jehovah.
36 Tiap kali remang nya angkat ari Langkau Sembiang, orang Israel deka mindahka kem sida ngagai endur bukai. Nya meh utai ke dikereja sida ba sepemanjai pejalai sida.
37 Tang enti remang nya enda angkat ari langkau nya, sida enda mindahka kem sida ngagai endur bukai.
38 Sepemanjai pejalai orang Israel, sida ulih meda remang Jehovah ba atas Langkau Sembiang nya maya siang hari, lalu maya malam hari, sida ulih meda api ba atas langkau nya.
