Pemansut 7:1-25
7 Jehovah lalu bejaku ngagai Moses: “Aku deka ngasuh nuan nyadi baka Petara atas Firaun, lalu menyadi nuan, Aron, deka nyadi nabi nuan.
2 Padah ngagai menyadi nuan, Aron, pasal semua utai ke dipadahka Aku ngagai nuan, lalu iya deka bejaku ngagai Firaun. Pengujung iya, Firaun deka ngelepaska orang Israel ari menua iya.
3 Aku deka nejuka ati Firaun degil, lalu Aku deka ngereja mayuh utai ti luar biasa ba menua Ejip.
4 Tang Firaun enggai mendingka nuan. Aku deka ngena kuasa Aku ngelaban Ejip,* lalu mai nembiak Aku ti mayuh,* iya nya orang Israel, pansut ari menua Ejip. Aku deka ngukum menua Ejip enggau balat.
5 Lebuh Aku ngena kuasa Aku ngelaban Ejip, lalu mai orang Israel pansut ari menua nya, nya baru orang Ejip deka nemu Aku tu Jehovah.”
6 Moses enggau Aron pan ngereja utai ke diasuh Jehovah. Seduai iya ngereja semua utai sama baka ke udah dipadahka ngagai seduai iya.
7 Maya seduai iya bejaku ngagai Firaun, Moses beumur 80 taun, lalu Aron beumur 83 taun.
8 Jehovah bejaku ngagai Moses enggau Aron:
9 “Enti Firaun madah ngagai nuan: ‘Gaga siti pengawa ti luar biasa,’ nuan patut madah ngagai Aron: ‘Ambi tungkat nuan lalu tikauka tungkat nya ba depan Firaun.’ Tungkat nya deka berubah nyadi siku ular ti besai.”
10 Nyadi, Moses seduai Aron betemu enggau Firaun lalu ngereja semua utai baka ke dipadahka Jehovah ngagai seduai iya. Aron lalu nikauka tungkat iya ba depan Firaun enggau bala pegawai Firaun. Tungkat nya pan berubah nyadi siku ular ti besai.
11 Tang, Firaun ngangauka bala sida ke bepenemu-dalam enggau bala dukun ke nemu sihir* ba menua Ejip. Sida pan ngereja utai ti sama ngena ilmu sihir sida.
12 Tiap iku sida nikauka tungkat sida, lalu tungkat sida berubah nyadi ular ti besai. Tang ular* Aron nelan semua ular sida.
13 Taja pia, ati Firaun agi degil, lalu Firaun enggai mendingka seduai iya, baka ke dipadahka Jehovah.
14 Udah nya, Jehovah bejaku ngagai Moses: “Ati Firaun kelalu degil. Iya enggai ngelepaska orang Israel.
15 Alai nuan betemu enggau Firaun pagi pagila. Iya deka mansang ngagai Sungai Nil. Bai tungkat ke kala berubah nyadi ular nya, lalu anti iya ba tebing sungai nya.
16 Nuan mesti madah ngagai iya: ‘Jehovah, Petara orang Hebrew, udah nganjung aku ngagai nuan, lalu ku Iya madah: “Awakka nembiak Aku mupuk, ngambika sida ulih nyembah Aku ba menua puang.” Tang nyentukka diatu, nuan agi enggai ngereja nya.
17 Tu meh utai ke dipadah Jehovah: “Aku deka malu ai Sungai Nil ngena tungkat Aku, lalu sungai tu deka berubah nyadi darah. Nya baru nuan deka nemu, Aku tu meh Jehovah.
18 Ikan ba Sungai Nil deka mati. Sungai tu deka bebau but, lalu orang Ejip enda ulih ngirup ai ari sungai tu.”’”
19 Udah nya, Jehovah bejaku ngagai Moses: “Padah ngagai Aron: ‘Ambi tungkat nuan, lalu unjurka jari nuan ngagai semua ai ke bisi ba Ejip, ngagai sungai iya, parit iya, paya iya, enggau semua kolam iya, ngambika semua ai nya berubah nyadi darah.’ Ai ba serata menua Ejip deka berubah nyadi darah, nyengkaum ai ke ba dalam sarang ai ke digaga ari kayu enggau batu.”
20 Moses enggau Aron lalu terus ngereja utai ke diasuh Jehovah. Aron ngangkatka tungkat nya lalu malu Sungai Nil ba depan Firaun enggau bala pegawai iya. Ai sungai nya pan berubah nyadi darah.
21 Ikan ba sungai nya mati, lalu sungai nya berengkah bebau but. Orang Ejip enda ulih ngirup ai ari sungai nya. Ai ba serata menua Ejip berubah nyadi darah.
22 Tang bala imam ke nemu sihir ngena penemu resia sida kena ngereja utai ti sama. Nya alai, ati Firaun agi degil. Iya enggai mendingka seduai iya, baka ke udah dipadah Jehovah.
23 Firaun enda pedulika semua nya, lalu iya pulai ke istana iya.
24 Ketegal orang Ejip enda ulih ngirup ai ari Sungai Nil, sida numbak tanah semak Sungai Nil kena ngiga ai ke ulih diirup sida.
25 Jehovah udah ngubah Sungai Nil nyadi darah pengelama tujuh hari.
Nota Kaki
^ Jaku Asal, “deka ngengkahka jari Aku atas Ejip.”
^ Jaku Asal, “mai bala soldadu Aku.”
^ Peda Penerang Leka Jaku, “Ilmu sihir.”
^ Jaku Asal, “tungkat.”
