Pemansut 9:1-35
9 Nya alai, Jehovah bejaku ngagai Moses: “Alai nuan betemu enggau Firaun, lalu padah ngagai iya: ‘Tu meh utai ke dipadahka Jehovah, Petara orang Hebrew: “Awakka nembiak Aku mupuk ngambika sida ulih nyembah Aku.
2 Tang, enti nuan enggai ngasuh sida mupuk, lalu agi deka ngetanka sida,
3 Aku, Jehovah, deka ngena kuasa Aku munuh semua jelu tupi nuan. Kuda, keledai, unta, sapi, enggau bedus deka kena penyakit berampit ti balat.
4 Aku, Jehovah, deka nyeraraka jelu tupi orang Israel ari jelu tupi orang Ejip. Nadai siku pan jelu tupi orang Israel deka mati.”’”
5 Jehovah udah netapka maya Iya deka ngereja nya. Ku Iya madahka: “Aku, Jehovah, deka ngereja tu ba menua tu pagila.”
6 Hari siti, Jehovah pan ngereja nya. Semua jelu tupi orang Ejip mati magang. Tang, nadai siku pan jelu tupi orang Israel mati.
7 Lebuh Firaun ngasuh bala pegawai iya meresa utai ke nyadi, sida madah nadai siku pan jelu tupi orang Israel mati. Taja pia, ati Firaun agi degil, lalu iya enggai ngasuh orang Israel mupuk.
8 Udah nya, Jehovah bejaku ngagai Moses enggau Aron: “Ambi amau ari serumbung api ngena kedua-dua jari seduai, lalu Moses mesti nikauka nya ba depan Firaun.
9 Amau nya deka nyadi debu ti ngelekai ngagai serata menua Ejip. Enti debu nya tekena tubuh orang enggau jelu, debu nya deka berubah nyadi pisa ti benanah.”
10 Nya alai, seduai iya pan ngambi amau ari serumbung api lalu bediri ba depan Firaun. Moses nikauka amau nya, lalu amau nya nyadi pisa ti benanah ba tubuh orang enggau jelu.
11 Bala imam ke nemu sihir* enda ulih betemu enggau Moses, laban sida iya pan tekena pisa sama baka orang Ejip ke bukai.
12 Tang, Jehovah nejuka ati Firaun degil. Firaun enggai mendingka seduai iya, baka ke udah dipadahka Jehovah ngagai Moses.
13 Udah nya, Jehovah bejaku ngagai Moses: “Nuan mesti dani tumu pagila lalu betemu enggau Firaun, lalu padah ngagai iya: ‘Tu meh utai ke dipadahka Jehovah, Petara orang Hebrew: “Awakka nembiak Aku mupuk ngambika sida ulih nyembah Aku.
14 Tang enti nuan enggai, Aku deka ngasuh semua penulah ninggang nuan, bala pegawai nuan, enggau bala rayat nuan, ngambika nuan nemu nadai sapa-sapa ke baka Aku ba serata dunya tu.
15 Kebendar iya, enti Aku ngena kuasa Aku ngukum nuan enggau rayat nuan ngena penyakit berampit ti balat, kita tentu udah dipunaska ari dunya tu.
16 Tang, Aku nejuka nuan idup ngambika Aku ulih ngayanka kuasa Aku ngagai nuan, lalu serata dunya deka nemu nama Aku.
17 Taja pia, nuan agi sumbung lalu enggai ngasuh nembiak Aku mupuk.
18 Pagila, Aku deka ngasuh ujan batu ti balat nurun kira-kira ba maya tu. Ujan batu tu nadai kala nyadi ba Ejip.
19 Nya alai, asuh orang mai semua jelu tupi nuan enggau semua utai ke diempu nuan ba ladang ngagai endur ti selamat. Semua orang enggau jelu ke agi ba luar, ke enda belindung ba endur ti selamat, deka mati lebuh ujan batu ninggang sida.”’”
20 Sekeda pegawai Firaun pechayaka* jaku Jehovah. Nya alai, sida enggau jampat mai bala ulun sida sereta jelu tupi sida ngagai endur ti selamat.
21 Tang, sida ke enda pedulika jaku Jehovah nejuka bala ulun sida enggau jelu tupi sida ba luar.
22 Jehovah lalu bejaku ngagai Moses: “Angkatka jari nuan ke langit, ngambika ujan batu nurun ba serata menua Ejip. Ujan batu nya deka ninggang semua orang, jelu, enggau semua utai tumbuh ke agi ba luar.”
23 Nya alai, Moses ngangkatka tungkat iya ke langit, lalu Jehovah ngasuh guntur, ujan batu, enggau api* nurun ke dunya. Jehovah ngasuh ujan batu majak ninggang menua Ejip.
24 Ujan batu nya amat balat lalu kilat nyelar kin kia. Utai ke baka nya nadai kala nyadi ba menua Ejip.
25 Ujan batu nya ninggang semua utai ke agi ba luar ba menua Ejip, nyengkaum orang, jelu, enggau semua utai tumbuh. Semua pun kayu tumbang magang laban ujan batu nya.
26 Semina ba Gosen aja, iya nya endur orang Israel diau, nadai ujan batu.
27 Nyadi, Firaun ngasuh Moses enggau Aron datai, lalu ku iya madah ngagai seduai iya: “Kali tu, aku udah bedosa. Jehovah endang lurus. Aku enggau rayat aku ke salah.
28 Pinta ngagai Jehovah ngambika guntur enggau ujan batu tu ngetu. Udah nya, baru aku deka ngasuh kita mupuk. Aku enda agi ngetanka kita.”
29 Ku Moses madahka iya: “Pengudah aku pansut ari kuta tu, aku deka terus ngangkatka jari aku lalu besampi ngagai Jehovah. Guntur enggau ujan batu deka ngetu, ngambika nuan nemu dunya tu enggi Jehovah.
30 Taja pia, aku endang nemu nuan enggau bala pegawai nuan sigi enda nangika Petara Jehovah.”
31 Flaks* enggau barli udah anchur ditinggang ujan batu, laban maya nya barli udah sedia diketau lalu flaks udah bebungai.
32 Tang, gandum enda anchur laban gandum bedau agi sedia deka diketau.
33 Moses mupuk ari Firaun lalu pansut ari kuta nya. Udah nya, iya ngangkatka jari iya lalu besampi ngagai Jehovah. Guntur, ujan batu, enggau ujan pan ngetu.
34 Lebuh Firaun meda ujan, ujan batu, enggau guntur udah ngetu, iya bedosa baru lalu ati iya degil baru. Bala pegawai iya mega baka nya.
35 Baka ke udah dipadahka Jehovah nengah Moses, ati Firaun tetap degil. Iya enggai ngasuh orang Israel mupuk.
Nota Kaki
^ Peda Penerang Leka Jaku, “Ilmu sihir.”
^ Jaku Asal, “nangika.”
^ Engka merujuk ngagai kilat ti balat.
^ Sebengkah utai tumbuh ke ditanam ari kelia menya ke ulih dikena ngaga kain.
