Pemungkal 11:1-32
11 Maya nya, orang ba dunya semina ngena siti aja bansa jaku.
2 Maya sida bejalai tunga ke timur, sida tetemuka siti emperan ba menua Shinar. Sida lalu belabuh diau dia.
3 Udah nya sida berandau enggau pangan diri: “Aram kitai ngaga batu bata, lalu nunu batu bata nya.” Nya alai sida ngena batu bata enggau tar, ukai ngena batu enggau semin.
4 Ku sida bejaku: “Aram kitai ngaga siti kuta. Aram mega ngaga siti menara ti tinggi nyentuk ngagai langit ngambika kitai tampak nama, lalu enda ngachir ba serata dunya.”
5 Udah nya, Jehovah beratika kuta enggau menara ke digaga mensia.
6 Ku Jehovah bejaku: “Sida tu beserakup laban sida semina ngena siti aja bansa jaku. Enti diatu sida ulih ngereja tu, tentu ila sida deka ngereja sebarang utai ti dikinginka sida.
7 Aram tua* nurun lalu nyarutka jaku sida, ngambika sida enda nemu utai ti disebut pangan diri.”
8 Nya alai Jehovah nyarutka jaku sida, lalu sida ngachir ngagai serata dunya. Udah nya, sida pan badu agi ngaga kuta nya.
9 Kuta nya dikumbai Babel,* laban Jehovah udah nyarutka jaku mensia, lalu Jehovah udah ngachirka mensia ngagai serata dunya.
10 Tu cherita pasal Sem.
Dua taun pengudah Bah Besai, Sem bisi anak lelaki ke benama Apasat. Maya nya, Sem beumur 100 taun.
11 Pengudah Apasat ada, Sem idup 500 taun da agi, lalu iya bisi anak lelaki enggau anak indu ke bukai.
12 Maya Apasat beumur 35 taun, iya bisi siku anak lelaki ke benama Selah.
13 Pengudah Selah ada, Apasat idup 403 taun da agi, lalu iya bisi anak lelaki enggau anak indu ke bukai.
14 Maya Selah beumur 30 taun, iya bisi siku anak lelaki ke benama Eber.
15 Pengudah Eber ada, Selah idup 403 taun da agi, lalu iya bisi anak lelaki enggau anak indu ke bukai.
16 Maya Eber beumur 34 taun, iya bisi siku anak lelaki ke benama Pelek.
17 Pengudah Pelek ada, Eber idup 430 taun da agi, lalu iya bisi anak lelaki enggau anak indu ke bukai.
18 Maya Pelek beumur 30 taun, iya bisi siku anak lelaki ke benama Reu.
19 Pengudah Reu ada, Pelek idup 209 taun da agi, lalu iya bisi anak lelaki enggau anak indu ke bukai.
20 Maya Reu beumur 32 taun, iya bisi siku anak lelaki ke benama Seruk.
21 Pengudah Seruk ada, Reu idup 207 taun da agi, lalu iya bisi anak lelaki enggau anak indu ke bukai.
22 Maya Seruk beumur 30 taun, iya bisi siku anak lelaki ke benama Nahor.
23 Pengudah Nahor ada, Seruk idup 200 taun da agi, lalu iya bisi anak lelaki enggau anak indu ke bukai.
24 Maya Nahor beumur 29 taun, iya bisi siku anak lelaki ke benama Terah.
25 Pengudah Terah ada, Nahor idup 119 taun da agi, lalu iya bisi anak lelaki enggau anak indu ke bukai.
26 Pengudah Terah beumur 70 taun, iya belabuh bisi anak lelaki, iya nya Abram, Nahor, enggau Haran.
27 Tu cherita pasal Terah.
Terah bisi anak lelaki ke benama Abram, Nahor, enggau Haran. Haran bisi anak lelaki ke benama Lot.
28 Lebuh Terah agi idup, Haran mati ba menua alai iya ada, iya nya di Ur, menua orang Kaldea.
29 Abram enggau Nahor bebini. Nama bini Abram nya Sarai, lalu nama bini Nahor nya Milkah. Iya anak Haran, lalu Milkah bisi siku menyadi indu ke benama Iskah.
30 Sarai mandul. Nya alai iya nadai anak.
31 Terah mai anak iya Abram, uchu iya Lot, iya nya anak Haran, enggau menantu indu iya Sarai, iya nya bini Abram, pindah ari Ur menua orang Kaldea ngagai menua Kanaan. Lebuh sida datai ba Haran, sida lalu diau dia.
32 Terah beumur 205 taun lebuh iya mati ba Haran.
Nota Kaki
^ Dalam jaku Hebrew asal, leka jaku tu ulih merujuk ngagai dua iku orang tauka lebih.
^ Reti nya “Charut.”
