Pemungkal 13:1-18
13 Udah nya, Abram ninggalka menua Ejip lalu mansang ngagai Negeb. Iya mai bini iya enggau semua utai ke diempu iya. Lot mega nitihka seduai iya.
2 Abram nya orang ke amat kaya. Iya bisi mayuh jelu tupi, pirak, enggau emas.
3 Ari Negeb, iya diau ba endur siti ngagai endur siti nyentukka iya datai ba Bethel. Udah nya, iya pan datai ba endur ke kala alai iya diau, iya nya entara Bethel enggau Eyai
4 sereta ba endur alai iya ke kala ngaga alta. Ba dia meh alai Abram ngangauka nama Jehovah.
5 Lot ke nitihka Abram mega bisi bedus, sapi, enggau langkau kain.
6 Ketegal jelu sida kelalu mayuh, nya alai tanah nya enda chukup alai semua sida diau begulai.
7 Tu ngasuh bala pengibun jelu Abram enggau Lot suah belaya enggau pangan diri. (Maya nya, orang Kanaan enggau orang Peris agi diau ba menua nya.)
8 Abram lalu bejaku ngagai Lot: “Tua tu sama diri sekaban. Enda manah enti tua belaya. Bala pengibun jelu tua pan enda patut belaya enggau pangan diri.
9 Manah agi enti tua beserara. Pilih meh ni menua ti dikedekaka nuan. Enti nuan ke kiba, aku ke kanan. Enti nuan ke kanan, aku ke kiba.”
10 Nya alai, Lot meda endur ke ngelingi iya lalu beratika kawasan Jordan nyentuk ngagai Soar nya bisi mayuh ai. Kawasan nya baka taman ke digaga Jehovah* enggau baka menua Ejip (sebedau Jehovah nganchurka Sodom enggau Gomorah).
11 Udah nya, Lot milih kawasan Jordan lalu pindah tunga ke timur. Seduai iya pan beserara ari pangan diri.
12 Abram diau ba Kanaan, tang Lot diau semak enggau kuta ba kawasan Jordan. Pengujung iya, Lot nirika langkau kain semak Sodom.
13 Orang Sodom balat jai, lalu sida ngereja dosa ti besai ba mata Jehovah.
14 Pengudah Lot beserara enggau Abram, Jehovah bejaku ngagai Abram: “Ari endur nuan bediri nya, peda meh menua ke ngelingi nuan. Ari utara ngagai selatan, timur ngagai barat.
15 Aku deka meri tanah nya ngagai nuan enggau peturun nuan. Tanah nya deka diempu kita belama iya.
16 Aku mega deka meri nuan peturun ngemayuh pasir. Baka pasir ke enda alah diitung, peturun nuan mega enda alah diitung.
17 Nya alai bejalai meh ngagai serata menua tu, laban Aku deka meri menua tu ngagai nuan.”
18 Abram pan mupuk, lalu terus diau ba langkau kain. Udah nya iya datai ba Hebron, lalu diau semak enggau pun kayu ti besai ba Mamre. Ba dia iya ngaga alta ke Jehovah.
Nota Kaki
^ Iya nya, Taman Eden.
