Pemungkal 15:1-21
15 Udah nya, Jehovah mandangka utai dalam runding Abram. Ku Petara bejaku: “Anang takut Abram. Aku deka nyaga nuan.* Nuan deka bulih berekat ti besai.”
2 Ku Abram nyaut: “Jehovah, Tuan ti Pemadu Tinggi, nama guna berekat nya ba aku enti aku nadai anak? Orang ke deka bempu pesaka aku nya semina Elieser, ari Damaskus.”
3 Ku Abram agi: “Nuan bedau meri aku peturun, lalu siku ari ulun aku deka nyadi waris aku.”
4 Tang ku Jehovah nyaut: “Enda lelaki nya nyadi waris nuan. Tang anak nuan empu ke deka nyadi waris nuan.”
5 Petara mai Abram pansut lalu bejaku: “Peda nuan bintang ba langit, lalu uji nuan ngitung semua bintang nya.” Udah nya ku Petara agi: “Baka nya meh pemayuh peturun nuan.”
6 Abram arapka Jehovah. Lalu ketegal nya, Petara ngumbai iya orang ke lurus.
7 Ku Petara agi: “Aku tu Jehovah, ke mai nuan pansut ari Ur, menua orang Kaldea. Aku deka meri menua tu ngagai nuan.”
8 Ku Abram nanya: “Jehovah, Tuan ti Pemadu Tinggi, baka ni ku aku ulih nemu menua tu deka diempu aku?”
9 Disaut Petara: “Bai siku sapi indu ke bedau kala beranak, siku kambin ti indu, enggau siku bedus ti lelaki. Tiap iku jelu nya patut beumur tiga taun. Bai mega siku burung kukur enggau siku burung achang ti biak.”
10 Abram lalu munuh semua jelu nya. Tubuh sapi, kambin, enggau bedus nya dibelah iya dua. Udah nya iya ngengkahka setengah tubuh jelu nya ba sepiak kiba, lalu setengah da agi ba sepiak kanan. Tang burung nya enda dibelah iya.
11 Udah nya, burung ke makai bangkai lalu datai ngagai bangkai semua jelu nya. Tang Abram muru sida.
12 Maya mata panas nyauka padam, Abram jenak amat tinduk. Dalam mimpi iya, iya dibalut pemetang ti balat ngenakutka.
13 Ku Petara bejaku ngagai Abram: “Bala peturun nuan deka nyadi orang asing ba menua bukai. Sida deka nyadi ulun lalu diperinsa pengelama 400 taun.
14 Tang Aku deka ngukum bansa ke ngaga sida nyadi ulun. Udah nya, bala peturun nuan deka mai mayuh utai lebuh sida pansut ari menua nya.
15 Nuan empu deka idup dataika umur nuan nyau tuai. Nuan deka mati enggau ati ti lantang lalu dikuburka baka aki ini nuan.
16 Tang generasi* nuan ti keempat deka pulai kitu baru, laban penyalah orang Amor bedau chukup jai alai sida patut diukum.”
17 Lebuh mata panas padam lalu hari pan petang, siti serumbung api ke berasap ayan. Lalu batang kayu ke beapi mansa ba entara dagin jelu ke udah dibelah.
18 Ba hari nya, Jehovah ngaga sempekat enggau Abram. Ku Iya madah: “Aku deka meri menua tu ngagai peturun nuan, ari sungai ba Ejip nyentuk ngagai sungai besai, iya nya Sungai Eupratis.
19 Menua tu menua orang Keni, orang Kenis, orang Kadmon,
20 orang Het, orang Peris, orang Repaim,
21 orang Amor, orang Kanaan, orang Girgas, enggau orang Jebus.”
