Pemungkal 16:1-16
-
Hagar enggau Ismail (1-16)
16 Sarai, bini Abram, lalu bedau bisi anak. Tang, iya bisi siku orang gaji ari Ejip ke benama Hagar.
2 Nya alai Sarai bejaku ngagai Abram: “Dinga nuan utai ku aku. Jehovah udah nagang aku beranak. Nya alai, tinduk* meh enggau orang gaji aku. Engka aku tau bulih anak nengah iya.” Abram lalu ngereja utai ke diasuh Sarai.
3 Pengudah Abram diau 10 taun ba menua Kanaan, Sarai meri orang gaji iya Hagar, nyadika bini Abram.
4 Nya alai Abram besetubuh* enggau Hagar, lalu Hagar pan ngandung. Lebuh Hagar nemu diri udah ngandung, iya lalu ngemaruhka Sarai.
5 Nya alai Sarai bejaku ngagai Abram: “Aku merinsa baka tu ketegal nuan. Aku ke meri orang gaji aku ngagai nuan. Tang pengudah iya nemu diri udah ngandung, iya ngemaruhka aku. Awakka Jehovah nentuka sapa bagi tua ke betul tauka salah.”
6 Abram bejaku ngagai Sarai: “Barang ku nuan. Iya orang gaji nuan. Kereja aja sebarang utai ke dikedekaka nuan ngagai iya.” Nya alai, Sarai ngelayan Hagar enggau kasar lalu ngujungka Hagar ngerarika diri.
7 Udah nya, melikat Jehovah betemu enggau Hagar ba siti mata ai ba menua puang. Mata ai nya ba jalai ke nuju ngagai Sur.
8 Melikat nya nanya: “Hagar, orang gaji Sarai, ari ni nuan? Ka kini nuan?” Hagar nyaut: “Aku ngerarika diri ari Sarai.”
9 Melikat Jehovah bejaku ngagai iya: “Pulai nuan ngagai Sarai, lalu enggau baruh ati ngasika iya.”
10 Udah nya melikat Jehovah bejaku: “Aku* deka ngasuh peturun nuan nyadi mayuh nyentukka sida nyau enda alah diitung.”
11 Ku melikat Jehovah agi: “Diatu nuan benung ngandung, lalu nuan deka ngadaka siku anak lelaki. Nuan patut meri iya nama Ismail,* laban Aku, Jehovah, udah ningaka sebana nuan.
12 Anak nuan deka nyadi baka keledai liar.* Iya deka ngelaban semua orang, lalu semua orang deka ngelaban iya. Iya enda diau begulai enggau bala menyadi iya.”*
13 Hagar besampi ngagai Jehovah,* ke udah bejaku enggau iya. Ku iya: “Nuan endang Petara ke meda semua utai.” Hagar bejaku munyi tu laban Hagar udah madahka: “Aku udah meda Petara ke meda aku.”
14 Nya kebuah telaga nya dikumbai Beer-lahai-roi.* (Telaga nya ba entara Kades enggau Beret.)
15 Nyadi, Hagar ngadaka siku anak lelaki ke Abram, lalu Abram meri anak nya nama Ismail.
16 Abram beumur 86 taun lebuh Hagar ngadaka Ismail.
Nota Kaki
^ Tauka “besetubuh.”
^ Iya nya, pengawa seks entara siku lelaki enggau siku indu.
^ Melikat nya bejaku baka ke Jehovah Empu ke benung bejaku.
^ Reti nya “Petara Ninga.”
^ Engka ngambarka orang ke deka idup bibas.
^ Tauka engka, “Iya deka bemunsuh enggau bala menyadi iya.”
^ Jaku Asal, “ngangauka nama Jehovah.”
^ Reti nya “Telaga Iya ti Idup ke Meda Aku.”
