Pemungkal 20:1-18
-
Sarah diselamatka ari Abimelek (1-18)
20 Abraham pindah ngagai menua Negeb, lalu diau ba entara Kades enggau Sur. Lebuh iya diau* ba Gerar,
2 Abraham suah ngumbai Sarah nya menyadi iya. Nya alai, Raja Abimelek ari Gerar ngasuh orang gaji iya mai Sarah ngagai iya.
3 Nyadi sekali, lebuh malam hari, Petara bejaku enggau Raja Abimelek dalam mimpi. Ku Petara: “Nuan deka mati laban nuan udah ngambi indu nya. Iya udah bisi laki.”
4 Tang Abimelek nadai kala besetubuh* enggau Sarah. Nya alai ku iya bejaku: “Jehovah, kati Nuan amat deka munuh siti bansa ke nadai penyalah?*
5 Abraham empu ke madahka Sarah nya menyadi iya, lalu Sarah empu mega madahka Abraham nya menyadi iya. Aku nadai tuju ti jai lebuh ngereja nya. Nya alai, aku nadai ngereja penyalah.”
6 Ku Petara ti bendar nyaut iya dalam mimpi: “Aku nemu nuan nadai tuju ti jai. Nya kebuah Aku nagang nuan ari tinduk enggau* iya ngambika nuan enda ngereja dosa.
7 Beri indu nya pulai baru ngagai laki iya. Laki iya siku nabi, lalu iya deka besampi ke nuan ngambika nuan ulih terus idup. Tang enti nuan enda meri indu nya pulai baru ngagai laki iya, nuan enggau semua bala nuan deka mati magang.”
8 Tumu pagi hari siti, Abimelek lalu ngangauka semua orang gaji iya. Iya madah ngagai sida pasal mimpi iya, lalu semua sida balat takut.
9 Udah nya Abimelek ngangauka Abraham, lalu nanya iya: “Nama kebuah nuan ngereja utai ti jai tu ngagai kami? Nama penyalah ke udah dikereja aku nyentukka nuan ngasuh penusah ti besai tu ninggang aku enggau rayat aku? Utai ke dikereja nuan nya salah!”
10 Abimelek nanya Abraham baru: “Nama tuju nuan ngereja utai nya?”
11 Ku Abraham nyaut: “Aku ngereja nya laban ngumbai orang ba menua tu enda nangika Petara, lalu sida deka munuh aku ketegal sida deka ngambi bini aku.
12 Kebendar iya, iya endang amat menyadi aku. Kami duai sama apai tang enda sama indai, lalu kami duai udah jadi enggau pangan diri.
13 Nya alai, lebuh Petara ngasuh aku ninggalka rumah apai aku, aku madah ngagai Sarah: ‘Enti nuan amat sayauka aku,* enda ngira kini ke penunga tua, nuan patut madahka aku tu menyadi nuan.’”
14 Udah nya Abimelek meri Abraham bedus, sapi, sereta ulun ti lelaki enggau indu. Iya mega meri Sarah pulai baru ngagai Abraham.
15 Abimelek mega madah ngagai Abraham: “Semua tu endang menua aku magang. Nuan tau diau ba sebarang endur ke dikedekaka nuan.”
16 Iya mega madah ngagai Sarah: “Aku meri 1,000 singkap duit pirak ngagai menyadi nuan. Tu kena nunjukka ngagai kita sebilik sereta orang bukai, nuan nadai ngereja penyalah, lalu nadai orang tau nyalahka nuan.”
17 Abraham lalu besampi ngagai Petara ti bendar. Petara pan ngeraika Abimelek, bini iya enggau bala ulun indu iya, ngambika sida ke indu nya ulih beranak baru.
18 Tu ketegal Jehovah udah ngasuh semua indu ba rumah Abimelek nyadi mandul laban Abimelek udah ngambi Sarah, bini Abraham.
Nota Kaki
^ Tauka “diau nyadi orang asing.”
^ Iya nya, pengawa seks entara siku lelaki enggau siku indu.
^ Tauka “ke lurus.”
^ Jaku Asal, “ari negu.”
^ Tauka “Enti nuan deka ngayanka pengerindu ti setia ngagai aku.”
