Pemungkal 21:1-34
21 Baka ke udah dipadah Jehovah, Jehovah merekatka Sarah lalu ngamatka semaya Iya.
2 Nya alai, Sarah pan ngandung lalu ngadaka siku anak lelaki ke Abraham, ba maya ke dipadah Petara. Maya nya, Abraham nyau udah tuai amat umur.
3 Abraham meri anak nya nama Isak.
4 Baka ke udah diasuh Petara, Abraham nyunat anak iya Isak lebuh anak nya beumur lapan hari.
5 Abraham beumur 100 taun lebuh Isak ada.
6 Ku Sarah bejaku: “Petara udah ngasuh aku ketawa. Semua orang ke ninga berita tu deka ketawa sama enggau aku.”*
7 Ku iya agi: “Nadai orang nyangka aku, Sarah, ulih ngadaka anak ke Abraham. Tang, aku udah ngadaka anak ke Abraham lebuh iya nyau tuai.”
8 Anak mit nya mansang besai. Ba hari iya badu agi nusu, Abraham nyediaka pengerami makai besai.
9 Tang, Sarah majak beratika anak lelaki Abraham ke diadaka Hagar, indu orang Ejip nya, suah ngemelika Isak.
10 Nya alai, Sarah bejaku enggau Abraham: “Buru ulun ke indu nya enggau anak iya! Anak iya enda ulih bempu pesaka sama enggau anak aku Isak.”
11 Tang Abraham tusah ati lebuh ninga utai ke disebut Sarah pasal anak nya.
12 Ku Petara bejaku ngagai Abraham: “Anang tusah ati enggau utai ke disebut Sarah pasal anak nya enggau ulun indu nuan nya. Dinga utai ku Sarah, laban peturun nuan deka datai ari Isak.
13 Tang pasal anak ari ulun indu nuan nya, Aku deka ngasuh siti bansa ti besai datai ari iya, laban iya mega anak nuan.”
14 Pagi hari siti, Abraham dani tumu lalu meri pemakai* enggau kambut kulit ke diisi enggau ai ngagai Hagar. Iya ngengkahka semua utai tu ba bau Hagar, lalu ngasuh Hagar enggau anak nya mupuk. Hagar pan mupuk lalu bejalai kin kia ba menua puang di Beer-sheba.
15 Lebuh ai ba dalam kambut nya nyau udah abis, Hagar lalu ninggalka anak iya ba dalam babas.
16 Udah nya, iya mupuk jauh mimit* lalu duduk kediri. Ku iya madah: “Aku enda sanggup meda anak nya mati.” Nya alai, iya duduk dia lalu nyabak enggau inggar.
17 Enda lama udah nya, Petara ninga sabak anak nya. Melikat Petara bejaku ngagai Hagar ari serega: “Nama kebuah nuan nyabak Hagar? Anang takut, laban Petara udah ninga nyawa anak nuan.
18 Alai, mupuk nuan, lalu tulung anak nya angkat. Intu iya laban Aku deka ngasuh siti bansa ti besai datai ari iya.”
19 Udah nya, Petara ngasuh Hagar tepedaka siti telaga. Hagar mansang ngagai telaga nya lalu ngisi kambut iya enggau ai. Udah nya, iya meri anak iya ngirup.
20 Anak nya majak mansang besai lalu Petara terus enggau iya. Iya diau ba menua puang, lalu nyadi orang ke landik ngena panah.
21 Iya ngentapka diri ba menua puang di Paran, lalu indai iya ngambi siku indu ari Ejip nyadika bini iya.
22 Maya nya, Abimelek enggau ketuai soldadu iya, Pikol, bejaku ngagai Abraham: “Kami meda Petara bisi enggau nuan, enda ngira nama pengawa ke dikereja nuan.
23 Nya alai, besumpah ba mua Petara. Nuan enda nipu aku, anak aku, enggau bala peturun aku. Baka aku ke udah ngayanka pengerindu ti setia ngagai nuan, nuan mega patut ngayanka pengerindu ti sama ngagai aku enggau menua tu, ke alai nuan benung diau diatu.”
24 Ku Abraham nyaut: “Au, aku setuju deka besumpah.”
25 Udah nya, Abraham madah ngagai Abimelek pasal telaga iya ke dirampas orang gaji Abimelek.
26 Ku Abimelek nyaut: “Enda ku nemu sapa ke ngereja utai tu. Nuan nadai ga madah ngagai aku pasal utai tu. Baru diatu aku ninga pasal utai tu.”
27 Nya alai, Abraham ngambi bedus enggau sapi, lalu meri jelu nya ngagai Abimelek. Udah nya, seduai iya ngaga siti sempekat.
28 Lebuh Abraham nyerara tujuh iku bedus ke indu ari raban jelu nya,
29 Abimelek nanya Abraham: “Nama kebuah nuan nyeraraka tujuh iku bedus tu?”
30 Ku Abraham nyaut: “Ambi meh tujuh iku bedus nya nyadika tanda aku udah numbak telaga tu.”
31 Nya alai endur nya dikumbai iya Beer-sheba,* laban nya endur alai seduai iya udah besumpah.
32 Abraham enggau Abimelek ngaga sempekat ba Beer-sheba. Pengudah nya, Abimelek enggau ketuai soldadu iya, Pikol, mupuk pulai ngagai menua Pilistin.
33 Abraham nanam sepun kayu tamaris ba Beer-sheba. Ba dia, iya mega ngangauka nama Jehovah, Petara ti meruan belama iya.
34 Lalu Abraham lama diau* ba menua Pilistin.
Nota Kaki
^ Tauka engka, “ketawaka aku.”
^ Jaku Asal, “roti.”
^ Tauka “mupuk kira-kira sepenyauh anak panah ke ditimbakka orang.”
^ Engka mai reti “Telaga Sumpah” tauka “Telaga Tujuh.”
^ Tauka “diau nyadi orang asing.”
