Pemungkal 22:1-24
22 Udah nya, Petara ti bendar nguji Abraham. Ku Petara: “Abraham!” Lalu disaut Abraham: “Tu aku!”
2 Ku Petara bejaku: “Bai anak nuan Isak, anak tunggal nuan, ke balat dikesayauka nuan, lalu mansang nuan ngagai menua Moriah. Serahka iya nyadi pemeri tunu ba siti gunung ke deka ditunjukka Aku ngagai nuan.”
3 Pagi hari siti, Abraham dani tumu. Iya nyediaka keledai iya, lalu mai dua iku orang gaji iya sereta Isak sama enggau iya. Iya melah kayu kena nunu pemeri tunu. Udah nya, sida mupuk mansang ngagai endur ke ditunjukka Petara ti bendar ngagai iya.
4 Ba hari ketiga, Abraham meda endur nya ari jauh.
5 Ku Abraham madah ngagai orang gaji iya: “Seduai enggau keledai nya nganti ditu. Tang aku enggau anak aku deka mupuk kin nyembah Petara, lalu udah nya, kami deka pulai kitu baru.”
6 Abraham ngambi kayu ke dikena nunu pemeri tunu, lalu ngengkahka nya ba bau Isak. Udah nya, Abraham mai bara api enggau duku, lalu seduai iya neruska pejalai.
7 Isak bejaku enggau Abraham: “Apai!” Ku Abraham nyaut: “Nama, anak?” Isak lalu nanya: “Tua bisi bara api enggau kayu. Tang ni bedus ke pemeri tunu deh?”
8 Disaut Abraham: “Petara Empu deka nyediaka bedus nya, anak.” Lalu seduai iya pan neruska pejalai.
9 Pengujung iya, seduai iya pan datai ba endur ke udah ditunjukka Petara ti bendar ngagai Abraham. Abraham ngaga siti alta ba dia, lalu nusun kayu ba atas alta nya. Abraham nanchang jari enggau kaki Isak, lalu ngalika iya ba atas tugung kayu nya.
10 Udah nya, Abraham ngambi duku lalu deka munuh anak iya.
11 Tang melikat Jehovah ngangau ari serega: “Abraham! Abraham!” Ku Abraham nyaut: “Tu aku!”
12 Ku melikat nya bejaku: “Anang ngemediska anak nya, tauka ngereja nama-nama utai ngagai iya. Diatu Aku* nemu, nuan amat nangika Petara, laban nuan sanggup nyerahka anak tunggal nuan ngagai Aku.”
13 Udah nya, Abraham tepedaka siku jelu bedus ke lelaki. Tanduk bedus nya tekait ba babas. Nya alai, Abraham pan mansang ngagai bedus nya, lalu nyerahka iya nyadi pemeri tunu kena nganti anak iya.
14 Abraham ngumbai endur nya Jehovah-jireh.* Nya alai, nyentukka seharitu orang agi nyebut: “Jehovah deka nyediaka utai ke diguna ba gunung Iya.”
15 Sekali agi, melikat Jehovah ngangauka Abraham ari serega.
16 Ku melikat nya: “Jehovah madah, ‘Laban nuan udah ngereja tu lalu sanggup meri anak nuan, anak tunggal nuan, Aku besumpah atas nama Diri,
17 Aku tentu deka merekatka nuan, lalu Aku tentu deka ngasuh peturun nuan nambah belipat kali ganda, baka bintang ba langit sereta baka pasir ba tebing tasik. Lalu peturun nuan deka nguasa pintu kuta* bala munsuh iya.
18 Lalu nengah peturun nuan, semua bansa ba dunya deka bulih berekat* ketegal nuan ngasika* jaku Aku.’”
19 Udah nya, Abraham pulai ngagai orang gaji iya, lalu semua sida sama mupuk pulai ngagai Beer-sheba. Lalu Abraham terus diau ba Beer-sheba.
20 Udah nya, bisi orang madah ngagai Abraham: “Milkah udah ngadaka anak lelaki ke menyadi nuan Nahor.
21 Anak tuai iya, Uz. Udah nya Baz, Kemuel (iya nya apai Aram),
22 Cheset, Haso, Pildas, Jitlap, enggau Bituel.”
23 Bituel nya apai Rebekah. Milkah udah ngadaka sida lapan iku nya ke Nahor, menyadi Abraham.
24 Madu Milkah, ke benama Reumah, mega ngadaka anak lelaki ke Nahor. Nama sida Tebah, Gaham, Tahas, enggau Maakah.
Nota Kaki
^ Kebendar iya, Jehovah benung bejaku nengah melikat Iya.
^ Reti nya “Jehovah Deka Nyediaka; Jehovah Deka Meda.”
^ Iya nya, ngalahka kuta nya.
^ Tauka “deka ngulihka berekat ke diri empu.”
^ Jaku Asal, “ningaka.”
