Pemungkal 24:1-67
24 Abraham udah tuai amat umur, lalu Jehovah udah merekatka Abraham dalam semua utai.
2 Bisi sekali, Abraham ngangauka orang gaji iya ke pemadu tuai dalam ruang bilik iya. Orang gaji nya ngatur semua utai ke diempu Abraham. Ku Abraham bejaku ngagai iya: “Aku deka nuan besemaya*
3 sereta besumpah ba mua Jehovah, Petara ti bekuasa ba serega enggau dunya, nuan enda ngiga indu ari menua endur aku diau tu, iya nya indu orang Kanaan, nyadika bini anak aku.
4 Tang nuan patut ngiga siku bini ke anak aku Isak, ari bala kaban belayan aku. Nya alai, mupuk meh nuan ngagai menua asal aku.”
5 Tang orang gaji nya nanya Abraham: “Baka ni enti indu nya enggai enggau aku kitu deh? Kati aku patut mai anak nuan kin?”
6 Abraham nyaut: “Anang mai anak aku kin.
7 Jehovah, Petara ti bekuasa ba serega, udah ngasuh aku ninggalka rumah apai aku sereta menua kaban belayan aku. Iya udah besumpah: ‘Aku deka meri menua tu ngagai peturun nuan.’ Nya alai, Iya deka nganjung melikat kena nulung nuan, lalu nuan tentu deka tetemuka siku indu ke ulih nyadika bini anak aku.
8 Enti indu nya enggai enggau nuan kitu, nuan dilepaska ari sumpah tu. Tang anang sekali-kali mai anak aku kin.”
9 Orang gaji nya pan besemaya enggau Abraham, tuan iya, lalu besumpah deka ngereja semua utai ke dipinta Abraham.
10 Nya alai, orang gaji nya mai 10 iku unta enggau mayuh macham hadiah ari tuan iya. Udah nya, iya mupuk mansang ngagai kuta Nahor ke ba Mesopotamia.
11 Pengudah iya datai ba telaga ke ba luar kuta nya, iya ngetu ngambika bala unta ulih berehat. Maya nya, hari udah lemai, lalu nya maya bala sida ke indu datai nyauk ai.
12 Udah nya iya besampi: “Jehovah, Petara tuan aku Abraham, asuh aku mujur seharitu, lalu ayanka pengerindu Nuan ti setia ngagai tuan aku, Abraham.
13 Diatu aku benung bediri semak enggau telaga, lalu bala indu ke ba kuta tu benung datai nyauk ai.
14 Aku deka bejaku enggau siku ari bala indu nya: ‘Awakka aku ngirup ai ari tempayan nuan.’ Enti iya nyaut: ‘Ngirup meh, lalu aku mega deka meri bala unta nuan ngirup.’ Enggau nya, aku ulih nemu, iya meh indu ti dipilih Nuan ke nembiak Nuan, Isak. Lalu enggau nya mega, aku ulih nemu, Nuan udah ngayanka pengerindu ti setia ngagai tuan aku.”
15 Bedau abis orang gaji nya besampi, Rebekah lalu datai ngesan tempayan ai. Rebekah nya anak indu Bituel. Bituel nya anak lelaki Nahor enggau bini iya, Milkah. Nahor nya menyadi lelaki Abraham.
16 Rebekah nya indu ke amat bajik, lalu nadai kala besetubuh* enggau lelaki. Iya nurun ngagai endur telaga nya, ngisi tempayan iya enggau ai, lalu niki baru.
17 Tekala nya, orang gaji Abraham belanda ngagai indu nya lalu bejaku: “Beri aku mimit ai irup ari tempayan nuan.”
18 Ku indu nya nyaut: “Ngirup meh, tuan.” Udah nya, iya beguai-guai nurunka tempayan ke disan iya, lalu megai tempayan nya lebuh iya meri orang gaji nya ai irup.
19 Pengudah orang gaji nya badu agi ngirup, indu nya bejaku: “Aku mega deka meri ai ngagai bala unta nuan, sampai sida udah puas ngirup.”
20 Indu nya lalu nuang ai ari tempayan iya ngagai endur alai jelu ngirup. Udah nya, iya belanda baru ngagai endur telaga nya, ngisi tempayan nya enggau ai, lalu meri ai nya ngagai bala unta. Iya ngereja nya beberapa kali.
21 Orang gaji nya enda bemunyi lebuh iya beratika indu nya. Tu ketegal iya alit ati, lalu ka nemu sekalika Jehovah udah nulung iya tauka bedau.
22 Pengudah bala unta nya badu ngirup, orang gaji Abraham meri indu nya siti antin idung ke digaga ari emas enggau dua iti gelang emas. Pemerat antin idung nya setengah shekel,* lalu pemerat gelang emas nya 10 shekel.
23 Orang gaji nya nanya: “Anak sapa nuan tu, endu? Kati bisi endur alai kami ulih bemalam ba rumah apai nuan?”
24 Ku indu nya nyaut: “Aku tu anak Bituel. Ini aku Milkah, lalu aki aku Nahor.”
25 Ku indu nya agi: “Kami bisi rumput rangkai enggau mayuh pemakai ke jelu. Kami mega bisi endur alai bemalam.”
26 Orang gaji nya lalu besugang meri terima kasih ngagai Jehovah.
27 Ku iya: “Awakka Jehovah, Petara tuan aku Abraham, dipuji, laban Iya terus ngayanka pengerindu Iya ti setia sereta seruran ngamatka semaya Iya ngagai tuan aku. Jehovah udah ngiring aku ngagai rumah bala kaban belayan tuan aku.”
28 Udah nya, indu nya belanda pulai, lalu madah ngagai indai iya sereta bala ke bukai pasal utai ke nyadi.
29 Rebekah bisi siku menyadi lelaki ke benama Laban. Laban pan belanda ngagai orang gaji ke ba semak telaga nya.
30 Tu ketegal iya udah meda antin ba idung sereta gelang ba jari menyadi iya, Rebekah. Iya mega ninga utai ke ditusui Rebekah pasal utai ke disebut orang gaji nya. Nya alai, iya lalu betemu enggau orang gaji nya, ke benung bediri ngimbai bala unta semak telaga.
31 Iya lalu bejaku: “Nuan endang udah diberekat Jehovah. Nama kebuah nuan agi bediri ditu? Aram ngagai rumah aku. Aku udah nyediaka endur ke nuan ba rumah aku sereta endur ke bala unta nuan.”
32 Orang gaji nya pan ngagai rumah Laban. Iya* nurunka barang ari bala unta lalu meri rumput rangkai enggau pemakai ngagai bala unta. Udah nya, iya ngambi ai kena orang gaji nya enggau bala ke enggau iya masu kaki.
33 Lebuh pemakai dibai ngagai orang gaji nya, ku orang gaji nya: “Sebedau aku makai, bisi utai ke ka dipadah aku dulu.” Ku Laban nyaut: “Padahka dia meh.”
34 Ku orang gaji nya madah: “Aku tu orang gaji Abraham.
35 Jehovah udah merekatka tuan aku, lalu ngasuh iya nyadi kaya. Iya meri tuan aku bedus, sapi, unta, keledai, pirak enggau emas, sereta ulun lelaki enggau indu.
36 Sarah, bini tuan aku, udah ngadaka siku anak lelaki lebuh iya nyau tuai, lalu tuan aku deka meri semua pesaka iya ngagai anak iya.
37 Tuan aku ngasuh aku besumpah. Ku iya: ‘Nuan enda tau ngiga indu ari menua endur aku diau tu, iya nya indu orang Kanaan, nyadika bini anak aku.
38 Tang nuan patut ngiga bini ke anak aku ari bala kaban belayan apai aku.’
39 Aku lalu nanya tuan aku: ‘Baka ni enti indu nya enggai enggau aku deh?’
40 Ku tuan aku nyaut: ‘Jehovah, Petara ke disembah aku, deka nganjung melikat Iya kena nulung nuan ngambika nuan mujur. Nuan patut ngiga siku bini ke anak lelaki aku ari kaban belayan apai aku.
41 Enti nuan udah betemu enggau bala kaban belayan aku, lalu sida enggai meri indu nya ngagai nuan, nuan deka dilepaska ari sumpah tu, laban nuan udah bejalaika tanggungjawap nuan ngagai aku.’
42 “Maya aku datai semak ngagai telaga nya, aku besampi: ‘Jehovah, Petara tuan aku Abraham, asuh aku mujur seharitu.
43 Diatu aku benung bediri semak enggau telaga. Lebuh siku indu datai nyauk ai, aku deka bejaku enggau iya: “Awakka aku ngirup ai ari tempayan nuan.”
44 Enti iya nyaut: “Ngirup meh, lalu aku mega deka ngambi ai ke bala unta nuan.” Indu nya meh ti dipilih Jehovah ke anak tuan aku.’
45 “Bedau abis aku besampi dalam ati, Rebekah pan datai ngesan tempayan ngagai telaga, lalu ngambi ai. Udah nya, aku bejaku ngagai iya: ‘Beri aku ai irup.’
46 Iya lalu beguai-guai nurunka tempayan ai ke disan iya, lalu madah: ‘Ngirup meh, lalu aku mega deka ngambi ai ke bala unta nuan.’ Aku pan ngirup, lalu iya mega meri ai ngagai bala unta aku.
47 Udah nya, aku nanya iya: ‘Anak sapa nuan tu, endu?’ Ku iya nyaut: ‘Apai aku Bituel, anak Nahor seduai Milkah.’ Nya alai, aku meri iya antin idung enggau gelang jari ngambika dikena iya.
48 Udah nya, aku besugang ngagai Jehovah lalu muji Jehovah, Petara tuan aku Abraham. Iya udah ngiring aku betemu enggau uchu menyadi tuan aku, ngambika ulih nyadi bini ke anak tuan aku.
49 Nyadi diatu, padahka ngagai aku enti kita deka ngayanka pengerindu ti setia sereta nitihka utai ke dipinta* tuan aku. Enti kita enggai, padahka mega ngagai aku, ngambika aku nemu utai ke patut digaga aku.”
50 Udah nya, ku Laban enggau Bituel nyaut: “Ketegal tu ari Jehovah, kami nadai hak ngaga pemutus ba pekara tu.
51 Tu iya Rebekah. Bai meh iya, lalu awakka iya nyadi bini anak tuan nuan, baka ke udah dipadah Jehovah.”
52 Lebuh orang gaji Abraham ninga nya, iya lalu besugang meri terima kasih ngagai Jehovah.
53 Orang gaji nya lalu meri Rebekah barang kemas ke digaga ari pirak enggau emas sereta gari. Iya mega meri hadiah ti berega ngagai menyadi lelaki sereta indai Rebekah.
54 Udah nya, orang gaji nya enggau bala orang ke enggau iya bela sama makai enggau ngirup, lalu sida bemalam ba dia.
Lebuh sida dani pagi hari siti, ku orang gaji nya madah: “Awakka aku pulai ngagai tuan aku.”
55 Ku menyadi lelaki enggau indai Rebekah madah: “Awakka Rebekah diau enggau kami kira-kira 10 hari. Udah nya, iya ulih mupuk.”
56 Tang ku orang gaji nya nyaut: “Anang ngetan aku, laban Jehovah udah ngasuh pejalai aku mujur. Awakka aku pulai ngagai tuan aku.”
57 Disaut seduai iya: “Manah agi enti kitai ngangauka Rebekah, lalu nanya iya empu.”
58 Seduai iya lalu ngangauka Rebekah, lalu nanya iya: “Nuan ka mupuk enggau lelaki tu?” Ku Rebekah nyaut: “Au, aku ka.”
59 Nya alai, sida ngasuh Rebekah enggau indu ke nyaga iya ari mit* mupuk enggau orang gaji Abraham sereta bala ke enggau iya.
60 Sida merekatka Rebekah. Ku sida: “Rebekah, awakka peturun nuan nyadi bejuta-juta iku, lalu nguasa kuta-kuta* orang ke begedika sida.”
61 Udah nya, Rebekah enggau bala orang gaji iya ke indu pan angkat nepan unta lalu nitihka orang gaji Abraham. Lalu sida pan mupuk.
62 Isak, ke diau ba Negeb, benung datai ari arah Beer-lahai-roi.
63 Isak benung bejalai ba padang maya mata panas nyauka padam. Maya nya, iya benung berunding enggau dalam pasal sekeda utai. Udah nya, iya malik lalu tepedaka bala unta datai.
64 Lebuh Rebekah tepedaka Isak, iya beguai-guai nurun ari unta iya.
65 Udah nya, iya nanya orang gaji Abraham: “Sapa lelaki nya, ke benung bejalai ngagai kitai kitu?” Lalu ku orang gaji nya nyaut: “Iya meh tuan aku.” Nya alai, Rebekah ngambi kain lalu nudung pala iya.
66 Lalu orang gaji nya madah ngagai Isak semua utai ke udah digaga iya.
67 Udah nya, Isak mai Rebekah tama ngagai langkau kain indai iya, Sarah. Isak jadi enggau Rebekah, lalu iya jatuh cinta ngagai Rebekah. Pengudah nya, Isak enda agi tusah ati ke indai iya ti udah nadai.
Nota Kaki
^ Jaku Asal, “Engkahka jari nuan ba baruh pah aku.” Tu chara orang kelia nunjukka diri setuju enggau sumpah ke udah digaga.
^ Iya nya, pengawa seks entara siku lelaki enggau siku indu.
^ Peda Rujukan B14.
^ Engka merujuk ngagai Laban.
^ Jaku Asal, “sereta ngayanka penetap ati ngagai.”
^ Iya nya, indu ke nyaga iya ari mit tang diatu nyadi orang gaji iya.
^ Tauka “pintu penama kuta.”
