Pemungkal 25:1-34
25 Abraham bebini baru, lalu nama bini iya Keturah.
2 Keturah ngadaka Simran, Joksan, Medan, Midian, Isbak, enggau Shuah.
3 Joksan bisi anak ke benama Sheba enggau Dedan.
Peturun Dedan nya Asurim, Letusim, enggau Lumim.
4 Anak lelaki Midian nya Epah, Eper, Hanok, Abida, enggau Eldaah.
Semua sida tu peturun Keturah.
5 Abraham meri semua pesaka iya ngagai Isak,
6 tang Abraham meri hadiah ngagai bala anak iya ke diadaka bini iya ti bukai. Lebuh Abraham agi idup, iya ngasuh bala anak iya ke bukai pindah ngagai menua tunga ke timur, jauh ari anak iya Isak.
7 Abraham idup pengelama 175 taun.
8 Abraham mati lebuh iya nyau udah tuai. Iya mati enggau ati ti lantang, lalu dikuburka baka aki ini iya.*
9 Anak iya, Isak seduai Ismail, nguburka iya ba dalam gua ba Makpelah, semak Mamre. Gua nya ba ladang ke diempu Epron anak Sohar, orang Het.
10 Abraham udah meli ladang nya ari orang Het. Dia meh alai Abraham enggau bini iya Sarah dikuburka.
11 Pengudah Abraham mati, Petara terus merekatka Isak. Isak diau semak Beer-lahai-roi.
12 Tu peturun Ismail, anak Abraham seduai Hagar. Hagar nya indu orang Ejip ke nyadi ulun Sarah.
13 Tu meh nama bala anak lelaki Ismail, peturun iya: Anak tuai iya Nebaiot. Udah nya, Kedar, Adbil, Mipsam,
14 Misma, Dumah, Massa,
15 Hadat, Tema, Jetur, Nafis, enggau Kedemah.
16 Tu meh 12 iku anak Ismail, lalu sida nyadi tuai raban bansa. Endur alai sida diau sereta endur alai sida nirika kem dikangau nitihka nama sida.
17 Ismail idup pengelama 137 taun. Udah nya, iya mati lalu dikuburka baka aki ini iya.*
18 Bala peturun iya diau ari Habilah nyentuk ngagai Asiria. Habilah nya semak enggau Sur, ke enda jauh ari Ejip. Sida diau semak enggau pangan diri.*
19 Tu meh cherita pasal Isak anak Abraham.
Abraham nya apai Isak.
20 Lebuh Isak beumur 40 taun, iya jadi enggau Rebekah, anak indu Bituel, orang Aram ari Padan-aram. Rebekah mega menyadi Laban, orang Aram.
21 Ketegal bini iya mandul, Isak enda ngetu besampi ngagai Jehovah. Nya alai, Jehovah nyaut sampi iya, lalu bini iya Rebekah pan ngandung.
22 Anak dalam perut iya belaban enggau pangan diri. Ku Rebekah bejaku: “Enti aku merinsa baka tu, nadai guna aku idup!” Nya alai, iya besampi ngagai Jehovah pasal pekara tu.
23 Ku Jehovah madah ngagai Rebekah: “Bisi dua iku anak lelaki dalam perut nuan, lalu seduai iya deka nyadi dua bengkah bansa. Siti bansa deka kering agi ari bansa ti siti, lalu iya ke tuai deka gawa ke iya ke biak agi.”
24 Lebuh nyau chukup bulan, Rebekah pan ngadaka anak besapit dua.
25 Lebuh anak ke tuai nya ada, tubuh iya mirah-mirah lalu balat bebulu. Nya kebuah sida meri anak nya nama Esau.*
26 Udah nya, anak ke biak ada, lalu iya megai tumbit Esau. Nya alai, anak nya diberi nama Jakop.* Isak beumur 60 taun lebuh Rebekah ngadaka anak sapit nya.
27 Nembiak dua iku nya mansang besai. Esau nyadi orang ke landik ngasu, lalu iya selalu pansut ngasu. Tang Jakop rindu diau dalam langkau kain. Iya orang ke selalu ngereja utai ti betul.
28 Isak rindu agi ke Esau, laban iya rindu makai dagin ke dibai Esau. Tang Rebekah rindu agi ke Jakop.
29 Bisi sekali, Jakop benung manduk sup kachang, lebuh Esau pulai ngasu. Esau berasai lelak amat.
30 Esau lalu bejaku ngagai Jakop: “Lapar* amat aku tu. Jampat! Beri aku mimit sup mirah nya.” Nya alai, iya diberi nama Edom.*
31 Jakop pan nyaut: “Au. Tang nuan mesti nyual hak nuan ke nyadi anak tuai ngagai aku dulu!”
32 Ku Esau nyaut: “Aku tu nyauka mati, nama guna hak nya ba aku?”
33 Jakop lalu madah: “Besumpah dulu ngagai aku!” Esau pan besumpah lalu nyual hak iya ke nyadi anak tuai ngagai Jakop.
34 Udah nya, Jakop pan meri Esau roti enggau sup kachang. Esau lalu makai enggau ngirup. Pengudah nya, iya angkat lalu mupuk. Enggau nya, Esau nunjukka hak iya nyadi anak tuai enda entu berega ba iya.
Nota Kaki
^ Rambai jaku tu dikena lebuh sesiku orang mati.
^ Rambai jaku tu dikena lebuh sesiku orang mati.
^ Tauka engka, “Sida deka bemunsuh enggau bala menyadi sida.”
^ Reti nya “Bebulu.”
^ Reti nya “Iya ke Megai Tumbit; Iya ke Ngambi Penuduk.”
^ Tauka “Lelak.”
^ Reti nya “Mirah.”
