Pemungkal 26:1-35
26 Lapar pungkang nyadi baru, baka ke kala nyadi maya jeman Abraham menya. Nya alai, Isak mansang ngagai Abimelek, raja orang Pilistin, ba Gerar.
2 Udah nya, Jehovah ngayanka Diri ngagai Isak lalu bejaku: “Anang ngagai Ejip. Diau meh ba menua ke ditunjukka Aku ngagai nuan.
3 Diau meh nyadi orang asing ba menua tu. Aku deka terus nulung nuan sereta merekatka nuan. Aku deka meri semua menua tu ngagai nuan sereta bala peturun nuan. Lalu Aku deka ngamatka sumpah ke udah digaga Aku enggau apai nuan Abraham, iya nya:
4 ‘Aku deka ngasuh peturun nuan nambah belipat kali ganda, baka bintang ba langit. Aku deka meri semua menua tu ngagai peturun nuan, lalu nengah peturun nuan semua bansa ba dunya deka bulih berekat.’*
5 Aku ngereja nya ketegal Abraham ngasika Aku sereta terus nitihka peneka Aku, pesan Aku, atur Aku, enggau adat Aku.”
6 Nya alai, Isak terus diau ba Gerar.
7 Rebekah nya indu ke bajik. Lebuh orang ke lelaki ba endur nya majak nanya pasal Rebekah, Isak madahka Rebekah nya menyadi iya. Iya irau enggaika sida ke lelaki nya munuh iya lalu ngambi Rebekah, enti iya madahka Rebekah nya bini iya.
8 Pengudah sesiti timpuh, Raja Abimelek merening ke luar jenila lalu tepedaka Isak enggau Rebekah benung beberap.
9 Abimelek lalu ngangauka Isak. Ku iya: “Iya bini nuan! Nama kebuah nuan madahka iya menyadi nuan?” Ku Isak nyaut: “Aku nyebut munyi nya laban aku takut enggaika sida ke lelaki munuh aku lalu ngambi iya.”
10 Ku Abimelek agi: “Nama kebuah nuan ngereja utai nya ngagai kami? Enti siku ari sida ke lelaki nya tinduk* enggau bini nuan, nuan ngasuh kami bedosa!”
11 Udah nya, Abimelek meri pesan ngagai semua rayat iya: “Barang sapa ke ngereja utai ti jai ngagai lelaki tu enggau bini iya, deka dibunuh!”
12 Isak nabur benih ba menua nya. Lalu ba taun nya, iya bulih 100 kali lipat ari utai ke ditanam iya, laban Jehovah merekatka iya.
13 Isak nyadi kaya, lalu utai ke diulih iya majak mayuh.
14 Iya bisi mayuh bedus, sapi, enggau orang gaji. Lalu tu ngasuh orang Pilistin dengki ngagai iya.
15 Nya alai, orang Pilistin ngisi semua telaga ke udah ditumbak bala ulun Abraham ngena tanah. Semua telaga nya ditumbak sida maya Abraham agi idup menya.
16 Udah nya, ku Abimelek bejaku enggau Isak: “Pindah nuan ari menua kami, laban nuan nyau majak kering ari kami.”
17 Nya alai, Isak pan pindah ari menua nya lalu nirika kem ba kawasan lebak ba Gerar, lalu diau dia.
18 Isak numbak baru telaga-telaga ke udah ditambun orang Pilistin pengudah Abraham mati. Telaga nya ditumbak maya apai iya Abraham agi idup menya. Telaga-telaga nya diberi nama nitihka nama ke udah diberi apai iya suba.
19 Lebuh bala ulun Isak numbak tanah ba lebak nya, sida tetemuka siti telaga.
20 Bala pengibun bedus ari Gerar belaya enggau bala pengibun bedus Isak. Ku sida: “Telaga kami nya!” Nya alai Isak meri telaga nya nama Esek,* laban sida udah belaya enggau iya.
21 Sida lalu numbak siti agi telaga. Tang sida mega belayaka telaga nya. Nya alai, Isak meri telaga nya nama Sitnah.*
22 Udah nya, iya pindah ari endur nya lalu numbak siti da agi telaga. Tang kali tu, sida enda belayaka telaga nya. Nya alai, iya meri telaga nya nama Rehobot.* Ku Isak: “Terima kasih ngagai Jehovah, ke udah meri kitai endur ti besai sereta merekatka kitai enggau mayuh peturun.”
23 Udah nya, iya angkat ari endur nya lalu mupuk ngagai Beer-sheba.
24 Malam nya, Jehovah ngayanka Diri ngagai Isak lalu bejaku: “Aku tu Petara apai nuan, Abraham. Anang takut, laban Aku bisi enggau nuan. Aku deka merekatka nuan, lalu ngasuh peturun nuan nambah belipat kali ganda ketegal semaya Aku enggau nembiak Aku, Abraham.”
25 Nya alai, Isak ngaga siti alta ba dia, lalu ngangauka nama Jehovah. Udah nya, iya nirika langkau kain iya ba dia, lalu bala ulun iya numbak siti da agi telaga.
26 Pengudah sesiti timpuh, Abimelek datai ari Gerar, betemu enggau Isak. Abimelek datai enggau Ahusat, penasihat iya,* sereta Pikol, ketuai soldadu iya.
27 Isak lalu nanya: “Nama kebuah kita datai kitu betemu enggau aku? Endaka kita begedika aku, lalu kita empu ke udah muru aku ari menua kita?”
28 Ku sida nyaut: “Kami udah meda Jehovah bisi enggau nuan. Nya alai, kami deka ngaga sempekat enggau nuan, lalu nuan patut besumpah
29 enda ngereja utai ti jai ngagai kami, baka kami ke enda ngereja utai ti jai ngagai nuan. Lebuh kami ngasuh nuan pindah suba, kami ngereja nya enggau chara ti manah. Kami nemu Jehovah udah merekatka nuan.”
30 Udah nya, Isak nyediaka pemakai ke sida, lalu sida pan makai enggau ngirup.
31 Pagi hari siti, sida dani tumu lalu besumpah enggau pangan diri. Udah nya, Isak meda sida mupuk, lalu semua sida beserara enggau ati ti manah.
32 Sehari nya mega, bala ulun Isak datai lalu madah ngagai iya pasal telaga ke udah ditumbak sida. Ku sida: “Kami udah tetemuka ai!”
33 Nya alai, iya ngangauka telaga nya Shibah. Nya meh kebuah kuta nya dikumbai Beer-sheba nyentukka seharitu.
34 Lebuh Esau beumur 40 taun, iya jadi enggau Judit anak Beeri, enggau Basemat anak Elon. Seduai iya indu orang Het.
35 Seduai iya balat amat ngenusahka ati Isak enggau Rebekah.
Nota Kaki
^ Tauka “deka ngulihka berekat ke diri empu.”
^ Tauka “besetubuh.”
^ Reti nya “Belaya.”
^ Reti nya “Nuduh.”
^ Reti nya “Endur ti Besai.”
^ Tauka “penyanding penemu iya.”
