Pemungkal 27:1-46
27 Lebuh Isak nyau tuai lalu enda ulih meda agi, iya ngangauka anak tuai iya Esau, lalu bejaku enggau iya: “Anak!” Ku Esau nyaut: “Tu aku, apai.”
2 Ku Isak agi: “Aku tu udah tuai lalu aku deka mati enda lama da agi.
3 Diatu, ambi panah enggau anak panah nuan, lalu mupuk ngasu jelu ke aku.
4 Udah nya, panduk pemakai ke dikerinduka aku lalu bai kitu. Aku deka makai iya lalu merekatka nuan sebedau aku mati.”
5 Esau pan mupuk ngasu jelu ngambika bisi dibai pulai. Rebekah bisi ninga randau entara Isak enggau Esau.
6 Nya alai, Rebekah madah ngagai Jakop: “Tadi, aku bisi ninga apai nuan bejaku enggau menyadi nuan Esau. Ku apai nuan,
7 ‘Alai ngasu, lalu panduk pemakai ti nyamai ke aku. Udah nya, aku deka makai pemakai nya, lalu merekatka nuan ba mua Jehovah sebedau aku mati.’
8 Nya alai anak, dingaka enggau manah lalu kereja utai ke diasuh aku.
9 Alai ngagai raban jelu lalu bai dua iku kambin ke biak sereta gemu. Aku deka manduk pemakai ti nyamai ke dikerinduka apai nuan.
10 Udah nya, bai pemakai nya ngagai apai nuan ngambika iya makai nya, lalu merekatka nuan sebedau iya mati.”
11 Jakop madah ngagai indai iya: “Tubuh Esau bebulu, tang tubuh aku enda bebulu.
12 Baka ni enti apai negu aku? Tentu iya ngumbai aku ngemelika iya! Ari ke merekatka aku, iya nyau nyumpah aku.”
13 Disaut indai iya: “Anang irau anak. Awakka aku ditinggang sumpah nya! Kereja aja utai ke diasuh aku. Alai, ambi kambin nya.”
14 Nya alai, Jakop ngambi kambin dua iku nya lalu mai kambin nya ngagai indai iya. Indai iya pan manduk pemakai ke dikerinduka Isak.
15 Udah nya, Rebekah tama ngagai langkau kain iya, ngambi gari Esau ti pemadu manah, lalu ngerasukka gari nya ba Jakop.
16 Rebekah mega ngengkahka kulit anak kambin ke bisi bulu ba lengan Jakop enggau ba rekung Jakop ti nadai bulu.
17 Udah nya, iya meri pemakai nya sereta roti ke digaga iya ngagai Jakop.
18 Jakop mai pemakai nya ngagai apai iya, lalu madah: “Apai!” Ku Isak nyaut: “Au, anak. Nuan tu Esau tauka Jakop?”
19 Disaut Jakop: “Aku tu Esau, anak tuai nuan. Aku udah ngereja utai ke diasuh nuan. Duduk meh, ngambika nuan ulih makai dagin ke dibai aku lalu merekatka aku.”
20 Ku Isak: “Jampat amat nuan bulih jelu nya, anak.” Disaut Jakop: “Jehovah, Petara nuan, udah nulung aku bulih jelu nya.”
21 Ku Isak bejaku: “Datai semak anak, ngambika aku ulih negu nuan. Aku deka nemu sekalika nuan amat-amat Esau tauka ukai.”
22 Nya alai, Jakop mansang semak ngagai apai iya Isak, lalu Isak negu iya. Ku Isak: “Nyawa nuan munyi nyawa Jakop, tang lengan nuan baka lengan Esau.”
23 Isak ngumbai Jakop nya Esau, laban lengan iya bebulu baka lengan Esau. Nya alai, Isak pan merekatka iya.
24 Udah nya, Isak nanya baru: “Amat-amat Esau nuan?” Disaut Jakop: “Au.”
25 Udah nya ku Isak: “Bai kitu dagin nya anak, ngambika aku ulih makai iya, lalu merekatka nuan.” Nya alai, Jakop pan mai pemakai nya enggau wain ngagai apai iya, lalu apai iya pan makai enggau ngirup.
26 Udah nya, ku Isak madah ngagai iya: “Kitu meh anak, lalu sium meh aku.”
27 Nya alai, Jakop mansang semak ngagai apai iya lalu nyium iya. Isak ulih nyium bau gari ke dikena anak iya. Nya alai, iya merekatka Jakop. Ku iya:
“Pemanah bau anak aku baka bau padang ke udah diberekatka Jehovah.
28 Awakka Petara ti bendar meri nuan ambun ari langit enggau tanah ti subur. Awakka Petara meri nuan mayuh asil ari tanah enggau wain ti baru.
29 Awakka orang betuaika nuan, lalu awakka bansa-bansa nunduk ngagai nuan. Nyadi meh tuan atas kaban belayan nuan, lalu awakka sida nunduk ngagai nuan. Tulah meh sida ke nyumpah nuan, lalu sida ke merekatka nuan deka diberekat.”
30 Pengudah Isak merekatka Jakop, Jakop ninggalka apai iya. Jakop baru udah mupuk lebuh Esau pulai ngasu.
31 Esau mega manduk pemakai lalu mai pemakai nya ngagai apai iya. Ku iya: “Duduk meh apai, lalu empa meh dagin ke dibai aku ngambika apai ulih merekatka aku.”
32 Ku Isak nanya: “Sapa nuan?” Disaut Esau: “Aku tu, anak tuai nuan, Esau.”
33 Isak berasai kesal lalu belabuh getar-getar. Ku iya nanya: “Enti pia, sapa ke ngasu jelu lalu mai dagin nya ngagai aku tadi? Aku udah makai dagin nya sebedau nuan datai. Aku udah merekatka orang nya, lalu aku enda ulih ngubah nya agi.”
34 Pengudah ninga nya, Esau lalu nyabak enggau inggar. Ku iya bejaku ngagai apai iya: “Apai, berekatka aku mega!”
35 Ku Isak nyaut: “Menyadi nuan udah nipu aku ngambika iya bulih berekat ke patut diempu nuan.”
36 Nya alai ku Esau: “Patut nama iya Jakop,* laban dua kali iya udah ngambi penuduk aku. Iya udah ngambi hak aku nyadi anak tuai, lalu diatu, iya udah ngambi berekat aku!” Ku iya agi: “Kati nuan nadai ngalau berekat ke aku?”
37 Ku Isak nyaut: “Aku udah ngaga iya nyadi tuan nuan, lalu semua kaban belayan iya nyadi ulun iya. Aku mega udah meri iya mayuh pemakai enggau wain ti baru. Nama agi utai ke ulih diberi aku ngagai nuan, anak?”
38 Ku Esau bejaku ngagai apai iya: “Kati nuan nadai berekat ke bukai? Berekatka meh aku, apai!” Udah nya, Esau nyabak enggau inggar.
39 Ku Isak nyaut iya:
“Endur nuan diau, nadai tanah ti subur, lalu nadai ambun ari langit.
40 Nuan deka beridup ngena pedang seumur idup nuan, lalu nuan deka bekereja ke menyadi nuan. Tang lebuh nuan enda tan agi, nuan deka ngelepaska diri ari nyadi ulun menyadi nuan.”*
41 Nya alai, Esau begedika Jakop laban apai iya udah meri berekat nya ngagai Jakop. Esau suah bejaku dalam ati iya: “Enda lama da agi, apai deka mati. Udah nya, aku deka munuh Jakop!”
42 Lebuh bisi orang madah ngagai Rebekah pasal utai ke deka dikereja Esau, Rebekah beguai-guai ngangauka Jakop lalu madah ngagai iya: “Esau deka malas dendam lalu munuh nuan!
43 Nya alai anak, kereja utai ke diasuh aku. Rari nuan ke Haran, lalu giga menyadi aku Laban.
44 Diau meh enggau iya enda lama, sampai Esau badu agi ringat.
45 Enti iya enda agi ringat ngagai nuan, lalu enda agi ingatka utai ke udah dikereja nuan ngagai iya, nya baru aku deka ngasuh orang ngambi nuan pulai kitu. Aku enggai lenyau dua iku anak aku ba hari ti sama.”
46 Rebekah suah madah ngagai Isak: “Dua iku indu orang Het nya ngasuh pengidup aku tusah. Enti Jakop kawin enggau indu ba menua tu, ke baka dua iku indu nya, manah agi aku mati!”
Nota Kaki
^ Reti nya “Iya ke Megai Tumbit; Iya ke Ngambi Penuduk.”
^ Jaku Asal, “nuan deka matahka tangkun iya ba rekung nuan.”
