Pemungkal 28:1-22
28 Nya alai Isak ngangauka Jakop, merekatka iya, lalu madah: “Nuan enda tau ngambi indu ari menua Kanaan nyadika bini nuan.
2 Alai, mansang nuan ngagai Padan-aram, ngagai rumah aki nuan Bituel, lalu ambi siku ari anak indu aya nuan Laban nyadika bini nuan.
3 Petara ti Pemadu Bekuasa deka merekatka nuan, lalu meri nuan mayuh peturun. Nuan deka nyadi apai ke mayuh bengkah bansa.
4 Baka Iya ke udah merekatka Abraham, Iya mega deka merekatka nuan enggau bala peturun nuan. Nuan deka ngempu menua tu, ke alai nuan diau nyadi orang asing. Menua tu udah disemayaka Petara ngagai Abraham.”
5 Isak lalu ngasuh Jakop mupuk. Jakop lalu mupuk ngagai Laban, anak Bituel, orang Aram, ba Padan-aram. Laban nya menyadi Rebekah. Rebekah nya indai Jakop seduai Esau.
6 Esau nemu pasal Isak ke udah merekatka Jakop, lalu ngasuh iya ngagai Padan-aram ngiga indu nyadika bini. Iya mega nemu, lebuh Isak merekatka Jakop, Isak madah: “Anang ngambi indu ari menua Kanaan nyadika bini nuan.”
7 Esau beratika Jakop ngasika apai indai iya, lalu mupuk ngagai Padan-aram.
8 Nya baru Esau nemu, apai iya Isak enda rinduka indu orang Kanaan.
9 Nya alai, Esau betemu enggau Ismail, anak Abraham, lalu ngambi Mahalat, anak indu Ismail, nyadika bini. Mahalat nya menyadi indu Nebaiot. Maya nya, Esau endang udah bisi bini ke bukai.
10 Jakop ninggalka Beer-sheba lalu mupuk ngagai Haran.
11 Lebuh iya datai ba siti tempat, mata panas udah padam. Nya alai iya bemalam ba dia. Iya ngambi sigi batu nyadika panggal iya, lalu gali.
12 Udah nya, Jakop bemimpi. Dalam mimpi iya, iya meda siti tangga ba dunya, lalu ujung tangga nya sampai ke serega. Lalu bala melikat nurun niki nengah tangga nya.
13 Jakop meda Jehovah ba atas tangga nya. Ku Petara:
“Aku tu Jehovah, Petara aki nuan Abraham enggau Petara apai nuan Isak. Aku deka meri menua ti alai nuan gali tu ngagai nuan enggau ngagai peturun nuan.
14 Peturun nuan deka ngemayuh pasir ba dunya, lalu ngachir ngagai barat nyentukka timur, sereta ngagai utara nyentukka selatan. Semua bansa ba dunya deka bulih berekat* nengah nuan sereta peturun nuan.
15 Aku deka seruran enggau nuan lalu nyaga nuan, enda ngira kini ke penunga nuan. Aku deka mai nuan pulai baru ngagai menua tu. Aku enda sekali-kali ninggalka nuan nyentukka Aku ngamatka semaya Aku enggau nuan.”
16 Udah nya Jakop tedani, lalu bejaku: “Baru diatu aku nemu Jehovah bisi ba tempat tu.”
17 Jakop berasai tekenyit sereta alit ati. Ku iya bejaku: “Tempat tu enda baka tempat ke bukai. Iya tempat ke kudus. Tu tentu rumah Petara sereta pintu penama serega.”
18 Pagi hari siti, Jakop dani tumu. Iya ngambi batu ti udah nyadika panggal iya, lalu nirika batu nya nyadika batu pengingat. Udah nya, iya nuang minyak ba atas batu nya.
19 Nya alai, Jakop meri tempat nya nama Bethel.* Tang sebedau nya, kuta ke semak Bethel nya dikumbai Lus.
20 Jakop lalu ngaga siti sumpah. Ku iya: “Enti Petara seruran enggau aku lalu nyaga aku dalam pejalai aku sereta meri aku pemakai enggau gari,
21 lalu aku ulih pulai enggau selamat ngagai rumah apai aku, enggau nya, aku nemu, Jehovah endang Petara aku.
22 Batu pengingat ti udah didirika aku tu deka nyadi rumah Petara, lalu aku deka meri Nuan 10 peratus ari semua utai ti diberi Nuan ngagai aku.”
