Pemungkal 29:1-35
29 Udah nya, Jakop neruska pejalai iya lalu mansang ngagai menua ba timur.
2 Iya lalu tepedaka siti telaga ba padang, lalu telaga nya ditutup ngena sigi batu ti besai. Semak telaga nya bisi tiga raban bedus ke benung berehat. Bala pengibun bedus suah meri ai ari telaga nya ngagai raban bedus sida.
3 Lebuh semua raban bedus udah dibai kia magang, nya baru bala pengibun bedus nginsitka batu nya ke tisi, lalu meri raban bedus nya ngirup. Udah nya, sida nutup telaga nya ngena batu nya baru.
4 Ku Jakop nanya bala pengibun bedus nya: “Ari ni kita tu?” Ku sida nyaut: “Ari Haran.”
5 Iya nanya sida baru: “Kati kita ngelala Laban, uchu Nahor?” Ku sida nyaut iya: “Ngelala.”
6 Ku iya agi: “Kati iya gerai?” Ku sida nyaut: “Au, gerai iya. Nyin anak indu iya Rachel, ke mai raban bedus iya.”
7 Ku Jakop madah: “Hari agi siang. Bedau maya alai mai raban bedus nya pulai ngagai kandang. Beri sida ngirup, lalu awakka sida makai rumput ba padang.”
8 Disaut sida: “Kami enda tau ngereja nya. Semua raban bedus patut dibai kitu magang. Udah nya, batu kena nutup telaga nya dikinsit ke tisi. Nya baru kami ulih meri bedus nya ngirup.”
9 Lebuh Jakop agi benung bejaku enggau sida, Rachel datai mai raban bedus apai iya. Rachel nya siku pengibun bedus.
10 Iya anak Laban. Laban nya menyadi Rebekah, lalu Rebekah nya indai Jakop. Lebuh Jakop meda Rachel mai raban bedus apai iya, Jakop lalu beguai-guai nginsitka batu ba atas telaga nya ke tisi, lalu meri raban bedus nya ngirup.
11 Udah nya, Jakop nyium Rachel lalu belabuh nyabak enggau inggar.
12 Jakop madahka diri kaban belayan ari sepiak apai iya, lalu iya nya anak Rebekah. Nya alai, Rachel belanda pulai lalu madah pasal utai nya ngagai apai iya.
13 Lebuh Laban ninga pasal Jakop, anak menyadi iya bisi datai, iya lalu belanda deka betemu enggau Jakop. Iya merap sereta nyium Jakop, lalu mai Jakop ngagai rumah iya. Udah nya, Jakop madah pasal semua utai ke udah nyadi ngagai Laban.
14 Ku Laban bejaku enggau iya: “Kitai endang diri sebilik.” Nya alai, Jakop lalu diau enggau iya pengelama sebulan.
15 Ku Laban bejaku enggau Jakop: “Taja pan nuan kaban belayan aku, enggai nyadi ga aku enda meri nuan upah enti nuan gawa ke aku. Padahka ngagai aku, nama upah ke dikedekaka nuan?”
16 Laban bisi dua iku anak indu. Iya ke tuai nya Leah, lalu ke biak nya Rachel.
17 Rachel nya indu ke bajik gamal, tang Leah enda ngemajik Rachel.
18 Jakop jatuh cinta enggau Rachel. Nya alai ku iya: “Aku sanggup bekereja ke nuan tujuh taun ngambika aku ulih jadi enggau Rachel, anak nuan ke biak.”
19 Ku Laban nyaut: “Manah agi iya jadi enggau nuan, ari ke jadi enggau orang bukai. Diau meh enggau aku.”
20 Jakop bekereja pengelama tujuh taun ngambika ulih jadi enggau Rachel. Tang ba iya, tujuh taun nya baka beberapa hari aja ketegal iya ka ke Rachel.
21 Udah nya, Jakop bejaku enggau Laban: “Timpuh tujuh taun alai aku gawa ke nuan udah abis.* Beri Rachel ngagai aku ngambika aku ulih jadi* enggau iya.”
22 Nya alai, Laban ngatur pengerami kawin lalu ngangauka semua orang ngagai pengerami nya.
23 Tang maya malam hari, Laban nganjung Leah ngagai Jakop ngambika Jakop besetubuh* enggau Leah.
24 Laban bisi siku ulun indu ke benama Silpah. Iya meri ulun nya ngagai Leah.
25 Pagi hari siti, nya baru Jakop nemu indu ke enggau iya jadi nya Leah. Ku iya bejaku enggau Laban: “Nama kebuah nuan nipu aku? Aku udah gawa ke nuan ngambika ulih jadi enggau Rachel.”
26 Disaut Laban: “Nitihka adat kami ditu, anak ke biak enda tau kawin dulu ari anak ke tuai.
27 Abiska dulu pengerami kawin enggau Leah sepemanjai minggu tu. Udah nya, aku deka meri Rachel nyadika bini nuan. Tang nuan mesti gawa ke aku tujuh taun da agi.”
28 Jakop pan setuju, lalu ngabiska minggu nya begulai enggau Leah. Udah nya, Laban meri Rachel nyadika bini Jakop.
29 Laban mega bisi ulun indu ke benama Bilhah. Iya meri ulun nya ngagai Rachel.
30 Jakop mega besetubuh enggau Rachel, lalu iya balat agi sayauka Rachel ari Leah. Udah nya, Jakop gawa ke Laban tujuh taun da agi.
31 Lebuh Jehovah meda Jakop enda entu sayauka Leah, Iya ngasuh Leah ulih beranak, tang Rachel mandul.
32 Leah pan ngandung lalu ngadaka siku anak lelaki. Iya meri anak nya nama Reuben.* Ku iya madah: “Jehovah udah meda pemerinsa aku, lalu diatu, laki aku deka belabuh sayauka aku.”
33 Udah nya, Leah ngandung baru lalu ngadaka siku anak lelaki. Iya meri anak nya nama Simion.* Ku iya: “Jehovah udah ningaka sampi aku, lalu Iya nemu aku enda dikesayau. Nya alai, Iya meri aku anak tu.”
34 Leah ngandung baru lalu ngadaka siku agi anak lelaki. Iya meri anak nya nama Lewi.* Ku iya: “Diatu, laki aku enda ulih ninggalka aku laban aku udah ngadaka tiga iku anak lelaki ke iya.”
35 Udah nya, Leah ngandung baru lalu ngadaka siku agi anak lelaki. Ku iya: “Kali tu, aku deka muji Jehovah.” Nya alai, iya meri anak nya nama Judah.* Udah nya, iya ngetu beranak.
Nota Kaki
^ Jaku Asal, “Timpuh aku udah chukup.”
^ Tauka “besetubuh.”
^ Iya nya, pengawa seks entara siku lelaki enggau siku indu.
^ Reti nya “Peda, Siku Anak Lelaki!”
^ Reti nya “Ninga.”
^ Reti nya “Terikat.”
^ Reti nya “Iya ke Dipuji.”
