Pemungkal 30:1-43
30 Lebuh Rachel meda diri lalu bedau bisi anak, iya chemburu ngagai menyadi iya. Ku iya madah ngagai Jakop: “Beri aku anak! Enti enda, manah agi aku mati!”
2 Jakop lalu ringat ngagai Rachel. Ku iya: “Nama aku tu Petara? Iya ke ngasuh nuan enda ulih beranak!”
3 Ku Rachel: “Tu iya Bilhah, ulun indu aku. Tinduk* meh enggau iya, ngambika iya ulih ngadaka anak ke aku. Lalu anak iya deka nyadi anak aku.”
4 Rachel pan meri ulun iya Bilhah ngagai Jakop nyadika bini, lalu Jakop besetubuh* enggau Bilhah.
5 Bilhah pan ngandung lalu ngadaka siku anak lelaki ke Jakop.
6 Rachel meri anak nya nama Dan.* Ku iya: “Petara udah nyadi hakim aku, lalu Iya udah ninga sampi aku. Nya alai, Iya meri aku siku anak lelaki.”
7 Bilhah ngandung baru lalu ngadaka anak lelaki ti kedua ke Jakop.
8 Udah nya ku Rachel: “Aku udah bebendar bepekit enggau menyadi aku. Lalu diatu, aku udah menang!” Nya alai, iya meri anak nya nama Naptali.*
9 Lebuh Leah meda diri lama udah enda beranak, iya meri ulun iya Silpah ngagai Jakop nyadika bini.
10 Silpah pan ngadaka siku anak lelaki ke Jakop.
11 Ku Leah: “Aku udah diberekat!” Nya alai, iya meri anak nya nama Gat.*
12 Udah nya, Silpah ngadaka anak ti kedua ke Jakop.
13 Ku Leah: “Aku amat gaga ati! Sida ke indu deka ngumbai aku gaga ati.” Nya alai, iya meri anak nya nama Aser.*
14 Maya musin ngetau gandum, Reuben bejalai ba ladang lalu tetemuka siti bansa buah.* Iya mai buah nya ngagai indai iya Leah. Udah nya, ku Rachel bejaku ngagai Leah: “Beri aku mimit buah ke ditemu anak nuan nya.”
15 Ku Leah: “Nuan udah ngambi laki aku! Diatu, buah ke ditemu anak aku pan ka diambi nuan!” Ku Rachel nyaut: “Enti pia, malam tu Jakop tinduk enggau nuan. Lalu nuan meri aku buah nya.”
16 Maya lemai hari, lebuh Jakop pulai ari ladang, Leah betemu enggau iya lalu madah: “Nuan tinduk enggau aku malam tu, laban aku udah meli nuan ngena buah ke ditemu anak aku.” Nya alai, Jakop besetubuh enggau Leah malam nya.
17 Petara lalu nyaut sampi Leah. Leah pan ngandung lalu ngadaka anak lelaki ti kelima ke Jakop.
18 Ku Leah: “Petara udah meri aku upah, laban aku udah nyerahka ulun aku ngagai laki aku.” Nya alai, iya meri anak nya nama Isakar.*
19 Leah ngandung baru lalu ngadaka anak lelaki ti keenam ke Jakop.
20 Ku Leah: “Petara udah meri aku hadiah ti berega. Laki aku tentu deka nerima aku, laban aku udah ngadaka enam iku anak lelaki ke iya.” Nya alai, iya meri anak nya nama Sebulun.*
21 Iya mega ngadaka siku anak indu, lalu meri iya nama Dinah.
22 Udah nya, Petara ingatka Rachel. Iya ningaka sampi Rachel lalu nyaut sampi iya. Nya alai, Rachel pan ulih ngandung.
23 Rachel ngandung lalu ngadaka siku anak lelaki. Ku iya: “Petara udah muai utai ke ngasuh aku malu.”
24 Nya alai, iya meri anak nya nama Josep,* lalu ku iya: “Jehovah udah nambah siku da agi anak lelaki ke aku.”
25 Pengudah Rachel ngadaka Josep, ku Jakop bejaku ngagai Laban: “Awakka aku pulai ngagai menua aku sereta ruang bilik aku.
26 Awakka aku mai semua bala anak bini aku. Diatu sida enggi aku, laban aku udah abis gawa ke nuan. Nuan empu nemu, aku udah bebendar gawa ke nuan.”
27 Udah nya, ku Laban bejaku ngagai Jakop: “Aku minta nuan terus meh diau enggau aku, laban aku udah meda tanda* ke nunjukka Jehovah merekatka aku ketegal nuan.”
28 Ku Laban agi: “Sebut aja upah nuan, lalu aku deka mayar nuan.”
29 Jakop nyaut: “Nuan empu nemu aku udah bebendar gawa ke nuan, lalu aku udah nyaga bala jelu nuan enggau manah.
30 Utai ke dikemisi nuan mimit aja sebedau aku datai. Tang diatu, bala jelu nuan majak mayuh. Jehovah udah merekatka nuan kenyau ari aku datai kitu. Diatu, awakka aku ngulihka utai ke ruang bilik aku empu.”
31 Ku Laban: “Nama utai ke patut diberi aku ngagai nuan?” Jakop nyaut: “Nuan enda ibuh meri aku nama-nama utai. Enti nuan setuju enggau peminta aku, nya baru aku deka nyaga sereta ngintu bala jelu nuan.
32 Seharitu, aram tua bejalai ngagai raban jelu nuan. Nuan patut nyeraraka semua bedus enggau kambin ti indu ke betumpuk sereta bebintik ari raban sida. Seraraka mega anak bedus ti lelaki ke bewarna coklat. Semua jelu nya deka nyadi upah aku.
33 Dudi hari, enti nuan tepedaka bisi bedus sereta kambin ti indu ke enda betumpuk sereta enda bebintik, tauka anak bedus ti lelaki ke enda bewarna coklat, reti nya aku udah ngenchuri jelu ari nuan. Tang, nuan empu deka meda aku sigi jujur enggau nuan.”
34 Laban nyaut: “Au meh. Aku nitihka utai ku nuan.”
35 Ba hari nya, Laban nyeraraka kambin ti lelaki ke bebelang sereta betumpuk, semua kambin ti indu ke bebintik sereta betumpuk, semua kambin ti betumpuk burak, enggau semua anak bedus ti lelaki ke bewarna coklat. Iya ngasuh bala anak lelaki iya nyaga semua bala jelu nya.
36 Udah nya, Laban mai bala jelu nya jauh ari Jakop penyauh tiga hari pejalai. Bala jelu Laban ke bukai, ke agi tinggal, dijaga Jakop.
37 Jakop ngambi dan kayu storaks,* kayu almond, enggau kayu platanus ke baru diputung, lalu ngupak kulit dan kayu nya sampai begian burak ke betumpuk ulih dipeda.
38 Udah nya, iya ngengkahka dan kayu ke udah dikupak nya ba endur bala jelu nya ngirup. Lebuh sida datai ngirup, lalu meda dan kayu nya, sida deka mengawan.
39 Nya alai, bala jelu nya mengawan ba depan dan kayu nya, lalu sida deka ngadaka anak ke bebelang, ke bebintik, enggau ke betumpuk.
40 Udah nya, Jakop nyeraraka anak bedus ti lelaki ari anak bedus ke bukai. Jakop lalu ngengkahka anak bedus ti lelaki nya ba depan bala jelu Laban, ngambika bala jelu Laban ulih meda jelu ke bebelang sereta bewarna coklat nya. Udah nya, iya nyeraraka bala jelu iya empu ngambika enda bechampur enggau bala jelu Laban.
41 Tiap kali jelu ke kering deka mengawan, Jakop ngengkahka dan kayu nya ba endur sida ngirup. Enggau nya, sida deka mengawan semak enggau dan kayu nya.
42 Tang lebuh jelu ke lemi deka mengawan, iya enda ngengkahka dan kayu nya ba endur sida ngirup. Nya alai, anak jelu ke lemi enggi Laban, tang anak jelu ke kering enggi Jakop.
43 Jakop nyadi majak kaya-sekaya. Iya bisi mayuh kambin, bedus, unta, keledai, sereta ulun lelaki enggau indu.
Nota Kaki
^ Tauka “Besetubuh.”
^ Iya nya, pengawa seks entara siku lelaki enggau siku indu.
^ Reti nya “Hakim.”
^ Reti nya “Aku Udah Bebendar Bepekit.”
^ Reti nya “Berekat ti Besai.”
^ Reti nya “Gaga; Lantang.”
^ Jaku Asal, “buah dudaim.” Sida ke indu ngumbai buah tu ulih nulung sida ngandung enti sida makai buah tu.
^ Reti nya “Upah Orang ke Dibeli.”
^ Reti nya “Nerima.”
^ Nama pandak Josipiah, ke mai reti “Awakka Jah Nambah.”
^ Tauka “bukti.”
^ Sebengkah pun kayu ke mansutka bungai burak ti bebau rengut.
