Pemungkal 31:1-55
31 Jakop bisi ninga utai ke disebut bala anak Laban. Ku sida: “Jakop udah ngambi semua utai ke enggi apai kitai. Lalu ari nya, iya ngulihka semua pengaya iya.”
2 Jakop mega ulih meda Laban enda agi ngelayan iya enggau manah baka suba.
3 Udah nya, Jehovah bejaku enggau Jakop: “Pulai nuan ngagai menua apai enggau aki nuan, ngagai kaban belayan nuan. Aku deka seruran enggau nuan.”
4 Jakop lalu mesanka Rachel seduai Leah, lalu ngasuh seduai iya datai betemu enggau iya ba padang alai iya ngintu raban jelu iya.
5 Ku iya madah ngagai seduai iya:
“Aku beratika apai seduai enda agi ngelayan aku enggau manah. Tang Petara apai aku bisi enggau aku.
6 Seduai empu nemu, aku udah bebendar gawa ke apai seduai.
7 Iya nguji nipu aku, lalu ngubah upah aku 10 kali. Tang Petara enda ngelakka utai ke dikereja apai seduai nya ngasuh aku rugi.
8 Lebuh apai seduai madahka upah aku nya kambin enggau bedus ke bebintik, semua raban jelu nya deka ngadaka anak ke bebintik. Tang enti iya madahka upah aku nya kambin enggau bedus ke bebelang, semua raban jelu nya deka ngadaka anak ke bebelang.
9 Nyadi, Petara ke majak ngambi raban jelu nya ari apai seduai, lalu meri nya ngagai aku.
10 Bisi sekali maya musin jelu mengawan, aku tinduk lalu bemimpi. Dalam mimpi nya, aku meda kambin ti lelaki enggau kambin ti indu benung mengawan. Kambin ti lelaki nya bebelang, bebintik, enggau betumpuk.
11 Dalam mimpi nya, melikat Petara ti bendar bejaku enggau aku: ‘Jakop!’ Disaut aku: ‘Tu aku.’
12 Ku melikat nya: ‘Peda nuan! Semua kambin ti lelaki ke mengawan nya bebelang, bebintik, enggau betumpuk. Aku ngasuh utai tu nyadi laban Aku udah meda semua utai ti jai ke digaga Laban ngagai nuan.
13 Aku meh Petara ti bendar, ke ngayanka Diri ngagai nuan ba Bethel, endur alai nuan udah nuangka minyak ba batu pengingat, lalu ngaga siti sumpah ngagai Aku. Nya alai, mupuk nuan ari menua tu lalu pulai ngagai menua asal nuan.’”
14 Udah nya, Rachel enggau Leah nyaut iya: “Kami duai nadai agi bulih ungkup ari pesaka apai kami.
15 Iya ngaga kami duai baka orang asing. Iya udah nyual kami duai, lalu duit ke dibayar nuan ngagai iya dikena iya kediri.
16 Semua pengaya ke udah diambi Petara ari apai kami endang enggi kami enggau enggi anak kami. Nya alai, kereja aja sebarang utai ke diasuh Petara.”
17 Udah nya, Jakop nulung bala anak iya enggau bala bini iya nepan raban unta.
18 Iya ngumpul semua raban jelu iya enggau semua utai ke diulih iya ba Padan-aram, lalu mai semua utai nya ngagai Kanaan, menua apai iya Isak.
19 Lebuh Laban udah mupuk nyukur bulu bala bedus iya, Rachel datai ngenchuri patung terafim* ke diempu apai iya.
20 Jakop nunjukka diri pintar agi ari Laban, orang Aram nya, lebuh iya belalai ngerarika diri.
21 Jakop mai ruang bilik iya enggau semua utai ke diempu iya lebuh ngerarika diri. Sida meraka Sungai Eupratis, lalu bejalai tunga ke kawasan gunung ba Gilead.
22 Ba hari ketiga, orang bisi madahka ngagai Laban, Jakop udah rari.
23 Nya alai, Laban lalu mai kaban belayan iya, lalu sida begagaika Jakop. Pengudah tujuh hari, sida tetemuka iya ba kawasan gunung ba Gilead.
24 Malam nya, Petara bejaku enggau Laban dalam mimpi. Ku Petara: “Bejimat nuan enggau utai ke deka disebut nuan ngagai Jakop.”*
25 Jakop udah nirika kem iya ba kawasan gunung ba Gilead. Lalu Laban enggau bala kaban belayan iya mega nirika kem enda jauh ari kawasan nya. Laban lalu mansang betemu enggau Jakop.
26 Ku Laban bejaku enggau Jakop: “Nama kebuah nuan ngereja tu, lalu nabanka anak indu aku baka ke nabanka tawanan perang?
27 Nama kebuah nuan nipu aku, lalu enda madahka diri mupuk? Enti nuan madah, nemu aku ngaga pengerami ke kita enggau gaga ati ngena lagu, tamborin, enggau belikan.*
28 Nuan nadai meri aku peluang nyium bala uchu aku enggau anak indu aku. Salah amat pengawa nuan nya!
29 Enti aku ka, aku ulih ngemediska nuan! Tang malam tadi, Petara apai nuan udah bejaku enggau aku. Ku Iya: ‘Bejimat nuan enggau utai ke deka disebut nuan ngagai Jakop.’
30 Aku nemu nuan mupuk laban nuan keran amat deka pulai ngagai apai nuan. Tang nama kebuah nuan ngenchuri patung* aku?”
31 Ku Jakop nyaut Laban: “Aku enda madahka diri deka mupuk laban aku takut. Ba runding aku, nuan deka ngerampas anak indu nuan ari aku.
32 Enti nuan tetemuka orang ke ngambi patung nuan, awakka orang nya diukum bunuh! Diatu, ba depan kaban belayan tua, peresa meh barang aku lalu ambi meh utai ke enggi nuan.” Tang Jakop enda nemu Rachel ke udah ngenchuri patung nya.
33 Laban lalu tama ngagai langkau kain Jakop, langkau kain Leah, enggau ngagai langkau kain indu ulun ke dua iku. Tang iya nadai tetemuka patung nya. Pengudah iya pansut ari langkau kain Leah, iya pan tama ngagai langkau kain Rachel.
34 Rachel udah ngambi patung terafim nya, lalu nyimpan patung nya ba baruh penuduk* ke dikena lebuh nepan unta. Lalu iya duduk ba atas penuduk nya. Laban nyerungkai langkau kain Rachel, tang nadai tetemuka patung nya.
35 Ku Rachel bejaku enggau apai iya: “Anang ringat apai. Aku enda ulih bediri laban aku benung datai kain.” Laban bebendar ngiga, tang iya nadai tetemuka patung terafim nya.
36 Jakop pan ringat. Ku iya madah ngagai Laban: “Nama penyalah aku? Nama dosa aku nyentukka nuan bendar amat begagaika aku?
37 Nuan udah nyerungkai semua barang aku. Ni utai nuan ti udah ditemu nuan deh? Engkahka utai nya ba depan kaban belayan tua, ngambika sida ulih nentuka sapa entara tua ke betul tauka salah.
38 Dua puluh taun aku udah enggau nuan. Nadai siku pan bedus tauka kambin nuan ke udah gugur anak. Lalu aku nadai kala makai bedus ti lelaki ari raban jelu nuan.
39 Lebuh jelu nuan mati dibunuh jelu liar, aku nadai kala mai bangkai jelu nuan nya ngagai nuan. Aku ke mayar ganti rugi nya! Lebuh jelu nuan dichuri maya siang hari tauka malam hari, nuan selalu minta aku mayar ganti rugi.
40 Maya siang hari, aku diempa panas. Lalu maya malam hari, aku berasai amat chelap nyentukka aku enda ulih tinduk.
41 Udah 20 taun aku diau enggau nuan. Aku udah bekereja 14 taun ke nuan ngambika ulih jadi enggau dua iku anak indu nuan. Lalu aku udah gawa enam taun da agi kena ngulihka raban jelu ari nuan. Nuan mega udah ngubah upah aku 10 kali!
42 Enti Petara apai aku, Petara Abraham enggau Petara ke dikenangika Isak enda enggau aku, nuan tentu udah nejuka aku pulai nadai mai utai. Petara udah meda penusah aku enggau pemagas aku gawa. Nya alai, Iya ngerara nuan malam tadi.”
43 Ku Laban nyaut Jakop: “Sida anak indu aku enggau bala uchu aku. Raban jelu nya mega enggi aku. Semua utai ke dipeda nuan nya enggi aku enggau bala anak indu aku. Enda patut aku deka ngemediska anak indu aku tauka bala anak sida!
44 Aram tua ngaga siti sempekat, lalu sempekat tu deka nyadi baka saksi entara tua.”
45 Nya alai Jakop ngambi sigi batu, lalu nirika batu nya nyadika batu pengingat.
46 Ku Jakop bejaku enggau bala sida ke lelaki:* “Gumpul batu.” Sida pan ngumpul batu, lalu nugungka batu nya. Udah nya sida makai ngelingi tugung batu nya.
47 Laban meri tugung batu nya nama Jegar-sahaduta,* tang Jakop ngangauka tugung batu nya Galeed.*
48 Ku Laban bejaku: “Seharitu, tugung batu tu deka nyadi baka saksi entara nuan enggau aku.” Nya alai, tugung batu nya diberi nama Galeed.
49 Tugung batu nya mega dikumbai Menara Jaga, laban ku iya: “Awakka Jehovah ngemataka nuan enggau aku lebuh tua jauh ari pangan diri.
50 Enti nuan jai enggau anak indu aku lalu bebini baru, taja pan pengawa nuan enda dipeda orang, tang Petara deka meda nya. Petara saksi entara nuan enggau aku.”
51 Ku Laban agi: “Tu tugung batu enggau batu pengingat ke udah didirika tua, kena nunjukka sempekat ke udah digaga entara nuan enggau aku.
52 Tugung batu tu enggau batu pengingat tu deka nyadi saksi. Tua enda tau sekali-kali ngelimpas tugung batu tu, lalu ngemediska pangan diri.
53 Awakka Petara Abraham enggau Petara Nahor, iya nya Petara apai seduai iya, nyadi hakim entara tua.” Jakop pan besumpah atas nama Petara ke dikenangika apai iya Isak.
54 Udah nya Jakop munuh siku jelu, lalu nyerahka nya ngagai Petara ba gunung. Iya lalu mai bala sida makai. Sida pan makai, lalu bemalam ba gunung nya.
55 Pagi hari siti, Laban tumu dani lalu nyium bala uchu iya enggau anak indu iya, lalu merekatka sida. Udah nya, Laban mupuk pulai.
Nota Kaki
^ Tauka “patung ke disembah diri sebilik.”
^ Jaku Asal, “Bejimat nuan ngambika enda nyebut utai ti manah tauka jai ngagai Jakop.”
^ Tauka “harp.” Sebengkah perengka musik ke betali baka gitar, tang gamal iya enda sebaka enggau gitar.
^ Jaku Asal, “petara.”
^ Penuduk ke bansa tu bisi endur alai nyimpan barang.
^ Tauka “bala kaban belayan iya.”
^ Dalam jaku Aram, tu mai reti “Tugung Batu ke Nyadi Saksi.”
^ Dalam jaku Hebrew, tu mai reti “Tugung Batu ke Nyadi Saksi.”
