Pemungkal 32:1-32
32 Jakop neruska pejalai iya, lalu bala melikat datai betemu enggau iya.
2 Lebuh Jakop meda sida, ku iya: “Tu endang kem Petara.” Nya alai, iya meri tempat nya nama Mahanaim.*
3 Udah nya, Jakop ngasuh beberapa iku orang bejalai dulu ari iya ngambika betemu enggau menyadi iya Esau. Esau diau ba Seir, ba kawasan Edom.
4 Ku iya bepesan ngagai sida: “Padahka ngagai tuan aku Esau: ‘Ulun nuan Jakop madahka: “Aku udah lama diau* enggau Laban,
5 lalu diatu aku udah bisi sapi, keledai, bedus, sereta ulun ti lelaki enggau indu. Aku ngirumka pesan tu ngagai nuan, tuan, ngarapka aku ulih ngelantangka ati tuan.”’”
6 Lebuh orang ke dianjung Jakop nya pulai, ku sida madah ngagai iya: “Kami udah betemu enggau menyadi nuan Esau. Diatu, iya benung mansang kitu deka betemu enggau nuan, lalu bisi 400 iku orang enggau iya.”
7 Jakop balat takut sereta irau ati. Nya alai, iya magi bala orang ke enggau iya ngagai dua raban. Tu mega nyengkaum raban bedus, kambin, sapi, enggau unta.
8 Ku iya berunding: “Enti sema Esau datai nyerang siti raban, raban ke siti da agi ulih ngerarika diri.”
9 Udah nya Jakop besampi: “Jehovah, Petara aki aku Abraham enggau Petara apai aku Isak. Nuan udah madah ngagai aku: ‘Pulai nuan ngagai menua apai enggau aki nuan, ngagai kaban belayan nuan, lalu Aku deka merekatka nuan.’
10 Aku enda layak nerima pengerindu Nuan ti setia enggau pemanah ati ti udah diayanka Nuan ngagai aku, ke nyadi nembiak Nuan. Lebuh aku meraka Sungai Jordan, aku semina mai siti tungkat. Tang diatu, ruang bilik aku nyau nyadi dua raban.
11 Aku minta Nuan nyelamatka aku ari menyadi aku Esau. Aku takut enggaika iya nyerang aku, nyengkaum bala sida ke indai enggau anak sida.
12 Nuan udah madahka: ‘Aku deka merekatka nuan, lalu Aku deka meri nuan peturun baka pasir ba tasik, ke enda alah diitung.’”
13 Jakop lalu bemalam ba dia. Udah nya, iya ngambi sekeda ari jelu iya nyadika hadiah ke deka diberi ngagai Esau:
14 200 iku kambin ti indu, 20 iku kambin ti lelaki, 200 iku bedus ti indu, 20 iku bedus ti lelaki,
15 30 iku unta ti agi nusuka anak sama enggau anak sida, 40 iku indu sapi, 10 iku sapi ti lelaki, 20 iku keledai ti indu, enggau 10 iku keledai ti lelaki.
16 Iya lalu magi bala jelu nya ngagai beberapa iti raban ti mit, lalu nyerahka tiap iti raban jelu nya ngagai bala orang gaji iya. Ku iya madah ngagai sida: “Kita meraka sungai dulu, lalu gaga jarak entara raban ti dulu ari raban ti dudi.”
17 Ku iya bepesan ngagai orang gaji iya ke mupuk dulu: “Enti Esau betemu enggau kita, lalu nanya: ‘Sapa tuan kita? Kini ke tunga kita? Sapa ke ngempu semua jelu ba depan nya?’
18 kita patut nyaut: ‘Kami tu orang gaji, ulun nuan Jakop. Semua jelu tu hadiah ke diberi iya ngagai nuan, tuan. Lalu iya empu benung nitihka kami ari belakang.’”
19 Jakop mega meri pesan ti sama ngagai semua orang gaji iya ke mai raban jelu ti bukai. Ku iya madah: “Lebuh kita betemu enggau Esau, nya meh utai ke patut disebut kita ngagai iya.
20 Kita mega patut nyebut: ‘Jakop, ulun nuan, benung nitihka kami ari belakang.’” Iya ngereja nya laban iya ngumbai enti iya nganjung hadiah nya dulu, nya ulih ngasuh Esau badu agi ringat ngagai iya. Lalu lebuh seduai iya betemu baru, Esau engka deka nyambut iya enggau gaga ati.
21 Nya alai, bala orang gaji iya mai hadiah nya meraka sungai dulu. Tang iya empu agi bemalam ba kem.
22 Malam nya, iya angkat lalu mai dua iku bini iya, dua iku indu ulun iya, enggau 11 iku anak lelaki iya meraka Sungai Jabok.
23 Iya mai sida enggau semua utai ke diempu iya meraka sungai nya.
24 Lebuh Jakop kediri, siku lelaki datai lalu bibat ngelaban iya nyentukka hari nyau tawas.
25 Lebuh lelaki nya meda diri enda ulih ngalahka Jakop, iya lalu negu tulang punggung Jakop. Nya alai, tulang punggung Jakop lalu tekinsit.
26 Udah nya, ku lelaki nya bejaku: “Lepaska aku. Hari nyau tawas.” Ku Jakop nyaut: “Berekatka aku dulu. Nya baru aku ngelepaska nuan.”
27 Ku lelaki nya nanya: “Sapa nama nuan?” Disaut Jakop: “Jakop.”
28 Ku lelaki nya madah: “Nama nuan ukai agi Jakop, tang Israel,* laban nuan udah bibat enggau Petara sereta mensia, lalu nuan menang.”
29 Jakop lalu nanya: “Sapa nama nuan?” Tang ku iya nyaut: “Nama kebuah nuan deka nemu nama aku?” Iya lalu merekatka Jakop.
30 Nya alai, Jakop meri tempat nya nama Peniel.* Ku iya madah: “Aku udah betemu enggau Petara, tang aku agi idup.”
31 Lebuh Jakop mansa Penuel,* mata panas baru tumbuh. Iya bejalai pinchat laban punggung iya pedis.
32 Nya alai nyentukka diatu, orang Israel enda makai urat ba pah jelu laban lelaki nya udah negu urat ba tulang punggung Jakop.
Nota Kaki
^ Reti nya “Dua Iti Kem.”
^ Tauka “diau nyadi orang asing.”
^ Reti nya “Iya ke Bibat enggau Petara; Iya ke Bepegai Rat ba Petara” tauka “Petara Bibat.”
^ Reti nya “Mua Petara.”
^ Tauka “Peniel.”
