Pemungkal 33:1-20
33 Jakop meda Esau datai enggau 400 iku bala iya. Nya alai, iya magi bala anak iya entara Leah, Rachel, enggau dua iku indu ulun iya.
2 Iya ngasuh dua iku indu ulun nya enggau anak seduai iya bejalai dulu. Udah nya, Leah enggau bala anak iya. Lalu ba belakang sekali, Rachel enggau Josep.
3 Jakop bejalai dulu ari sida. Iya besugang tujuh kali lebuh iya mansang ngagai menyadi iya.
4 Tang Esau belanda ngagai Jakop, merap iya, lalu nyium iya. Seduai iya sama nyabak.
5 Lebuh Esau meda bala indu enggau bala anak nya, ku iya nanya: “Sapa sida tu?” Disaut Jakop: “Sida bala bini enggau anak ke diberi Petara ngagai aku, ulun nuan.”
6 Udah nya, dua iku indu ulun enggau bala anak seduai iya mansang ke depan lalu besugang.
7 Leah enggau bala anak iya mega mansang ke depan lalu besugang. Kepenudi iya, Josep enggau Rachel mansang ke depan lalu seduai iya mega besugang.
8 Ku Esau nanya: “Aku udah betemu enggau bala orang sereta bala jelu ke dianjung nuan. Nama kebuah nuan ngereja nya?” Disaut Jakop: “Kena ngelantangka ati nuan, tuan.”
9 Ku Esau: “Menyadi, aku empu udah bisi mayuh utai. Simpan nuan aja meh hadiah nya.”
10 Tang ku Jakop: “Anang baka nya. Enti aku udah ngelantangka ati nuan, terima aja meh hadiah nya. Lebuh aku meda mua nuan, aku asaika meda mua Petara, laban nuan udah nyambut aku enggau manah.
11 Ambi aja meh hadiah* nya. Petara udah merekatka aku, lalu meri aku semua utai ke diguna aku.” Jakop majak ngansak Esau ngambi hadiah nya, lalu Esau pan setuju.
12 Udah nya ku Esau: “Aram kitai mupuk, lalu aku deka nguluka kita.”
13 Ku Jakop nyaut: “Tuan, nuan nemu aku bisi anak ke agi mit, lalu aku bisi bedus enggau sapi ke benung nusuka anak sida. Enti semua jelu nya dibai beguai-guai sepemanjai hari, semua sida deka mati magang.
14 Mupuk dulu meh nuan, tuan. Aku deka nitihka nuan belubah-lubah, nitihka pengelaju bala jelu enggau bala anak aku. Udah nya, kami deka betemu enggau nuan ba Seir.”
15 Ku Esau: “Enti pia, awakka aku ninggalka sekeda bala aku enggau nuan.” Disaut Jakop: “Enda ibuh pan. Asal ga aku udah ngelantangka ati tuan, nya udah chukup ba aku.”
16 Nya alai sehari nya, Esau pan pulai ngagai Seir.
17 Jakop mupuk ngagai Sukot. Iya nirika endur diau ke iya empu sereta langkau ke bala jelu iya. Nya kebuah endur nya dikumbai Sukot.*
18 Pengudah mupuk ari Padan-aram, Jakop pan datai ba Shikem enggau selamat. Kuta Shikem nya ba menua Kanaan. Iya nirika kem semak kuta nya.
19 Udah nya, Jakop meli tanah endur alai iya nirika kem nya ari bala anak Hamor enggau rega 100 singkap duit pirak. Shikem nya siku ari anak Hamor.
20 Ba dia, Jakop ngaga siti alta lalu ngangauka alta nya “Petara nya Petara Israel.”
