Pemungkal 34:1-31
34 Dinah, anak Jakop seduai Leah, suah ngiga bala nembiak indu ba kuta* nya lalu begulai* enggau sida.
2 Shikem, anak Hamor, orang Ibi nya, tuai kuta nya. Lebuh iya meda Dinah, iya nabanka Dinah lalu ngerugul iya.
3 Shikem amat-amat ka ke Dinah. Iya jatuh cinta enggau Dinah, lalu ngena jaku ti manis ngambika Dinah ka ke iya.
4 Nya alai, Shikem madah ngagai apai iya Hamor: “Apai, tulung aku ngambi indu tu nyadika bini.”
5 Lebuh Jakop ninga anak indu iya udah dirugul Shikem, maya nya bala anak lelaki iya benung nyaga raban jelu ba padang. Nya alai, Jakop diau diri sampai bala anak iya pulai.
6 Udah nya, Hamor, apai Shikem, datai berandau enggau Jakop.
7 Lebuh bala anak Jakop ninga pasal utai ke nyadi, sida jejampat pulai. Sida balat pedis ati sereta ringat laban Shikem udah ngereja utai ti amat jai. Iya udah ngemaluka Israel laban iya udah ngerugul anak indu Jakop.
8 Ku Hamor bejaku enggau sida: “Anak aku Shikem, amat-amat ka ke anak indu nuan. Awakka meh Dinah nyadi bini anak aku.
9 Awakka bala kita enggau bala kami jadi enggau pangan diri. Kami ulih jadi enggau bala anak indu kita, lalu kita ulih jadi enggau bala anak indu kami.
10 Kita ulih diau enggau kami lalu ngereja nama-nama aja utai ke dikedekaka kita. Kita ulih bedagang, ngulihka reta tengkira, sereta diau ba kuta tu.”
11 Udah nya, Shikem bejaku enggau apai sereta bala menyadi Dinah. Ku iya: “Enti kita setuju, aku deka meri kita sebarang utai ke dipinta kita.
12 Kita ulih minta mayuh duit sereta hadiah ti mar. Aku sanggup meri sebarang utai ke dipinta kita asal ga Dinah ulih nyadi bini aku.”
13 Ketegal Shikem udah ngerugul menyadi sida Dinah, nya alai, bala anak Jakop deka nipu Shikem enggau apai iya Hamor.
14 Ku sida bejaku: “Enggai nyadi kami meri menyadi indu kami ngagai lelaki ke bedau disunat, laban utai nya ngemaluka kami.
15 Kami semina ulih besetuju enti semua bala kita ke lelaki disunat baka kami.
16 Nya baru kita ulih jadi enggau bala anak indu kami, lalu kami jadi enggau bala anak indu kita. Kami deka diau enggau kita, lalu nyadi siti bansa.
17 Tang enti kita enggai nitih utai ku kami lalu enggai disunat, kami deka mai menyadi indu kami lalu mupuk ari tu.”
18 Utai ke disebut sida ngerinduka ati Hamor enggau anak iya Shikem.
19 Ketegal Shikem amat-amat ka ke anak indu Jakop, iya pan terus ngereja utai ke dipinta sida. Tambah mega, iya orang ti pemadu dipebasa dalam ruang bilik apai iya.
20 Hamor enggau anak iya Shikem lalu mansang ngagai pintu penama kuta nya, lalu bejaku ngagai orang ba kuta nya. Ku seduai iya:
21 “Bala orang nya deka begulai manah enggau kitai. Awakka sida diau ditu lalu bedagang, laban kuta kitai chukup besai ke sida. Kitai ulih jadi enggau anak indu sida, lalu sida ulih jadi enggau anak indu kitai.
22 Tang sida semina besetuju diau begulai enggau kitai lalu nyadi siti bansa enggau kitai, enti bala kitai ti lelaki ba kuta tu disunat baka sida.
23 Aram meh kitai besetuju enggau peminta sida ngambika sida diau begulai enggau kitai. Enggau nya, reta sida, pengaya sida, enggau jelu tupi sida deka diempu kitai.”
24 Semua sida ke begumpul ba pintu penama kuta nya besetuju enggau Hamor sereta anak iya Shikem. Lalu semua lelaki ba kuta nya disunat.
25 Pengudah tiga hari disunat, bala lelaki ba kuta nya agi berasai pedis. Maya nya, dua iku anak lelaki Jakop, Simion enggau Lewi, iya nya menyadi Dinah, mansang ngagai kuta nya mai pedang lalu munuh semua lelaki ba kuta nya. Nadai siku pan nyangka seduai iya deka ngereja pengawa nya.
26 Seduai iya munuh Hamor enggau Shikem ngena pedang. Udah nya, seduai iya ngambi Dinah ari rumah Shikem lalu mupuk ari nya.
27 Anak lelaki Jakop ke bukai datai lalu meda bangkai bala lelaki ke udah dibunuh ba kuta nya. Sida lalu ngambi utai ba kuta nya ketegal menyadi indu sida udah dirugul.
28 Sida ngambi raban bedus, kambin, sapi, keledai, enggau semua utai ke bisi ba kuta nya, enggau ke ba padang.
29 Sida mega nabanka bala anak enggau bala bini orang ke dibunuh nya, lalu ngerampas reta sereta utai ba rumah sida.
30 Ku Jakop bejaku enggau Simion seduai Lewi: “Seduai udah ngasuh aku ditinggang penusah.* Diatu, orang ba menua tu, orang Kanaan enggau orang Peris deka begedika aku magang. Bala kitai enda mayuh. Enti sida beserakup nyerang kitai, aku enggau kitai sebilik deka mati magang.”
31 Tang ku seduai iya nyaut: “Sapa ngasuh sida ngaga menyadi kami baka pelacur!”
