Pemungkal 38:1-30
-
Judah enggau Tamar (1-30)
38 Kira-kira maya nya, Judah ninggalka bala menyadi iya lalu nirika langkau kain iya semak Hirah, siku lelaki ari Adulam.
2 Ba dia, Judah meda anak indu Sua. Sua nya orang Kanaan. Judah jadi enggau indu nya, lalu besetubuh* enggau iya.
3 Bini iya ngandung lalu ngadaka siku anak lelaki. Judah meri anak nya nama Er.
4 Bini iya ngandung baru lalu ngadaka siku agi anak lelaki. Anak nya diberi nama Onan.
5 Udah nya, bini iya ngadaka siku da agi anak lelaki, lalu anak nya diberi nama Selah. Judah ba Aksip lebuh bini iya ngadaka anak nya.
6 Judah milih siku indu nyadika bini anak tuai iya Er. Nama indu nya Tamar.
7 Tang ulah Er jai ba mata Jehovah. Nya alai Jehovah munuh iya.
8 Udah nya, Judah bejaku enggau Onan: “Jadi meh enggau balu menyadi nuan. Kereja tanggungjawap nuan laban nuan menyadi laki iya. Besetubuh meh enggau indu nya ngambika menyadi nuan bisi peturun.”
9 Tang Onan nemu, enti sema seduai iya bisi anak, anak nya ukai dikumbai anak iya. Nya alai, taja pan iya besetubuh enggau bini menyadi iya, iya nentuka indu nya enda ulih ngandung* ngambika menyadi iya nadai peturun.
10 Utai ke digaga Onan nya jai ba mata Jehovah. Nya alai, Iya munuh Onan.
11 Ku Judah bejaku enggau menantu iya Tamar: “Alai nuan pulai ngagai rumah apai nuan, lalu anang jadi enggau orang bukai sampai anak aku Selah udah besai.” Iya nyebut munyi nya laban iya takut enggaika Selah mati baka dua iku menyadi tuai iya. Nya alai, Tamar pulai ngagai rumah apai iya.
12 Nyau kelama, bini Judah pan mati. Pengudah timpuh alai Judah tusah ati ke pemati bini iya abis, iya enggau kaban iya Hirah, orang Adulam, mupuk ngagai Timnah, laban deka ngabas orang ke nyukur bulu bedus iya.
13 Bisi orang madah ngagai Tamar pasal entua lelaki iya ke benung mansang ngagai Timnah, laban deka nyukur bulu bedus iya.
14 Tamar pan nukar gari ke nunjukka iya balu lalu ngena gari ke bukai. Iya mega ngena selindang enggau siti agi kain kena ngelalaika mua iya. Udah nya, iya duduk ba pintu penama ngagai Enaim. Enaim nya kuta ke ba jalai ke nuju ngagai Timnah. Tamar ngereja nya laban iya nemu Selah udah besai, tang Selah bedau diasuh jadi enggau iya.
15 Lebuh Judah tepedaka Tamar, iya ngumbai Tamar nya pelacur, laban Tamar udah ngelalaika mua diri.
16 Judah mansang ngagai Tamar ke ba tisi jalai, lalu bejaku: “Aram tinduk* enggau aku.” Iya enda nemu indu nya menantu iya. Ku Tamar nanya: “Nama deka diberi nuan ngagai aku enti aku tinduk enggau nuan?”
17 Ku Judah nyaut: “Aku deka nganjung siku anak kambin ngagai nuan.” Disaut Tamar: “Baka ni aku ulih nemu nuan amat deka nganjung anak kambin nya?”
18 Ku Judah: “Nama jamin ke ka nuan?” Disaut indu nya: “Tinchin ke dikena nuan ngechop enggau tali iya sereta tungkat nuan nya.” Judah lalu meri utai nya ngagai iya. Udah nya, seduai iya besetubuh lalu Tamar pan ngandung.
19 Pengudah nya, Tamar mupuk pulai. Iya muka selindang iya lalu ngena baru gari balu iya.
20 Udah nya, Judah ngasuh kaban iya, orang Adulam nya, nganjung anak kambin ngagai indu nya, lalu ngambi pulai baru utai ke udah dikena nyadika jamin. Tang indu nya nadai ditemu.
21 Orang Adulam nya nanya bala sida ke lelaki ba Enaim: “Dini alai pelacur* ke ba tisi jalai tu suba?” Ku sida nyaut: “Nadai kala bisi indu sundal ditu deh.”
22 Udah nya, orang Adulam nya pulai ngagai Judah. Ku iya madah: “Aku nadai tetemuka indu nya, lalu orang ba dia madah nadai kala bisi pelacur ba endur nya.”
23 Nya alai ku Judah: “Awakka aja iya ngambi utai nya. Enti tua terus ngiga iya, nyau tua empu ga ke malu. Aku udah nganjung anak kambin ngagai iya. Tang nadai ku enggau meh, nuan nadai ga tetemuka iya.”
24 Kira-kira tiga bulan udah nya, bisi orang madah ngagai Judah: “Menantu nuan Tamar udah nyadi pelacur, lalu iya mega ngandung ketegal pengawa iya nya.” Ku Judah bejaku: “Bai iya pansut! Bunuh iya. Udah nya, tunu iya!”
25 Lebuh Tamar benung dibai pansut, iya ngirumka pesan ngagai entua lelaki iya: “Orang ke ngempu utai tu ke ngasuh aku ngandung. Peresa dulu sapa ke ngempu tinchin kena ngechop tu enggau tali iya sereta tungkat tu.”
26 Pengudah Judah meresa semua utai nya, ku iya bejaku: “Iya enda salah. Aku ke salah, laban aku enda meri anak lelaki aku Selah jadi enggau iya.” Judah pan nadai agi besetubuh enggau Tamar.
27 Lebuh Tamar nyauka beranak, iya ditemu bisi anak besapit dalam kandung iya.
28 Maya iya deka ngadaka anak iya, siku ari anak iya mansutka jari. Nya alai, indu bidan lalu nanchangka ubung mirah ba jari anak nya. Ku indu bidan nya: “Iya tu dulu ada.”
29 Tang lebuh anak nya narit jari iya ke dalam baru, menyadi iya lalu ada dulu. Ku indu bidan nya: “Nama ga nuan pansut baka nya? Nyau pedis indai nuan.” Nya alai, anak nya diberi nama Peres.*
30 Udah nya, menyadi iya ada. Jari iya meh ke udah ditanchang ngena ubung mirah, lalu iya diberi nama Zerah.
Nota Kaki
^ Iya nya, pengawa seks entara siku lelaki enggau siku indu.
^ Tauka “iya nejuka ai mani iya labuh ke tanah.”
^ Tauka “besetubuh.”
^ Tauka “pelacur kuil.” Engka merujuk ngagai orang ke nyundal maya sida nyembah petara orang Kanaan.
^ Reti nya “Charik.” Engka merujuk ngagai begian ba tubuh indai ke charik lebuh ngadaka anak.
