Pemungkal 39:1-23
39 Orang Ismail mai Josep ngagai Ejip. Ba dia, Potipar meli Josep ari sida. Potipar nya siku pegawai ba istana Firaun sereta ketuai soldadu ke nyaga Firaun.
2 Tang Jehovah bisi enggau Josep. Ketegal nya, semua pengawa ke dikereja Josep mujur magang. Nya alai, iya diberi tanggung pengawa dalam rumah tuan iya, orang Ejip nya.
3 Tuan iya sedar Jehovah bisi enggau Josep, lalu Jehovah ke ngasuh semua pengawa ke dikereja Josep mujur.
4 Josep dikerinduka Potipar, lalu Josep nyadi orang gaji ke dikearapka iya. Nya alai, Potipar ngasuh Josep ngemataka rumah iya sereta semua reta ke dikemisi iya.
5 Kenyau ari nya, Jehovah merekatka ruang bilik Potipar ketegal Josep. Jehovah mega merekatka semua utai ke dikemisi Potipar enda ngira ba rumah tauka ba ladang.
6 Pengujung iya, Potipar ngasuh Josep ngemataka semua utai ke enggi iya. Potipar semina ngaga pemutus pasal utai ke deka diempa diri empu. Josep nya orang ke sigat gamal sereta tegap tubuh.
7 Nyau kelama, bini Potipar bisi ati ke Josep. Ku iya madah ngagai Josep: “Tinduk* meh enggau aku.”
8 Tang Josep enggai, lalu madahka ngagai bini tuan iya: “Tuan udah arapka aku ngemataka semua utai ba dalam rumah iya. Lalu iya enda irau pasal utai ke dikereja aku.
9 Nadai orang ke lebih agi bekuasa ari aku dalam rumah tu. Lalu tuan udah ngasuh aku ngemataka semua utai dalam rumah tu kecuali nuan, laban nuan bini iya. Nya alai, enda patut aku ngereja utai ti jai tu lalu bedosa ngelaban Petara.”
10 Tiap hari iya mujuk Josep. Tang Josep enggai besetubuh* enggau iya tauka begulai enggau iya kediri.
11 Nyadi sekali, lebuh Josep datai ngereja pengawa iya dalam rumah nya, nadai siku pan orang gaji bisi dalam rumah nya.
12 Bini Potipar narit baju Josep. Ku iya: “Tinduk enggau aku!” Josep lalu ngerarika diri ke luar, tang baju iya tinggal ba jari indu nya.
13 Lebuh indu nya meda Josep udah ngerarika diri lalu baju iya tinggal,
14 indu nya lalu nyerauh ngangauka bala orang gaji iya. Ku iya: “Peda kita! Orang Hebrew ke dibai laki aku ngagai rumah tu udah ngeleseka kitai. Iya datai ngagai aku lalu deka ngerugul aku. Tang aku nyerauh enggau naka penginggar nyawa aku.
15 Lebuh iya ninga aku nyerauh, iya rari ke luar lalu ninggalka baju iya.”
16 Bini Potipar nyimpan baju nya ngimbai iya, nyentuk ngagai Potipar, tuan Josep, pulai ke rumah.
17 Iya madahka utai ti sama ngagai laki iya. Ku iya: “Ulun Hebrew ke dibai nuan nya datai lalu deka ngerugul aku.
18 Lebuh iya ninga aku nyerauh, iya rari ke luar lalu ninggalka baju iya.”
19 Lebuh Potipar ninga utai ke disebut bini iya pasal Josep, iya lalu balat ringat.
20 Nya alai, Potipar nangkap Josep lalu ngurung iya dalam rumah jil. Rumah jil nya tempat alai raja ngurung orang ke ngereja penyalah. Lalu ba dia meh Josep dijil.
21 Tang Jehovah seruran enggau Josep, lalu nunjukka pengerindu ti setia ngagai Josep. Petara ngasuh ketuai rumah jil nya nyau rinduka Josep.
22 Ketuai rumah jil nya ngasuh Josep ngemataka semua orang ke dikurung ba rumah jil nya. Josep meh ke ngatur pengawa ke patut dikereja sida.
23 Ketuai rumah jil nya enda irauka semua pengawa ke diserahka iya ngagai Josep, laban Jehovah bisi enggau Josep. Lalu Jehovah ngasuh semua pengawa ke dikereja Josep mujur magang.
