Pemungkal 43:1-34
43 Lapar pungkang ba menua Kanaan majak balat.
2 Lebuh pemakai ke dibeli sida ari Ejip udah abis, ku apai sida bejaku ngagai sida: “Alai kita kin baru lalu meli pemakai ke kitai.”
3 Ku Judah nyaut: “Lelaki nya enggau terang nangkan kami, kami enda tau betemu enggau iya enti kami enda mai menyadi kami.
4 Enti nuan ngemendarka Benjamin enggau kami, nya baru kami deka mupuk kin lalu meli pemakai.
5 Tang enti nuan enda ngemendarka iya enggau kami, kami enggai kin laban lelaki nya madah, kami enda tau betemu enggau iya enti kami enda mai menyadi kami.”
6 Ku Israel: “Nama kebuah kita madahka diri bisi menyadi bukai? Nama kebuah kita ngenusahka aku baka tu?”
7 Ku sida nyaut: “Lelaki nya ke mayuh utai tanya. Iya nanya pasal kitai enggau ruang bilik kitai. Ku iya: ‘Apai kita agi idup? Kati kita bisi menyadi bukai?’ Kami pan nyaut aja utai ke ditanya iya. Ni meh kami nemu iya deka ngasuh kami mai menyadi kami ngagai iya.”
8 Judah lalu mujuk apai iya Israel: “Awakka iya enggau aku, nya baru kami ulih mupuk. Ngambika kitai, nyengkaum nuan enggau bala anak kami, enda mati keberuran.
9 Aku deka nentuka iya selamat. Enti bisi utai nyadi ngagai iya, nuan ulih ngukum aku. Enti aku enda ulih mai iya pulai lalu nyerahka iya ngagai nuan, aku deka besalah ngagai nuan belama iya.
10 Enti kitai enda betangguh ngelama tu, kami tentu udah dua kali pulai mansang.”
11 Ku Israel, apai sida, bejaku ngagai sida: “Enti baka nya, kereja kita utai tu: Bai meh utai ti pemadu manah ari menua tu dalam guni kita. Bai minyak balsam, madu, getah ke bebau rengut, kulit kayu,* kachang pistasio, enggau almond. Bai meh semua utai tu lalu beri ngagai lelaki nya nyadika hadiah.
12 Bai mega dua kali lipat mayuh agi duit, lalu pulaika duit ke ditemu kita dalam guni kita. Engka sida saru.
13 Bai meh menyadi kita lalu mupuk betemu baru enggau lelaki nya.
14 Awakka Petara ti Pemadu Bekuasa ngasuh lelaki nya kasihka kita, ngambika iya ngelepaska Simion enggau Benjamin. Enti aku patut lenyau bala anak aku, nadai ku enggau meh.”
15 Sida lalu mai dua kali lipat mayuh agi duit enggau semua hadiah nya, lalu mupuk ngagai menua Ejip mai Benjamin. Sida betemu baru enggau Josep.
16 Lebuh Josep meda Benjamin bisi datai enggau sida, iya lalu bejaku enggau orang gaji ke ngemataka rumah iya: “Bai sida ngagai rumah aku. Sayat jelu lalu sediaka pemakai. Sida deka makai enggau aku tengah hari tu legi.”
17 Orang gaji nya lalu tekala nya ngereja utai ke diasuh Josep, lalu mai sida ngagai rumah Josep.
18 Lebuh sida benung dibai ngagai rumah Josep, sida pan takut. Ku sida bejaku: “Tu tentu ketegal duit ke dipulaika baru ngagai guni kitai, lebuh kitai kitu terubah iya suba. Diatu sida deka nyerang kitai, ngambi keledai kitai, lalu ngaga kitai nyadi ulun!”
19 Nya alai, lebuh sida datai ba depan pintu rumah nya, sida mansang lalu bejaku enggau orang gaji ke ngemataka rumah Josep.
20 Ku sida: “Tuan, suba kami kala datai kitu meli pemakai.
21 Maya kami ba tempat alai bemalam, kami tetemuka duit kami dalam guni lebuh kami muka guni nya. Semua duit kami bisi dia magang. Kami bisi mai duit nya, lalu deka mulaika baru duit nya ngagai kita.
22 Kami enda nemu sapa ke nyimpan duit nya dalam guni kami. Kami mega udah mai mayuh agi duit kena meli pemakai.”
23 Disaut orang gaji nya: “Anang irau, anang takut. Petara kita, Petara apai kita, udah nyimpan duit nya dalam guni kita. Aku udah nerima bayar ari kita.” Udah nya, iya mai Simion ngagai sida.
24 Orang gaji nya lalu mai sida tama ngagai rumah Josep. Iya meri sida ai kena masu kaki, lalu meri keledai sida makai.
25 Sida ninga Josep deka datai maya tengah hari, lalu deka makai enggau sida ba dia. Nya alai, sida nyediaka hadiah ke dibai sida ke iya.
26 Lebuh Josep tama ngagai rumah, sida meri semua hadiah nya ngagai iya lalu besugang ba depan iya.
27 Udah nya, Josep nanya pasal rita sida. Iya mega nanya sida: “Kita kala nyebut pasal apai kita ke udah tuai. Nama rita iya? Kati iya gerai?”
28 Disaut sida: “Tuan, apai kami gerai.” Udah nya, sida meremi lalu besugang ba depan iya.
29 Lebuh iya meda Benjamin, menyadi kandung ke sama indai enggau iya, ku iya bejaku: “Iya tu menyadi kita ke biak sekali nya, ke dipadah kita suba?” Udah nya, iya bejaku enggau Benjamin: “Awakka Petara merekatka nuan, anak.”
30 Josep pan beguai pansut lalu ngiga endur alai iya nyabak, laban iya enda ulih tetagangka ati diri lebuh iya meda menyadi iya. Nya alai, iya tama ngagai bilik ke bukai lalu nyabak.
31 Pengudah iya ulih nagang asai ati diri, iya pan nuchi mua iya lalu pansut. Ku iya bejaku: “Bantaika pemakai.”
32 Orang gaji Josep pan lalu nyadung pemakai ngagai Josep ba mija siti, lalu ngagai bala menyadi iya ba mija siti da agi. Tang orang Ejip makai ba mija ke bukai laban sida keji begulai makai enggau orang Hebrew.
33 Mija bala menyadi Josep betunga enggau mija Josep. Bala menyadi iya diasuh duduk nitihka umur sida, berengkah ari iya ke pemadu tuai ngagai iya ke pemadu biak. Lebuh sida meda utai ke nyadi, sida berasai alit ati lalu beperening ngagai pangan diri.
34 Josep majak meri pemakai ari mija iya ngagai sida, lalu Benjamin diberi lima kali mayuh agi pemakai ari bala menyadi iya ke bukai. Sida makai ngirup enggau Josep nyentukka sida kenyang.
Nota Kaki
^ Getah ari kulit kayu tu dikena ngaga minyak wangi.
