Pemungkal 44:1-34
44 Udah nya, Josep bepesan ngagai orang gaji ke ngemataka rumah iya. Ku iya: “Isi guni sida enggau pemakai, naka ke ulih dibai sida. Udah nya, pulaika duit sida* dalam guni sida siku-siku.
2 Tang dalam guni menyadi sida ke pemadu biak, nuan mesti nyimpan cawan pirak aku enggau duit ke dibai iya kena meli pemakai.” Orang gaji nya pan lalu ngereja utai ke diasuh Josep.
3 Hari siti, lebuh hari udah terang, bala menyadi Josep diasuh mupuk enggau keledai sida.
4 Lebuh sida bedau entu jauh pansut ari kuta nya, Josep pan lalu bejaku enggau orang gaji ke ngemataka rumah iya: “Alai, gagai sida! Lebuh nuan betemu enggau sida, padah ngagai sida: ‘Baka tu chara kita malas pemanah tuan aku?
5 Nama kebuah kita ngambi cawan pirak tuan aku? Cawan nya dikena iya ngirup sereta dikena iya meda utai ke deka nyadi. Jai amat pengawa kita tu!’”
6 Lebuh orang gaji nya udah tetitihka sida, iya nyebut utai ke dipadah Josep ngagai sida.
7 Tang ku sida madah ngagai iya: “Nama kebuah tuan bejaku munyi nya? Nadai kami ngereja nya.
8 Nuan empu nemu, kami udah mai pulai baru duit ke ditemu kami dalam guni kami suba ari menua Kanaan. Enda patut kami deka enchuri pirak tauka emas ari rumah tuan nuan.
9 Tang enti siku ari bala kami bisi ditemu nyimpan utai nya, awakka iya diukum bunuh, lalu semua kami ke bukai deka nyadi ulun tuan.”
10 Ku orang gaji nya: “Au meh. Tang orang ke ditemu nyimpan cawan nya deka nyadi ulun aku, lalu kita ke bukai deka dikumbai enda besalah.”
11 Sida lalu ngengkahka guni sida ba tanah lalu muka guni diri.
12 Orang gaji Josep meresa guni sida siku-siku, berengkah ari iya ke pemadu tuai nyentuk ngagai iya ke pemadu biak. Pengujung iya, cawan nya ditemu dalam guni Benjamin.
13 Sida lalu nyarikka gari diri ketegal kelalu tusah ati. Udah nya, sida manggaika guni sida ba atas keledai sida lalu nikal baru ngagai kuta.
14 Lebuh Judah enggau bala menyadi iya datai ba rumah Josep, Josep agi ba dia. Sida lalu besugang ba depan iya.
15 Ku Josep bejaku enggau sida: “Nama kebuah kita ngereja pengawa tu? Kita enda nemu ka, orang ke baka aku ulih meda masa depan?”
16 Disaut Judah: “Kami enda nemu baka ni ka bejaku agi tuan. Baka ni kami ulih nunjukka diri enda besalah? Petara ti bendar udah mantaika penyalah kami suba. Diatu kami semua, nyengkaum iya ke ditemu nyimpan cawan tuan, deka nyadi ulun tuan.”
17 Ku Josep bejaku: “Aku enggai ngereja nya! Semina iya ke nyimpan cawan nya aja deka nyadi ulun aku. Kita ke bukai tau pulai ngagai apai kita.”
18 Judah mansang ngagai Josep lalu bejaku: “Tuan, aku minta tuan mendingka aku. Anang ringat ngagai aku, laban tuan baka Firaun.
19 Tuan kala nanya kami suba: ‘Kati apai kita agi idup? Kati kita agi bisi menyadi bukai?’
20 Nya kebuah kami madah ngagai tuan, kami bisi apai ke udah tuai sereta siku menyadi lelaki ke pemadu biak. Iya diadaka lebuh apai kami udah tuai. Apai kami balat sayauka iya. Iya bisi siku menyadi ke sama indai enggau iya, tang menyadi iya nya udah nadai.
21 Tang udah nya tuan madahka: ‘Bai iya kitu, ngambika aku ulih betemu enggau iya.’
22 Kami lalu madah ngagai tuan: ‘Anak nya enda ulih ninggalka apai iya. Enti iya ninggalka apai iya, apai iya tentu deka mati!’
23 Udah nya tuan nyebut: ‘Kita enda tau betemu enggau aku enti menyadi kita ke biak sekali nya enda datai enggau kita.’
24 “Kami pulai ngagai apai kami lalu madah ngagai iya utai ke disebut tuan.
25 Pengudah sesiti timpuh, apai kami ngasuh kami pulai kitu baru meli pemakai.
26 Ku kami nyaut: ‘Kami enda tau kin. Kami enda tau betemu enggau lelaki nya enti menyadi kami ke biak sekali enda enggau kami. Kami deka mupuk enti menyadi kami ke biak sekali nya enggau kami.’
27 Ku apai kami: ‘Kita empu nemu, bini aku semina ngadaka dua iku anak lelaki ke aku.
28 Tang siku ari seduai iya udah ninggalka aku. Iya tentu udah dibunuh jelu ti liar, laban udah nya aku nadai meda iya agi.
29 Enti kita mai anak tu ari aku lalu bisi utai ti jai nyadi ba iya, kita deka ngasuh aku mati tuai enggau ati ti tusah!’
30 “Apai kami balat sayauka anak nya, baka iya sayauka nyawa diri. Enti aku pulai nadai mai anak nya,
31 lalu iya meda anak nya nadai enggau aku, iya tentu deka mati! Enti utai nya nyadi, kami ke ngasuh apai kami mati tuai enggau ati ti tusah.
32 Aku udah meri jamin ngagai apai aku. Aku madah ngagai iya: ‘Enti aku enda ulih mai iya pulai lalu nyerahka iya ngagai nuan, aku deka besalah ngagai nuan belama iya!’
33 Nya alai, awakka aku nganti anak tu nyadi ulun tuan ngambika iya ulih pulai enggau bala menyadi kami ke bukai.
34 Aku enda sanggup pulai ngagai apai aku enti anak tu enda pulai sama enggau aku. Aku enda tan meda apai aku merinsa laban penusah tu!”
Nota Kaki
^ Tauka “simpan duit sida ba atas pemakai.”
