Pemungkal 45:1-28
45 Josep enda ulih tetagangka ati diri agi ba depan bala orang gaji iya. Nya alai, iya ngasuh semua sida pansut ari bilik nya. Nadai orang bukai bisi enggau iya dia lebuh Josep madahka diri ngagai bala menyadi iya.
2 Udah nya, Josep nyabak enggau inggar sampai orang Ejip ninga iya nyabak, lalu berita nya dibai ngagai istana Firaun.
3 Ku Josep bejaku enggau bala menyadi iya: “Aku tu Josep. Agi idup apai?” Tang lebuh bala menyadi iya ninga nya, sida amat tekenyit sampai sida enda ulih nyaut iya.
4 Udah nya, Josep lalu bejaku enggau sida: “Datai semak agi ngagai aku.” Sida pan mansang semak agi ngagai iya.
Ku iya: “Aku tu menyadi kita Josep, ke dijual kita ngagai menua Ejip.
5 Anang tusah ati sereta anang nyalahka pangan diri ketegal udah nyual aku nyadi ulun. Petara udah nganjung aku kitu dulu ari kita ngambika ulih nyelamatka nyawa orang mayuh.
6 Tu baru taun kedua lapar pungkang udah nyadi, lalu bisi lima taun da agi. Dalam timpuh nya, nadai orang deka ngeradu tanah tauka ngetau.
7 Tang Petara udah nganjung aku kitu dulu ari kita ngambika kita ulih diselamatka enggau chara ti luar biasa tu, lalu peturun kita ulih terus idup.
8 Nyadi, Petara ti bendar ke udah nganjung aku kitu, ukai kita. Petara udah ngelantik aku nyadi ketuai penasihat* Firaun, orang ke ngemataka rumah iya, sereta orang ke merintah serata menua Ejip.
9 “Pulai meh enggau jampat ngagai apai, lalu padah ngagai iya: ‘Tu utai ke dipadah anak nuan Josep: “Petara udah ngelantik aku nyadi pemerintah ba serata menua Ejip. Datai meh kitu enggau jampat.
10 Bai meh semua bala anak nuan, bala uchu nuan, bala jelu tupi nuan, enggau semua utai ke dikemisi nuan pindah ngagai Gosen, ngambika apai ulih semak enggau aku.
11 Enti apai diau ba Gosen, aku deka nyediaka pemakai ke apai, ruang bilik apai, sereta semua sida ke bisi enggau apai, ngambika kita enda keberuran, laban agi bisi lima taun da agi alai lapar pungkang tu nyadi.”’
12 Diatu, semua kita enggau Benjamin udah meda, aku ke bejaku enggau kita tu, endang amat Josep.
13 Padahka ngagai apai pasal pemesai kuasa aku ba menua Ejip sereta semua utai ti udah dipeda kita. Alai mupuk lalu bai apai kitu enggau jampat.”
14 Josep enggau Benjamin bela merap pangan diri lalu nyabak.
15 Josep mega merap sereta nyium semua bala menyadi iya lalu nyabak. Udah nya, sida berengkah berandau enggau iya.
16 Lebuh Firaun enggau bala pegawai iya ba istana ninga bala menyadi Josep udah datai, sida berasai gaga ati.
17 Ku Firaun bejaku enggau Josep: “Asuh bala menyadi nuan manggaika barang sida ba jelu sida, lalu pulai ngagai menua Kanaan.
18 Asuh sida mai apai kita enggau ruang bilik sida datai kitu. Aku deka meri sida utai ti pemadu manah ba menua Ejip, lalu sida deka makai asil utai ti ditanam ke pemadu manah.
19 Asuh sida mai kerita lembu ari menua Ejip kena mai bini enggau anak sida sereta kena mai apai kita kitu.
20 Sida enda ibuh irau pasal reta tengkira sida, laban sida deka bempu utai ti pemadu manah ba menua Ejip.”
21 Bala anak Israel pan ngereja nya. Josep lalu meri sida kerita lembu nitihka utai ke diasuh Firaun. Iya mega meri sida pemakai kena sida ba rantau jalai.
22 Josep meri tiap iku sida sepasang gari ti baru. Tang, iya meri Benjamin 300 singkap duit pirak sereta lima pasang gari ti baru.
23 Josep ngirumka 10 iku keledai ke mai barang ti pemadu manah ari menua Ejip ngagai apai iya. Iya mega ngirumka 10 iku da agi keledai ke mai gandum, roti, enggau pemakai bukai kena apai iya ba rantau jalai ngagai Ejip.
24 Lebuh bala menyadi iya deka mupuk, Josep bepesan: “Anang belaya kita ba rantau jalai.”
25 Sida pan ninggalka menua Ejip, lalu pulai ngagai apai sida Jakop ba menua Kanaan.
26 Udah nya, ku sida madah ngagai iya: “Josep agi idup! Bekuasa amat iya ba menua Ejip!” Tang Jakop nyau enda tepansutka jaku laban iya enda pechayaka utai ku sida nya.
27 Tang lebuh sida madahka iya semua utai ti udah disebut Josep ngagai sida, lalu iya mega meda semua kerita lembu ke dikirumka Josep kena mai iya ngagai menua Ejip, Jakop pan badu agi tusah ati.
28 Ku Israel: “Diatu baru aku pechaya, anak aku Josep agi idup! Aku ka betemu enggau iya sebedau aku mati!”
Nota Kaki
^ Tauka “penyanding penemu.”
