Pemungkal 46:1-34
46 Israel pan lalu mai semua utai ke dikemisi iya, lalu mupuk. Lebuh iya datai ba Beer-sheba, iya nunu jelu nyadika pemeri ngagai Petara ke disembah apai iya Isak.
2 Maya malam hari, Petara mandangka utai dalam runding Israel. Ku Petara: “Jakop, Jakop!” Disaut Jakop: “Tu aku!”
3 Ku Petara: “Aku tu Petara ti bendar, Petara apai nuan. Anang takut mansang ngagai menua Ejip laban Aku deka ngaga nuan nyadi bansa ti kering ba menua nya.
4 Aku deka enggau nuan ngagai menua Ejip, lalu Aku mega deka mai nuan pulai ari menua nya. Lebuh nuan mati ila, Josep bisi ngimbai nuan.”*
5 Udah nya, Jakop mupuk ari Beer-sheba. Bala anak iya* lalu nepanka iya enggau anak bini sida dalam kerita lembu ti udah dikirumka Firaun.
6 Sida mai bala jelu tupi sida enggau reta ke diulih sida ba menua Kanaan. Jakop enggau semua ruang bilik iya pan datai ba menua Ejip.
7 Semua peturun iya, iya nya bala anak iya enggau bala uchu iya, dibai iya ngagai menua Ejip.
8 Tu nama bala peturun Israel, iya nya peturun Jakop, ke datai ba Ejip. Anak Jakop ke tuai nya Reuben.
9 Bala anak lelaki Reuben nya Hanok, Pallu, Hesron, enggau Karmi.
10 Bala anak lelaki Simion nya Jemuel, Jamin, Ohat, Jachin, Sohar, enggau Shaul. Indai Shaul nya indu orang Kanaan.
11 Bala anak lelaki Lewi nya Gerson, Kohat, enggau Merari.
12 Bala anak lelaki Judah nya Er, Onan, Selah, Peres, enggau Zerah. Tang Er enggau Onan udah mati ba menua Kanaan.
Anak lelaki Peres nya Hesron enggau Hamul.
13 Bala anak lelaki Isakar nya Tola, Puah, Iob, enggau Simron.
14 Bala anak lelaki Sebulun nya Seret, Elon, enggau Jahleel.
15 Tu meh bala anak lelaki Leah ke diadaka iya ke Jakop ba Padan-aram. Iya mega ngadaka anak indu ke benama Dinah. Semua peturun Jakop ari Leah nya 33 iku.
16 Bala anak lelaki Gat nya Zifion, Hagi, Suni, Esbon, Eri, Arodi, enggau Areli.
17 Bala anak lelaki Aser nya Imnah, Isbah, Isbi, enggau Beriah. Anak indu iya benama Serah.
Anak lelaki Beriah nya Heber enggau Malkiel.
18 Sida 16 iku tu peturun Jakop ari Silpah, indu ulun ke diberi Laban ngagai anak indu iya Leah.
19 Anak lelaki Jakop ke diadaka bini iya Rachel nya Josep enggau Benjamin.
20 Josep bisi dua iku anak ba menua Ejip, iya nya Manasi enggau Efraim, ke diadaka Asenat, anak indu Potipera. Potipera nya siku imam ba On.*
21 Bala anak lelaki Benjamin nya Bila, Beker, Asbel, Gera, Naaman, Ehi, Rosh, Mupim, Hupim, enggau Ard.
22 Sida 14 iku tu peturun Jakop ari Rachel.
23 Anak lelaki Dan nya Husim.
24 Bala anak lelaki Naptali nya Jahseel, Guni, Jeser, enggau Silem.
25 Sida tujuh iku tu peturun Jakop ari Bilhah, indu ulun ke diberi Laban ngagai anak indu iya Rachel.
26 Penyampau peturun Jakop ke pindah enggau iya ngagai Ejip nya 66 iku. Penyampau tu enda nyengkaum bala menantu indu iya.
27 Josep bisi dua iku anak lelaki ke ada ba menua Ejip. Penyampau orang ba ruang bilik Jakop ke datai ngagai Ejip nya 70 iku.
28 Jakop ngasuh Judah mupuk dulu lalu madah ngagai Josep, sida benung mansang ngagai Gosen. Lebuh sida datai ba Gosen,
29 Josep ngasuh orang nyediaka kerita kuda iya. Udah nya, iya mansang ngagai Gosen deka betemu enggau apai iya. Lebuh seduai iya betemu, Josep terus merap apai iya, lalu bendar amat nyabak.
30 Ku Israel bejaku enggau Josep: “Diatu aku ulih mati enggau lantang ati, laban aku udah meda nuan lalu nemu nuan agi idup.”
31 Udah nya, Josep bejaku enggau bala menyadi iya sereta ruang bilik apai iya: “Aku deka mupuk dulu lalu madah ngagai Firaun: ‘Bala menyadi aku enggau ruang bilik apai aku ke ari menua Kanaan udah datai.
32 Sida iya pengibun bedus, lalu bisi jelu tupi. Sida udah mai raban bedus, kambin, enggau sapi kitu sereta semua utai ke dikemisi sida.’
33 Lebuh Firaun ngangauka kita, lalu nanya: ‘Nama pengawa ke dikereja kita?’
34 Kita patut nyaut: ‘Tuan raja, kami endang nupi jelu kenyau ari kami agi biak, baka aki ini kami.’ Enggau nya, Firaun deka ngasuh kita diau ba Gosen laban orang Ejip keji begulai enggau orang ke ngibun bedus.”
Nota Kaki
^ Tauka “Josep deka nutup mata nuan ngena jari iya.”
^ Jaku Asal, “Bala anak Israel.”
^ Iya nya, Heliopolis.
