Pemungkal 47:1-31
47 Josep pan betemu enggau Firaun. Ku iya: “Apai aku enggau bala menyadi aku udah datai ari menua Kanaan. Sida mai raban bedus, kambin, sapi enggau semua utai ke dikemisi sida. Diatu, sida udah ba Gosen.”
2 Udah nya, iya mai lima iku menyadi iya betemu enggau Firaun.
3 Firaun lalu nanya sida: “Nama pengawa ke dikereja kita?” Ku sida nyaut: “Tuan raja, kami tu orang ke nupi bedus, baka aki ini kami.”
4 Ku sida agi: “Lapar pungkang balat amat nyadi ba menua Kanaan, lalu ba din nadai agi rumput ke diempa bala jelu kami. Nya alai, kami datai kitu deka nyadi orang asing. Kami minta tuan raja ngemendarka kami diau ba Gosen.”
5 Firaun lalu bejaku enggau Josep: “Apai nuan enggau bala menyadi nuan udah datai ngagai nuan.
6 Nuan ulih meri sida sebarang endur ba menua Ejip. Beri meh sida endur ti pemadu manah. Awakka sida diau ba Gosen. Enti nuan bisi tetemuka sapa-sapa ari sida ke landik gawa, asuh sida ngemataka raban jelu tupi aku.”
7 Udah nya, Josep mai apai iya Jakop betemu enggau Firaun, lalu Jakop merekatka Firaun.
8 Firaun nanya Jakop: “Berapa umur nuan?”
9 Ku Jakop nyaut: “Umur aku 130 taun, lalu sepemanjai nya aku udah mindah kin kia.* Pengidup aku tusah, lalu umur aku enda panjai enti dibandingka enggau pemanjai umur bala sida aki ini aku, ke mega suah mindah kin kia.”
10 Udah nya, Jakop merekatka Firaun lalu ninggalka iya.
11 Nya alai, baka ke diasuh Firaun, Josep meri apai enggau bala menyadi iya endur diau ba menua Ejip. Iya meri sida tanah ti pemadu manah ba menua nya, iya nya ba Rameses.
12 Josep enda ngetu meri pemakai ngagai apai iya, bala menyadi iya, sereta ngagai semua ruang bilik apai iya. Iya meri sida pemakai nitihka penyampau bala anak sida.
13 Lapar pungkang balat amat nyadi ba menua Ejip enggau Kanaan, nyentukka pemakai* nyau nadai agi. Ketegal nya, orang ba menua nya nyau balat amat merinsa.
14 Josep nyual pemakai ngagai orang Ejip enggau orang ari Kanaan. Duit ari asil pemakai ke dijual iya disimpan iya ba istana Firaun.
15 Nyau kelama, orang ba menua Ejip enggau ba menua Kanaan nadai agi duit kena meli pemakai. Nya alai, orang Ejip datai lalu bejaku enggau Josep: “Duit kami udah abis. Beri meh kami pemakai! Anang ngelakka kami mati keberuran.”
16 Disaut Josep: “Enti duit kita udah abis, beri jelu tupi kita ngagai aku, lalu aku deka meri kita pemakai.”
17 Sida meri Josep jelu tupi sida, lalu iya meri sida pemakai. Sida meri iya kuda, bedus, kambin, sapi, enggau keledai sida, lalu iya meri sida pemakai sepemanjai taun nya.
18 Pengudah taun nya abis, sida datai baru ngagai Josep ba taun siti. Ku sida: “Kami deka tuan nemu, duit kami udah abis, lalu jelu tupi kami pan udah abis diberi ngagai tuan. Kami nadai agi utai ke ulih diberi ngagai tuan, kelimpah ari kami empu enggau tanah kami.
19 Anang ngelakka kami mati keberuran. Nadai penguntung enti kami mati, lalu tanah kami ditinggalka pia aja. Nya alai, beli kami enggau tanah kami, lalu beri kami pemakai. Kami deka nyadi ulun Firaun, lalu tanah kami deka diempu iya. Beri kami benih ke ulih ditanam ngambika kami ulih terus idup, lalu tanah kami enda ditinggalka pia aja.”
20 Josep lalu meli semua tanah orang Ejip. Sida nyual tanah sida laban lapar pungkang balat amat nyadi. Baka nya meh chara semua tanah ba Ejip nyadi enggi Firaun.
21 Udah nya, Josep ngasuh orang Ejip ke diau ba kawasan kampung pindah ngagai kawasan kuta.
22 Semina tanah bala sida imam aja ke enda dibeli Josep. Sida iya enda ibuh nyual tanah sida laban sida bulih pemakai ari Firaun.
23 Udah nya, ku Josep bejaku ngagai orang mayuh: “Seharitu, aku udah meli kita enggau tanah kita ke Firaun. Ambi benih tu lalu tanam ba ladang.
24 Pengudah kita ngetau, beri 20 peratus ari asil nya ngagai Firaun, lalu ke bukai nya nyadika benih kita enggau ke pemakai kita empu, bala anak kita, enggau ruang bilik kita.”
25 Ku sida: “Tuan udah nyelamatka nyawa kami. Enti tuan lantang ati enggau kami, kami sanggup nyadi ulun Firaun.”
26 Nya alai, Josep ngaga siti atur, iya nya 20 peratus ari utai ke diketau deka diempu Firaun. Atur tu agi dipejalaika nyentuk ngagai seharitu. Semina tanah bala imam aja ke enda diempu Firaun.
27 Ruang bilik Israel mengkang diau ba Gosen, ba menua Ejip. Lebuh ba dia, bala anak sida majak mayuh lalu penyampau sida majak nambah.
28 Jakop diau ba menua Ejip pengelama 17 taun nyentuk ngagai umur iya 147 taun.
29 Lebuh Israel nemu diri nyauka mati, iya ngangauka anak iya Josep lalu bejaku enggau iya: “Enti aku udah ngelantangka ati nuan, aku deka nuan besumpah* lalu ngayanka pengerindu nuan ti setia ngagai aku sereta ngamatka sumpah nuan ngagai aku. Anang nguburka aku ba Ejip.
30 Lebuh aku mati, bai bangkai aku pansut ari menua Ejip lalu kuburka aku ba pendam aki ini aku.” Disaut Josep: “Aku deka ngereja utai ke diasuh apai.”
31 Lalu ku Israel bejaku: “Besumpah meh ngagai aku.” Nya alai, Josep pan besumpah ngagai iya. Udah nya Israel, ke duduk ba pala katil, ngendukka pala lalu besampi.
Nota Kaki
^ Tauka “udah diau nyadi orang asing.”
^ Jaku Asal, “roti.”
^ Jaku Asal, “ngengkahka jari nuan ba baruh pah aku.” Tu chara orang kelia nunjukka diri setuju enggau sumpah ke udah digaga.
