Pemungkal 48:1-22
48 Pengudah sesiti timpuh, bisi orang madah ngagai Josep: “Apai nuan majak lemi.” Nya alai, Josep mai dua iku anak lelaki iya, Manasi enggau Efraim, betemu enggau Jakop.
2 Udah nya, bisi orang madah ngagai Jakop: “Anak nuan Josep udah datai, deka betemu enggau nuan.” Nya alai, Israel lalu ngeringka diri duduk ba peninduk iya.
3 Ku Jakop bejaku enggau Josep:
“Petara ti Pemadu Bekuasa udah ngayanka Diri ngagai aku ba Lus, di menua Kanaan, lalu merekatka aku.
4 Ku Petara: ‘Aku deka ngasuh peturun nuan beranak betelesak lalu nyadi majak mayuh. Aku deka ngasuh nuan nyadi apai ke mayuh bengkah bansa. Aku mega deka meri tanah tu ngagai peturun nuan, lalu sida deka bempu tanah tu belama iya.’
5 Dua iku anak nuan, iya nya Efraim enggau Manasi, ke diadaka ba menua Ejip sebedau aku datai ditu, deka diambu aku nyadika anak. Seduai iya deka nyadi anak aku, baka Reuben seduai Simion.
6 Tang anak nuan ke bukai, ke diadaka pengudah seduai iya, deka nyadi enggi nuan. Sida deka nerima sebegian ari tanah ke diberi ngagai Efraim enggau Manasi nyadika tanah pesaka.
7 Suba, lebuh aku mupuk ari Padan-aram, lalu agi jauh ari Eprat, aku bisi enggau indai nuan Rachel lebuh iya mati ba menua Kanaan. Nya alai, aku nguburka iya ba dia, ba jalai nuju ngagai Eprat, iya nya Betlehem.”
8 Udah nya, Israel meda anak Josep lalu nanya: “Sapa seduai tu?”
9 Disaut Josep: “Seduai iya anak aku, ke diberi Petara ngagai aku ba menua tu.” Ku Israel: “Bai seduai iya kitu ngagai aku ngambika aku merekatka seduai iya.”
10 Ketegal Israel udah tuai, mata iya nyau rabun lalu enda agi lansik meda. Nya alai, Josep mai dua iku anak iya ngagai Israel. Israel lalu nyium sereta merap seduai iya.
11 Ku Israel madah ngagai Josep: “Aku enda nyangka ulih betemu enggau nuan baru. Tang diatu, Petara mega ngasuh aku betemu enggau bala anak nuan.”
12 Udah nya, Josep mai anak iya jauh mimit ari* apai iya, lalu iya besugang ba depan apai iya.
13 Udah nya, Josep mai dua iku anak iya mansang semak ngagai Israel. Josep megai Efraim ngena jari kanan iya, lalu megai Manasi ngena jari kiba iya. Iya mai Efraim ngagai kiba Israel, lalu mai Manasi ngagai kanan Israel.
14 Tang Israel ngengkahka jari kanan iya ba pala Efraim taja pan Efraim biak agi, lalu ngengkahka jari kiba iya ba pala Manasi. Israel sengaja ngengkahka jari iya baka nya taja pan iya nemu Manasi nya anak tuai.
15 Udah nya, Israel merekatka Josep. Ku iya:
“Petara ti bendar ke disembah* aki aku Abraham enggau apai aku Isak,Petara ti bendar ke udah nyaga aku* sepemanjai pengidup aku nyentukka seharitu,
16 Ke ngena melikat Iya ngelepaska aku ari semua penusah, berekatka meh dua iku nembiak tu.
Awakka nama aku, enggau nama aki aku Abraham, enggau nama apai aku Isak meruan belama iya nengah seduai iya,Awakka seduai iya bisi mayuh peturun.”
17 Josep enda lantang ati lebuh iya meda jari kanan apai iya ba pala Efraim. Nya alai, iya nguji deka mindahka jari apai iya ari pala Efraim ngagai pala Manasi.
18 Ku Josep bejaku enggau apai iya: “Salah nya apai. Siku tu ke anak tuai. Engkahka jari kanan nuan ba pala iya.”
19 Tang apai iya enggai. Ku iya: “Nemu ku anak, nemu ku. Peturun Manasi mega deka nyadi bansa ti kering. Tang menyadi iya ke biak deka nyadi kering agi ari iya. Bala peturun iya deka nyadi majak mayuh nyentukka ulih numbuhka beberapa iti menua.”
20 Nya alai sehari nya, iya merekatka seduai iya. Ku iya:
“Awakka orang Israel nyebut nama nuan lebuh sida merekatka orang. Sida deka nyebut munyi tu:‘Awakka Petara merekatka nuan, baka Iya merekat Efraim enggau Manasi.’”
Nya meh chara Israel ngenuluka Efraim ari Manasi.
21 Lalu ku Israel bejaku enggau Josep: “Aku nyauka mati. Tang Petara deka terus enggau nuan, lalu mai nuan pulai ngagai menua aki ini nuan.
22 Aku deka meri nuan siti da agi tanah ke diambi aku ari orang Amor ngena pedang enggau panah aku. Enggau nya, tanah nuan deka lebih agi ari bala menyadi nuan ke bukai.”
Nota Kaki
^ Jaku Asal, “ari patung (lutut).”
^ Jaku Asal, “ke bejalai dulu ari.”
^ Tauka “udah ngemataka aku baka siku pengibun bedus.”
