Pemungkal 49:1-33
49 Udah nya, Jakop ngangauka bala anak lelaki iya lalu bejaku: “Begumpul kita. Aku deka madah ngagai kita utai ke deka nyadi ba kita jemah ila.
2 Aku tu Jakop, lalu kita tu bala anak aku. Begumpul meh kita lalu pendingka aku. Au, aku tu apai kita, Israel. Pendingka aku.
3 “Reuben, nuan meh anak tuai aku. Lalu nuan anak ke dulu ada ari semua peturun aku. Nuan pengering aku. Nuan ke pemadu dipebasa sereta pemadu kering.
4 Tang nuan enda ulih lebih agi ari bala menyadi nuan ke bukai. Laban baka ai ti deras, nuan enda ulih tetagangka diri empu lalu tinduk enggau bini apai nuan.* Maya nya, nuan enda bebasaka tikah aku. Nya meh utai ke digaga nuan.
5 “Simion enggau Lewi diri menyadi. Seduai iya orang ke ganas lalu ngena pedang bebunuhka orang.
6 Aku enggai begulai enggau seduai iya. Awakka nama aku nadai kaul enggau raban seduai iya, laban seduai iya udah munuh orang lebuh seduai iya ringat, lalu seduai iya ngelumpuhka* sapi ti lelaki kena seduai iya merindang diri.
7 Awakka pengeringat seduai iya ditinggang sumpah, laban pengeringat nya ngasuh seduai iya ngereja utai enggau kasar sereta kejam. Aku deka ngasuh seduai iya beserara ba menua Jakop, lalu aku deka ngasuh seduai iya ngachir ba menua Israel.
8 “Judah, bala menyadi nuan deka muji nuan. Nuan deka ngalahka bala munsuh nuan.* Bala anak lelaki apai nuan deka besugang ba depan nuan.
9 Judah baka anak singa. O anak, pengudah nuan makai utai ke ditangkap nuan, nuan lalu mupuk. Nuan deka gali ba tanah sereta ngeliat baka singa. Laban nuan baka singa, nadai orang berani ngachau nuan.
10 Judah deka seruran megai tungkat diraja, lalu tungkat pemerintah deka mengkang ba depan iya* nyentuk ngagai Siloh* datai. Semua orang deka ngasika iya.*
11 Judah nanchang keledai iya ba pun anggur, lalu nanchang anak keledai iya ba pun anggur ti pemadu manah. Iya deka masu gari iya ngena wain sereta ngena ai anggur ke mirah baka darah.
12 Mata Judah nyau mirah laban iya ngirup wain, lalu ngeli iya burak laban iya ngirup ai tusu.
13 “Sebulun deka diau ba tebing tasik, endur alai kapal-kapal deka sangkai, lalu ujung sempadan kawasan iya tunga ke Sidon.
14 “Isakar baka keledai ti kering tulang, ke gali bebaika dua iti ma ba belakang iya lebuh iya berehat.
15 Iya* beratika tempat alai iya diau nya manah, lalu menua nya ngerinduka ati iya. Iya sanggup ngesan ma ti berat, lalu deka ngereja pengawa ti berat baka ulun.
16 “Dan ari raban bansa Israel, deka ngakim semua orang.
17 Dan baka ular ti bisa ba tisi jalai, ke mantuk tumbit kuda nyentukka orang ke nepan kuda nya labuh telentang ke belakang.
18 O Jehovah, aku nganti pengelepas ari Nuan.
19 “Gat deka diserang bala perumpak, tang iya deka nyerang sida ari belakang.
20 “Aser deka ngasilka mayuh pemakai* ti manah, lalu pemakai nya deka ngerinduka ati raja.
21 “Naptali baka rusa indu ke laju belanda. Iya nyebut jaku ti manah didinga.
22 “Josep baka dan pun kayu ke bebuah lebat. Pun kayu nya tumbuh semak enggau mata ai, lalu dan iya tumbuh ngelui dinding.
23 Tang bala orang ke ngena panah begedika iya. Sida majak nyerang iya lalu nimbak iya ngena anak panah.
24 Taja pia, panah ke dipegai iya enda bekinsit. Jari iya mengkang kering sereta laju nimbakka anak panah. Tu datai ari iya ti bekuasa ke nulung Jakop, ari pengibun bedus, sereta batu ke nyukung Israel.
25 Iya* pemeri ari Petara ke disembah apai iya. Petara deka nulung iya, lalu iya bisi enggau Petara ti Pemadu Bekuasa. Petara deka merekatka iya enggau berekat ari langit sereta ari baruh tanah, lalu meri iya mayuh anak enggau jelu tupi.
26 Berekat ke diberi apai iya manah agi ari utai ti berega ba gunung ti meruan belama iya, lalu manah agi ari bukit-bukit ti meruan belama iya. Josep, ke dipilih ari bala menyadi iya, deka mengkang nerima semua berekat nya.*
27 “Baka serigala, Benjamin deka nyarikka mansa iya. Ba pagi hari, iya deka makai mansa iya. Lalu ba lemai hari, iya deka magi mansa ke diulih iya.”
28 Tu meh 12 raban bansa Israel, lalu tu meh berekat ari apai sida. Iya meri berekat ti sesuai ke tiap iku anak iya.
29 Udah nya, iya meri pesan ngagai bala anak iya: “Enda lama da agi, aku deka mati. Kuburka aku begulai enggau bala apai aku dalam gua ba ladang ke diempu Epron, orang Het.
30 Gua nya ba Makpelah, semak Mamre, ba menua Kanaan. Ladang nya dibeli Abraham ari Epron, orang Het, nyadika tanah pendam.
31 Ba dia meh Abraham enggau bini iya Sarah dikuburka. Ba dia meh Isak enggau bini iya Rebekah dikuburka. Lalu ba dia mega aku nguburka Leah.
32 Ladang enggau gua nya dibeli ari orang Het.”
33 Pengudah Jakop madahka semua pesan ngagai bala anak iya, iya gali ba peninduk iya lalu ngapuska seput iya. Jakop pan mati baka aki ini iya.
Nota Kaki
^ Jaku Asal, “nuan niki ngagai peninduk apai nuan.”
^ Tauka “mutuska urat kaki.”
^ Jaku Asal, “Jari nuan deka nyangkam pegu bala munsuh nuan.”
^ Jaku Asal, “ba entara kedua-dua kaki iya.”
^ Reti nya “Iya ke Ngempu Nya.”
^ Tu merujuk ngagai Siloh.
^ Tu merujuk ngagai Isakar.
^ Tauka “roti.”
^ Iya nya, Josep.
^ Jaku Asal, “Semua berekat nya deka mengkang ba atas pala Josep.”
