Pemungkal 50:1-26
50 Josep lalu ningkapka diri ba apai iya. Iya nyabak lalu nyium apai iya.
2 Udah nya, Josep ngasuh bala lutur ngintu* bangkai apai iya ngambika enda reput. Sida pan lalu ngereja nya.
3 Pengawa nya dikereja dalam pengelama 40 hari. Tu endang pengelama orang ngintu bangkai orang ke mati. Orang Ejip nyabakka pemati Jakop pengelama 70 hari.
4 Pengudah timpuh nya abis, Josep bejaku enggau bala pegawai Firaun: “Aku minta kita mai pesan tu ngagai Firaun:
5 ‘Ku apai aku: “Aku nyauka mati. Aku ka nuan besumpah, kuburka aku ba endur ke udah disediaka aku ba menua Kanaan.” Nya alai, awakka aku mupuk lalu nguburka apai aku. Udah nya, aku pulai baru.’”
6 Disaut Firaun: “Mupuk meh nuan, lalu kuburka apai nuan nitihka sumpah ti udah digaga nuan enggau iya.”
7 Josep pan mupuk nguburka apai iya. Semua pegawai Firaun, bala pegawai ke tinggi pangkat ba istana Firaun, bala pegawai ke tinggi pangkat ba menua Ejip,
8 semua sida ke diau ba rumah Josep, bala menyadi iya, enggau semua sida ke ba ruang bilik apai iya, sama mupuk enggau iya. Ka semina sida ke agi mit enggau bala jelu bedus, kambin, sereta sapi ke agi tinggal ba Gosen.
9 Orang ke nepan kerita kuda enggau orang ke nepan kuda mega mupuk enggau iya. Bala sida ke enggau iya amat mayuh.
10 Udah nya, sida datai ba endur alai ngindik utai ke diketau ba Atat, ke semak enggau Sungai Jordan. Ba dia, sida balat amat nyabakka Jakop. Josep nyabakka apai iya pengelama tujuh hari.
11 Lebuh orang ke diau ba menua nya, iya nya orang Kanaan, meda sida nyabak ba Atat, ku sida: “Bendar amat bala orang Ejip nya nyabak.” Nya kebuah endur ke semak enggau Sungai Jordan nya dikumbai Abel-misraim.*
12 Semua bala anak Jakop ngereja utai baka ke udah diasuh iya kereja sida.
13 Sida mai bangkai iya ngagai menua Kanaan, lalu nguburka iya dalam gua ba ladang ba Makpelah. Ladang nya semak Mamre. Abraham udah meli tanah nya ari Epron, orang Het, nyadika tanah pendam.
14 Pengudah Josep nguburka apai iya, iya pan pulai ngagai menua Ejip sama enggau bala menyadi iya sereta enggau semua orang ke udah enggau iya nguburka apai iya.
15 Pengudah apai sida mati, ku bala menyadi Josep bejaku: “Baka ni enti Josep bedendam ngagai kitai lalu deka malas semua penyai kitai ngagai iya?”
16 Nya alai, sida ngirumka pesan ngagai Josep: “Sebedau apai mati, iya bisi madahka:
17 ‘Padah ngagai Josep: “Anak, utai ke dikereja bala menyadi nuan ngagai nuan amat salah. Tang aku minta nuan ngampunka penyalah sida.”’ Nya alai, kami minta nuan ngampunka penyalah kami, laban kami mega nyembah Petara ke disembah apai nuan.” Josep nyabak lebuh iya ninga pesan nya.
18 Udah nya, bala menyadi iya datai lalu besugang ba depan iya. Ku sida: “Kami tu ulun tuan!”
19 Ku Josep bejaku enggau sida: “Anang takut. Aku ukai nya Petara, ke bisi hak ngakim kita.
20 Taja pan kita bisi ati deka ngemediska aku, tang Petara udah ngasuh utai ke digaga kita nya nyadi utai ti tau mai penguntung, ngambika mayuh nyawa ulih diselamatka, baka ke benung digaga Iya diatu.
21 Nya alai, anang takut. Aku deka mengkang meri pemakai ngagai kita enggau bala anak kita.” Baka nya meh chara Josep ngelantangka ati sida ngambika sida enda irau.
22 Josep enggau ruang bilik apai iya mengkang diau ba menua Ejip. Josep idup pengelama 110 taun.
23 Iya sempat meda bala uchu Efraim sereta bala anak Makir, iya nya bala uchu Manasi. Semua sida baka anak iya empu.*
24 Lebuh Josep nyauka mati, ku iya bejaku enggau bala menyadi iya: “Enda lama agi, aku deka mati. Tang Petara deka nulung kita lalu mai kita pansut ari menua tu, ngagai menua ti udah disemayaka Iya ngagai Abraham, Isak, enggau Jakop.”
25 Nya alai, Josep madah ngagai bala anak Israel: “Petara tentu deka nulung kita lalu mai kita pansut ari menua tu. Besemaya meh enggau aku, lebuh kita ninggalka menua tu, bai meh tulang aku enggau kita.”
26 Josep pan mati lebuh iya beumur 110 taun. Sida ngintu bangkai iya ngambika enda reput, lalu nyimpan bangkai iya dalam keranda* ba menua Ejip.
Nota Kaki
^ Tauka “ngawet.” Iya nya, ngunsut bangkai ngena minyak ti bebau rengut ngambika enda reput tauka luluh.
^ Reti nya “Sabak Tusah Ati Orang Ejip.”
^ Jaku Asal, “Sida diadaka ba atas patung (lutut) Josep.” Reti iya, sida baka anak kandung Josep empu sereta dilayan enggau chara ti istimewa.
^ Tauka “sentubung.”
