Pemungkal 9:1-29
9 Petara merekatka Noah enggau bala anak iya. Ku Iya: “Beranak betelesak meh kita lalu ngemenuhka dunya.
2 Semua jelu ba dunya deka takutka kita. Jelu nya nyengkaum utai idup ti besayap, jelu ba darat, enggau semua ikan ke ba tasik. Semua sida deka di baruh kuasa kita.
3 Kita tau makai semua jelu nya. Aku udah meri semua nya nyadika pemakai kita, baka Aku ke udah meri utai tumbuh nyadika pemakai kita.
4 Tang kita enda tau makai dagin ke agi bisi darah, laban darah nya nyawa.
5 Kelimpah ari nya, barang sapa ke munuh kita, orang nya deka diukum. Enti jelu munuh kita, jelu nya mesti dibunuh. Enti menyadi kita munuh kita, iya deka diukum.
6 Barang sapa ke munuh orang, iya mega deka dibunuh orang bukai, laban Aku ngaga mensia sama baka Aku Empu.
7 Beranak betelesak meh kita lalu nyadi majak mayuh ngemenuhka dunya.”
8 Udah nya Petara bejaku ngagai Noah enggau bala anak iya:
9 “Aku deka ngaga sempekat enggau kita, enggau peturun kita,
10 sereta enggau semua bansa jelu ke enggau kita pansut ari bandung. Au, semua bansa jelu ba dunya: Burung, jelu tupi, enggau jelu liar.
11 Aku ngaga sempekat tu enggau kita: Aku enggai agi ngemunaska semua utai ti idup sereta ngerusakka dunya ngena ai bah.”
12 Ku Petara agi: “Tu meh tanda sempekat ke digaga Aku enggau kita sereta enggau semua bansa jelu ke enggau kita. Lalu sempekat tu deka meruan nyentuk ngagai generasi* jemah ila.
13 Aku ngengkahka pelangi ba langit nyadika tanda sempekat entara Aku enggau semua utai idup ba dunya.
14 Tiap kali Aku ngasuh hari ujan, pelangi deka ayan ba langit.
15 Aku deka ingatka sempekat ke udah digaga Aku enggau kita sereta enggau semua macham bansa jelu. Aku enggai agi ngena ai bah ngemunaska semua utai ti idup.
16 Lebuh Aku meda pelangi nya ayan ba langit, Aku deka ingatka sempekat ti meruan ke udah digaga Aku enggau semua utai idup ba dunya.”
17 Ku Petara madah baru ngagai Noah: “Tu meh tanda sempekat ke digaga Aku enggau semua utai ti idup ba dunya.”
18 Bala anak Noah ke pansut ari bandung nya Sem, Ham, enggau Japet. Udah nya, Ham bisi anak ke benama Kanaan.
19 Sem, Ham, enggau Japet nya anak lelaki Noah, lalu semua orang ke diau ba serata dunya tu datai ari sida.
20 Noah nyadi orang ke bekebun, lalu iya bisi kebun anggur.
21 Bisi sekali, pengudah iya ngirup wain, iya mabuk. Udah nya iya muka gari iya dalam langkau kain.
22 Ham, apai Kanaan, meda apai iya telanjai, lalu iya pansut madah ngagai dua iku menyadi iya.
23 Nya alai, Sem enggau Japet ngambi kain lalu ngengkahka kain nya ba bau seduai iya. Seduai iya bejalai surut tama ngagai langkau kain nya lalu mungkur apai seduai iya. Maya seduai iya ngereja nya, seduai iya malik ke bukai ngambika enda meda apai seduai iya telanjai.
24 Lebuh Noah udah dani, iya nemu pasal utai ke udah dikereja anak lelaki* iya ke pemadu biak.
25 Ku Noah bejaku:
“Tulah meh Kanaan.
Iya deka nyadi ulun bala menyadi iya.”
26 Ku iya agi:
“Puji meh Jehovah, Petara Sem,Lalu awakka Kanaan nyadi ulun Sem.
27 Awakka Petara meri Japet tanah ti besai,Awakka Japet diau ba langkau kain Sem.
Lalu awakka Kanaan mega nyadi ulun Japet.”
28 Pengudah Bah Besai nya, Noah idup 350 taun da agi.
29 Noah idup pengelama 950 taun. Udah nya iya mati.
Nota Kaki
^ Tauka “rebak.”
^ Dalam Bup Kudus, leka jaku “anak lelaki” mega ulih merujuk ngagai uchu lelaki.
