Pengulu 1:1-36
1 Pengudah Josua mati, orang Israel nanya Jehovah: “Sapa entara kami ke deka mansang dulu nyerang orang Kanaan?”
2 Ku Jehovah nyaut: “Raban bansa Judah deka mansang dulu. Aku deka nyerahka menua nya ngagai sida.”
3 Udah nya, raban bansa Judah bejaku ngagai bala menyadi sida ari raban bansa Simion: “Aram enggau kami nyerang orang Kanaan ba menua ke deka diberi ngagai kami. Udah nya, kami deka enggau kita ngagai menua ke deka diberi ngagai kita.” Nya alai, raban bansa Simion pan nitihka sida.
4 Lebuh raban bansa Judah mansang beperang, Jehovah nyerahka orang Kanaan enggau orang Peris ngagai sida, lalu sida ngalahka 10,000 iku orang ba Besek.
5 Sida tetemuka Adoni-besek ba Besek, lalu ba dia meh sida nyerang iya lalu ngalahka orang Kanaan enggau orang Peris.
6 Lebuh Adoni-besek ngerarika diri, sida ngagai iya, nangkap iya, lalu netak tunjuk indu jari enggau tunjuk indu kaki iya.
7 Udah nya, ku Adoni-besek madahka: “Bisi 70 iku raja ti udah ditetak tunjuk indu jari enggau tunjuk indu kaki, lalu sida meh ke ngambi pemakai ba baruh mija aku. Diatu, Petara malas utai ke dikereja aku ngagai sida.” Iya lalu dibai ngagai Jerusalem lalu mati ba dia.
8 Udah nya, raban bansa Judah nyerang lalu nguasa Jerusalem. Sida munuh semua orang ke ba dia ngena pedang lalu nunu kuta nya.
9 Raban bansa Judah lalu nyerang orang Kanaan ke diau ba kawasan ke begunung, ba Negeb, enggau ba Shefilah.
10 Sida mansang nyerang orang Kanaan ke diau ba Hebron, (suba Hebron dikumbai Kiriat-arba), lalu sida ngalahka Sheshai, Ahiman, enggau Talmai.
11 Sida mupuk ari endur nya lalu nyerang orang Debir. (Suba Debir dikumbai Kiriat-seper.)
12 Ku Kalep madahka: “Barang sapa ke nyerang Kiriat-seper lalu ulih nguasa kuta nya, aku deka meri anak aku, Aksah, nyadika bini iya.”
13 Nyadi, Otnil anak Kenas, iya nya anak adik Kalep, mujur nguasa kuta nya, lalu Kalep meri iya Aksah nyadika bini iya.
14 Lebuh Aksah dalam pejalai pulai ke rumah, iya bebendar ngasuh laki iya minta tanah ari apai iya, Kalep. Aksah nurun ari keledai* iya, lalu Kalep nanya iya: “Nama utai ke ka dipinta nuan?”
15 Ku iya nyaut: “Apai, berekat meh aku. Laban nuan udah meri aku tanah ba begian selatan,* beri meh aku Gulot-maim* mega.” Nyadi, Kalep pan meri iya Gulot Atas enggau Gulot Baruh.
16 Orang Keni, iya nya peturun entua Moses ke lelaki, mupuk enggau orang Judah ari kuta pun kayu engkerema ngagai menua puang Judah ke ba selatan Arat. Sida diau ba dia begulai enggau orang ke diau ba dia empu.
17 Tang, raban bansa Judah mupuk enggau bala menyadi sida ke ari raban bansa Simion, lalu sida nyerang orang Kanaan ke diau ba Sepat, lalu nganchurka kuta nya. Nya alai, sida ngangauka kuta nya Hormah.*
18 Raban bansa Judah nguasa Gaza, Askelon, Ekron, enggau kawasan ke ngelingi semua kuta nya.
19 Jehovah bisi enggau raban bansa Judah lalu sida nguasa kawasan ke begunung. Tang, sida enda ulih muru orang ke diau ba kawasan lebak, laban orang ke ba dia bisi kerita kuda kena beperang, lalu roda kerita kuda sida bisi dipasangka pedang besi.
20 Baka ke disemayaka Moses, sida meri Hebron ngagai Kalep, lalu Kalep muru tiga iku anak lelaki Enak ari endur nya.
21 Raban bansa Benjamin enda muru orang Jebus ke diau ba Jerusalem. Nya alai, orang Jebus agi diau ba Jerusalem sama enggau orang Benjamin sampai ke seharitu.
22 Maya nya mega, bala peturun Josep mansang nyerang Bethel, lalu Jehovah bisi enggau sida.
23 Sida nganjung pengintip ngagai Bethel (suba kuta nya dikumbai Lus),
24 lalu bala pengintip tepedaka siku lelaki pansut ari kuta nya. Ku sida nanya lelaki nya: “Ni jalai tama ngagai kuta nya? Enti nuan madahka kami, kami deka manah enggau nuan.”*
25 Lelaki nya pan nunjukka sida jalai tama ngagai kuta nya. Bala peturun Josep lalu munuh orang ke diau ba kuta nya ngena pedang. Tang, sida nejuka lelaki nya enggau semua ruang bilik iya idup.
26 Lelaki nya mupuk ngagai menua orang Het, lalu ngaga siti kuta ke diberi iya nama Lus. Nya meh nama kuta nya nyentukka seharitu.
27 Raban bansa Manasi enda nguasa Bet-sean, Taanak, Dor, Iblim, enggau Megido, sereta kuta-kuta mit ke ngelingi semua kuta nya. Orang Kanaan keran deka diau ba dia.
28 Lebuh orang Israel majak kuat, sida mega enda muru semua orang Kanaan nya. Tang, sida maksa orang Kanaan gawa nyadi ulun.
29 Raban bansa Efraim mega enda muru orang Kanaan ke diau ba Geser. Orang Kanaan terus diau enggau sida ba Geser.
30 Raban bansa Sebulun enda muru orang ke diau ba Kitron enggau ba Nahalol. Orang Kanaan terus diau enggau sida, lalu dipaksa gawa nyadi ulun.
31 Pia mega enggau raban bansa Aser, sida enda muru orang ke diau ba Ako, Sidon, Ahlap, Aksip, Helbah, Afik, enggau Rehop.
32 Nya alai, orang Aser terus diau enggau orang Kanaan ba menua nya, laban sida enda muru orang Kanaan ari endur nya.
33 Raban bansa Naptali enda muru orang ke diau ba Bet-shemes enggau ba Bet-anat. Sida terus diau enggau orang Kanaan ba dia. Tang, orang ke diau ba Bet-shemes enggau Bet-anat dipaksa gawa ke sida nyadi ulun.
34 Raban bansa Dan diau ba kawasan ke begunung, laban orang Amor enda ngemendarka sida nurun ngagai kawasan lebak.
35 Orang Amor keran deka diau ba Gunung Heres, Aijalon, enggau Saalbim. Tang, lebuh peturun Josep majak kuat, orang Amor dipaksa gawa nyadi ulun.
36 Kawasan orang Amor berengkah ari Lereng Akrabim sereta berengkah ari Sela nyentuk ngagai kawasan tanah tinggi.
Nota Kaki
^ Tauka engka, “Aksah nempik jari lebuh nepan keledai.”
^ Tauka “Negeb.”
^ Reti nya “Kawasan ke Mayuh Ai.”
^ Reti nya “Mesti Dianchurka.”
^ Jaku Asal, “deka ngayanka pengerindu ti setia ngagai nuan.”
