Pengulu 10:1-18
10 Pengudah Abimelek mati, Tola anak Puah, iya nya uchu Dodo, ke datai ari raban bansa Isakar, dilantik ngambika nyelamatka orang Israel. Iya diau ba Samir ke ba kawasan ke begunung ba Efraim.
2 Iya nyadi hakim orang Israel pengelama 23 taun. Udah nya, iya mati lalu dikuburka ba Samir.
3 Pengudah Tola, Jair ke datai ari peturun Gilead, nyadi hakim orang Israel pengelama 22 taun.
4 Jair bisi 30 iku anak lelaki ke nepan 30 iku keledai. Sida bisi 30 iti kuta ba Gilead. Sampai ke diatu, kuta nya agi dikumbai Havot-jair.
5 Udah nya, Jair mati lalu dikuburka ba Kamon.
6 Orang Israel sekali agi ngereja utai ti jai ba mata Jehovah. Sida nyembah Baal, patung Astoret, petara menua Aram,* petara menua Sidon, enggau petara menua Moap, sereta petara orang Amon enggau petara orang Pilistin. Sida ninggalka Jehovah lalu badu nyembah Iya.
7 Jehovah balat amat ringat ngagai orang Israel. Nya alai, Iya nyerahka* sida ngagai orang Pilistin enggau orang Amon.
8 Ba taun nya, sida ngenusahka sereta balat merinsaka orang Israel. Pengelama 18 taun sida merinsaka semua orang Israel ba sepiak timur Sungai Jordan. Suba, endur nya menua orang Amor ba Gilead.
9 Orang Amon mega meraka Sungai Jordan ngambika nyerang raban bansa Judah, raban bansa Benjamin, enggau raban bansa Efraim. Orang Israel balat amat merinsa.
10 Udah nya, orang Israel ngangauka Jehovah minta tulung. Ku sida: “Kami udah bedosa ngelaban Nuan, laban kami udah ninggalka Nuan, Petara kami, lalu nyembah Baal.”
11 Tang, Jehovah madah ngagai orang Israel: “Endaka Aku udah nyelamatka kita ari Ejip, ari orang Amor, orang Amon, orang Pilistin,
12 orang Sidon, orang Amalek, enggau orang Midian lebuh sida merinsaka kita? Lebuh kita besebana minta tulung ari Aku, Aku nyelamatka kita ari sida.
13 Tang, kita ninggalka Aku lalu nyembah petara-petara bukai. Nya meh kebuah Aku enggai nyelamatka kita agi.
14 Alai meh kita minta tulung ari petara ke dipilih kita. Awakka sida meh ke nyelamatka kita lebuh kita merinsa.”
15 Tang, orang Israel bejaku ngagai Jehovah: “Kami udah bedosa. Kereja meh nama-nama utai ti manah ba mata Nuan. Tang, selamatka meh kami seharitu.”
16 Sida pan muai petara bukai ari bala sida lalu nyembah Jehovah, lalu Iya pan enda sanggup agi meda orang Israel merinsa.
17 Pengudah sesiti timpuh, orang Amon begelumu lalu nirika kem ba Gilead. Orang Israel mega begelumu lalu nirika kem ba Mispah.
18 Orang Gilead enggau bala tuai sida lalu bejaku enggau pangan diri: “Sapa ke deka nguluka kitai belaban enggau orang Amon? Awakka iya meh ke nyadi tuai atas semua orang Gilead.”
