Pengulu 15:1-20
-
Samson malas dendam ngagai orang Pilistin (1-20)
15 Pengudah sesiti timpuh, maya musin ngetau gandum, Samson mupuk deka betemu enggau bini iya. Iya mai siku anak kambin. Ku iya: “Aku deka tama ngagai bilik tinduk bini aku.” Tang, entua iya ke lelaki enda ngasuh iya tama.
2 Ku entua iya madah: “Kumbai aku nuan begedika iya. Nya alai, aku meri iya ngagai pengapit nuan. Manah nuan ngambi adik iya laban adik iya bajik agi.”
3 Ku Samson madah: “Kali tu, orang Pilistin enda ulih nyalahka aku enti aku ngemediska sida.”
4 Samson pan mupuk lalu nangkap 300 iku munsang.* Iya nanchangka munsang nya dua iku dua iku ba begian iku. Iya ngambi sempun api lalu ngengkahka sempun api nya ba entara iku tiap pasang munsang nya.
5 Udah nya, iya nungkun sempun api nya, lalu ngelepaska semua munsang nya ngagai ladang gandum orang Pilistin. Semua gandum angus magang, nyengkaum gandum ke udah ditanchang, kebun anggur, enggau ladang buah kana.
6 Orang Pilistin nanya: “Pengawa sapa tu?” Bisi orang madahka sida: “Tu pengawa Samson, menantu orang Timnah nya. Iya ngereja nya laban entua iya meri bini iya ngagai pengapit iya.” Pengudah nya, orang Pilistin lalu nunu bini iya enggau entua iya ke lelaki.
7 Udah nya, Samson madah: “Enti pia, aku sigi enda ngetu sampai aku malas dendam ngagai kita.”
8 Iya lalu nyerang sida siku-siku, nyentukka mayuh amat orang Pilistin dibunuh iya maya nya. Udah nya, iya mansang ngagai siti gua* ba bukit batu ba Etam, lalu diau ba dia.
9 Udah nya, orang Pilistin datai ngagai Judah lalu nirika kem ba dia. Sida bejalai segau-segau ba Lehi.
10 Orang Judah nanya sida: “Nama kebuah kita datai kitu nyerang kami?” Ku sida nyaut: “Kami deka nangkap* Samson. Kami deka malas utai ke digaga iya ngagai kami.”
11 Nya alai, 3,000 iku orang Judah mupuk ngagai gua* ke ba bukit batu ba Etam. Ku sida madah ngagai Samson: “Enda patut nuan enda nemu, orang Pilistin ke merintah kitai. Nama kebuah nuan ngaga kami baka tu?” Ku Samson nyaut sida: “Aku semina deka malas utai ke digaga sida ngagai aku.”
12 Tang sida madah ngagai iya: “Kami deka nangkap* nuan lalu nyerahka nuan ngagai orang Pilistin.” Udah nya, Samson madah: “Besumpah meh, kita enda munuh aku.”
13 Ku sida madah ngagai iya: “Kami enda munuh nuan. Kami semina nanchang nuan lalu nyerahka nuan ngagai sida.”
Nya alai, sida pan nanchang iya ngena dua iti tali ti baru, lalu mai iya pansut ari bukit batu nya.
14 Maya Samson datai ba Lehi, orang Pilistin rauh-rauh manjung gaga ati lebuh meda iya. Kuasa kudus Jehovah pan ngasuh iya nyadi kering, nyentukka tali ke ba lengan iya nyadi baka ubung linin ke lela ditunu ngena api, lalu tali nya tebeleka ari jari iya.
15 Udah nya, iya tetemuka tulang rang keledai ke baru udah mati. Iya ngambi tulang rang nya, lalu ngena nya munuh 1,000 iku orang.
16 Ku Samson madah:
“Ngena tulang rang keledai, aku bulih setugung, dua tugung!
Ngena tulang rang keledai, aku munuh 1,000 iku orang.”
17 Pengudah iya nyebut nya, iya muai tulang rang nya lalu meri endur nya nama Ramat-lehi.*
18 Udah nya, iya berasai amat aus, lalu iya ngangauka Jehovah. Ku iya: “Nuan meh ke udah nulung aku, nembiak Nuan tu, menang besai. Tang, patut aku mati aus lalu alah ba jari orang ke enda besunat tu?”
19 Nya alai, Petara muka siti lubang ba Lehi, lalu ai pansut ari nya. Lebuh Samson ngirup ai nya, iya pan berasai nyamai sereta kering baru. Nya kebuah iya meri endur nya nama En-hakori,* ke bisi ba Lehi nyentukka seharitu.
20 Samson nyadi hakim orang Israel pengelama 20 taun, lebuh orang Pilistin merintah menua nya.
Nota Kaki
^ Sebengkah jelu ke baka ukui ba menua Israel enggau menua ke semak iya.
^ Tauka “selepak bukit.”
^ Tauka “nanchang.”
^ Tauka “selepak bukit.”
^ Tauka “nanchang.”
^ Reti nya “Bukit Tulang Rang.”
^ Reti nya “Mata Ai Iya ke Ngangau.”
