Pengulu 17:1-13
-
Patung enggau imam Mikah (1-13)
17 Ba kawasan ke begunung ba Efraim, bisi siku lelaki ke benama Mikah.
2 Ku iya madah ngagai indai iya: “Suba, lebuh orang ngambi 1,100 singkap duit pirak nuan, aku ninga nuan nyumpah orang nya. Kebendar iya, aku meh ke ngambi duit nya. Duit nya agi bisi ba aku.” Indai iya lalu madah: “Awakka Jehovah merekatka nuan, anak.”
3 Mikah lalu mulaika baru 1,100 singkap duit pirak nya ngagai indai iya. Tang, indai iya madahka: “Duit pirak tu deka diserahka aku ngagai Jehovah, ngambika anak aku ulih ngena nya ngaga patung besi enggau patung ke diukir. Diatu, aku deka mulaika duit tu ngagai nuan.”
4 Pengudah iya mulaika baru duit nya ngagai indai iya, indai iya ngambi 200 singkap duit pirak lalu meri nya ngagai tukang ke nemu ngaga utai ari pirak. Tukang nya ngaga siti patung besi enggau siti patung ke diukir, lalu patung nya diengkahka ba rumah Mikah.
5 Mikah bisi rumah alai iya nyembah patung iya. Iya ngaga epod enggau patung terafim,* lalu ngelantik siku ari anak lelaki iya nyadi imam iya.
6 Maya nya, Israel bedau bisi raja. Tiap iku orang ngereja utai nitihka peneka ati diri.*
7 Maya nya, bisi siku lelaki ke biak ke udah lama diau ba Betlehem ba Judah. Iya orang Lewi ke datai ari ruang bilik Judah.
8 Udah nya, iya mupuk ari kuta Betlehem ba Judah, lalu ngiga endur bukai alai diau. Lebuh ba rantau jalai, iya datai ba rumah Mikah ke ba kawasan ke begunung ba Efraim.
9 Udah nya, Mikah nanya iya: “Ari ni penatai nuan?” Lelaki nya pan nyaut: “Aku orang Lewi ari kuta Betlehem ba Judah. Aku deka ngiga endur alai diau.”
10 Mikah pan madah ngagai iya: “Diau enggau aku meh. Nuan ulih nyadi penasihat* enggau imam aku. Aku deka meri nuan 10 singkap duit pirak setaun, sepasang gari, enggau nyediaka pemakai ke nuan.” Nyadi, orang Lewi nya pan tama ngagai rumah iya.
11 Orang Lewi nya setuju deka diau enggau Mikah, lalu Mikah nganggap lelaki nya baka anak iya empu.
12 Mikah ngelantik orang Lewi nya nyadi imam iya, lalu iya diau ba rumah Mikah.
13 Mikah madahka: “Diatu, baru aku nemu Jehovah deka ngayanka pemanah ati Iya ngagai aku, laban aku bisi siku imam orang Lewi.”
Nota Kaki
^ Tauka “patung ke disembah diri sebilik.”
^ Jaku Asal, “ngereja utai ti betul ba mata diri empu.”
^ Tauka “penyanding penemu.” Jaku Asal, “apai.”
