Pengulu 18:1-31
18 Maya nya, Israel bedau bisi raja. Raban bansa Dan benung ngiga endur alai diau, laban sida bedau agi ngambi tanah pesaka sida ba entara raban bansa Israel.
2 Orang Dan milih lima iku lelaki ke tau dikearapka ari raban bansa sida. Ku sida madah ngagai lima iku lelaki nya: “Alai kita bejalai lalu beratika menua nya.” Nyadi, lima iku lelaki nya pan mupuk ari Sorah enggau Estaol, lalu ngintip sereta beratika menua nya. Lebuh sida datai ba rumah Mikah, ke ba kawasan ke begunung ba Efraim, sida lalu bemalam ba dia.
3 Lebuh sida semak enggau rumah Mikah, sida ninga lalu ngelala chara siku orang Lewi bejaku.* Sida mansang ngagai lelaki ke biak nya lalu nanya: “Sapa mai nuan kitu? Nama gaga nuan ba ditu? Nama kebuah nuan ba ditu?”
4 Ku lelaki nya nyaut sida: “Nya meh utai ke digaga Mikah ke aku. Iya mega ngaji aku nyadi imam iya.”
5 Udah nya, sida madah ngagai iya: “Tulung kami nanya Petara sekalika pejalai kami tu deka mujur tauka enda.”
6 Ku imam nya nyaut sida: “Mupuk meh, anang irau. Jehovah bisi enggau kita.”
7 Nya alai, lima iku lelaki nya pan mupuk lalu datai ba Lais. Sida meda orang ke diau ba endur nya enda bepanggai ba sapa-sapa, baka orang Sidon. Orang ke diau ba dia idup likun lalu enda ngadang orang deka nyerang sida. Pia mega, nadai pemerintah ke jai deka ngachau sereta nekan sida. Sida jauh ari orang Sidon sereta nadai kaul enggau orang bukai.
8 Lebuh sida pulai baru ngagai Sorah enggau Estaol, bala menyadi sida nanya sida: “Nyadi, baka ni deh?”
9 Ku sida nyaut: “Manah menua nya. Aram kitai nyerang sida. Anang irau. Aram kitai jampat nguasa menua nya.
10 Lebuh kita datai dia, kita deka meda menua nya amat besai, lalu orang ke diau ba dia enda ngadang orang deka nyerang sida. Endur nya nadai kurang nama-nama utai. Petara udah nyerahka menua nya ngagai kita.”
11 Udah nya, 600 iku orang ari raban bansa Dan mai senyata sedia deka beperang. Sida pan mupuk ari Sorah enggau Estaol.
12 Sida nirika kem ba Kiriat-jearim ba Judah. Nya meh kebuah endur nya, ke ba barat Kiriat-jearim, dikumbai Mahaneh-dan* nyentukka seharitu.
13 Sida mupuk ari endur nya lalu datai ba rumah Mikah, ke ba kawasan ke begunung ba Efraim.
14 Udah nya, lima iku lelaki ke udah ngintip menua Lais bejaku ngagai bala menyadi sida: “Nemu kita, ba rumah tu bisi epod, patung terafim,* patung besi, enggau patung ke diukir. Perundingka utai ke patut digaga kita.”
15 Nya alai, sida singgah lalu mansang ngagai rumah Mikah alai orang Lewi nya diau, lalu nanyaka rita iya.
16 Maya nya, 600 iku orang Dan ke mai senyata, ke sedia deka beperang, bediri ba pintu penama.
17 Lima iku lelaki ke udah ngintip menua nya tama ke dalam, laban deka ngambi patung ke diukir, epod, patung terafim, enggau patung besi. (Imam nya bediri ba pintu penama enggau 600 iku orang ke mai senyata, ke sedia deka beperang.)
18 Sida tama ngagai rumah Mikah lalu ngambi patung ke diukir, epod, patung terafim, enggau patung besi. Imam nya nanya sida: “Nama kebuah kita ngaga tu?”
19 Tang, ku sida nyaut iya: “Anang inggar. Tutup mulut nuan nya. Mupuk enggau kami lalu nyadi penasihat* enggau imam kami. Endaka manah agi nuan nyadi imam ke siti raban bansa Israel ke bisi mayuh ruang bilik, ari ke nyadi imam ke siti ruang bilik aja?”
20 Nyadi, imam nya rindu ninga utai ku sida. Iya pan lalu ngambi epod, patung terafim, enggau patung ke diukir, lalu mupuk enggau sida.
21 Sida lalu neruska pejalai sida. Bala anak mit, jelu tupi, enggau barang ti berega dibai mupuk dulu ari sida.
22 Lebuh orang Dan udah jauh ari rumah Mikah, bala orang ke diau semak rumah Mikah begelumu lalu begagaika orang Dan. Lebuh sida udah semak enggau orang Dan,
23 sida manjung ngangauka orang Dan. Orang Dan malik lalu bejaku ngagai Mikah: “Nama hal? Nama kebuah kita mayuh amat datai kitu?”
24 Ku Mikah nyaut: “Kita udah ngambi petara ke digaga aku. Kita mega udah mai imam aku. Aku nadai nama-nama utai agi. Udah nya, kita nanya aku: ‘Nama hal?’”
25 Ku orang Dan nyaut: “Anang merak kami, enti nuan enggai orang tu ringat lalu nyerang nuan. Enti pia, parai magang nuan enggau kita sebilik.”
26 Orang Dan pan neruska pejalai sida, lalu Mikah pulai ke rumah laban iya meda sida kering agi ari iya.
27 Pengudah sida ngambi imam Mikah enggau utai ke digaga Mikah, sida pan mupuk ngagai kuta Lais. Orang ba dia idup likun, lalu enda ngadang orang deka nyerang sida. Orang Dan pan munuh orang ke ba kuta nya ngena pedang, lalu nunu kuta nya.
28 Nadai orang nyelamatka kuta nya, laban orang ke diau ba kuta nya nadai kaul enggau orang bukai. Nambahka nya, kuta nya ba kawasan lebak ti rata ba Bet-rehop, lalu jauh ari Sidon. Udah nya, orang Dan nirika baru kuta nya lalu diau ba dia.
29 Sida lalu meri nama kuta nya Dan nitihka nama aki sida, iya nya Dan anak Israel. Sebedau nya, nama kuta nya Lais.
30 Udah nya, orang Dan nirika patung ke diukir ngambika ulih disembah sida. Jonatan, peturun Gersom anak Moses, nyadi imam sida. Jonatan enggau peturun iya nyadi imam raban bansa Dan, nyentuk ngagai maya orang ke diau ba menua nya dibuai ngagai menua bukai.
31 Sida nirika patung ke diukir ke digaga Mikah, lalu patung nya agi mengkang ba dia sepemanjai timpuh rumah Petara ti bendar bisi ba Siloh.
Nota Kaki
^ Jaku Asal, “ngelala nyawa siku orang Lewi.”
^ Reti nya “Kem Raban Bansa Dan.”
^ Tauka “patung ke disembah diri sebilik.”
^ Tauka “penyanding penemu.” Jaku Asal, “apai.”
