Pengulu 19:1-30
-
Orang Benjamin ngaga utai ti jai ba Gibeah (1-30)
19 Maya nya suba, sebedau Israel bisi raja, bisi siku orang Lewi ke diau ba endur ti jauh ba kawasan ke begunung ba Efraim. Iya ngambi siku gundik ari Betlehem ba Judah nyadika bini iya.
2 Tang, gundik iya nya curang enggau iya lalu ninggalka iya. Gundik iya pulai ngagai rumah apai iya empu ba Betlehem ba Judah, lalu diau ba dia pengelama empat bulan.
3 Udah nya, orang Lewi nya ngiga bini iya laban deka mujuk iya pulai baru. Iya bisi mai ulun iya ke lelaki enggau dua iku keledai. Lebuh iya datai ba dia, bini iya mai iya tama ke dalam rumah apai iya. Lebuh apai bini iya meda iya, apai bini iya berasai gaga ati.
4 Entua iya, iya nya apai indu nya, bebendar mai iya diau enggau sida pengelama tiga hari. Nyadi, iya pan bemalam ba dia, lalu sida begulai makai sereta ngirup.
5 Ba hari ti keempat, sida dani tumu lalu deka mupuk. Tang, apai indu nya madah ngagai menantu iya: “Makai dulu meh ngambika kita bisi tenaga. Udah nya, baru kita mupuk.”
6 Seduai iya pan duduk lalu makai enggau ngirup begulai. Udah nya, apai indu nya madahka: “Bemalam baru meh lalu lantangka ati nuan.”
7 Lebuh orang Lewi nya angkat deka mupuk, entua iya bebendar mujuk iya. Nyadi, iya pan diau semalam agi.
8 Ba hari ti kelima, lebuh iya dani tumu deka mupuk, apai indu nya madahka: “Makai dulu meh ngambika bisi tenaga.” Nyadi, seduai iya pan makai lubah-lubah sampai hari nyau lemai.
9 Lebuh orang Lewi nya deka mupuk enggau bini iya sereta ulun iya, entua iya, iya nya apai indu nya, lalu madah ngagai iya: “Hari nyau lemai. Manah kita bemalam ditu dulu. Peda nuan, hari nyau deka petang. Diau ditu meh lalu lantangka meh ati nuan. Pagila, tumu pagi, kita ulih mupuk pulai ke rumah.”*
10 Tang, orang Lewi nya enggai bemalam ba dia agi. Iya pan mupuk enggau bini iya, ulun iya, sereta dua iku keledai iya, lalu sida datai ba Jebus, iya nya Jerusalem.
11 Lebuh sida nyauka datai ba Jebus, hari pan nyau udah lemai endar. Nya alai, ulun nya nanya tuan iya: “Kitai ngetu bemalam ba kuta orang Jebus ditu?”
12 Ku tuan iya nyaut: “Kitai enda patut ngetu ba kuta orang asing, ke ukai orang Israel. Aram kitai neruska pejalai ngagai Gibeah.”
13 Ku iya agi: “Kitai mupuk ngagai Gibeah tauka Ramah, lalu bemalam ba siti ari endur nya.”
14 Nyadi, sida pan neruska pejalai sida. Lebuh sida nyauka datai ba Gibeah, mata panas pan nyauka padam. Gibeah nya kuta orang Benjamin.
15 Nyadi, sida pan ngetu ba Gibeah laban deka bemalam ba kuta nya. Sida tama ngagai kuta nya lalu duduk ba dataran awam kuta nya. Tang, nadai orang ke mai orang Lewi nya enggau bala iya bemalam ba rumah sida.
16 Malam nya, bisi lelaki ke udah tuai baru pulai gawa ari ladang. Asal iya, iya datai ari kawasan ke begunung ba Efraim. Tang, iya udah lama diau ba Gibeah. Orang ke diau ba kuta Gibeah nya orang Benjamin.
17 Lebuh iya meda orang Lewi* nya ba dataran awam kuta nya, iya pan nanya: “Kini nuan? Lalu ari ni penatai nuan?”
18 Ku orang Lewi nya nyaut: “Kami baru datai ari Betlehem ba Judah, lalu deka mupuk ngagai menua aku, ba endur ti jauh ba kawasan ke begunung ba Efraim. Sebedau tu, aku ngagai Betlehem ba Judah, tang diatu aku deka ngagai rumah Jehovah,* tang nadai orang mai aku ngagai rumah sida.
19 Kami bisi chukup rumput rangkai enggau pemakai ke keledai kami, lalu kami bisi roti enggau wain ke aku, gundik aku, enggau ke ulun kami. Nyadi, kami nadai kurang nama-nama.”
20 Tang, lelaki ke udah tuai nya madahka: “Anang irau.* Aku deka nyediaka semua utai ke diguna kita. Anang bemalam ba dataran awam tu.”
21 Lelaki nya pan mai sida tama ke dalam rumah iya, lalu meri keledai sida makai. Pengudah sida nuchi kaki, sida pan makai enggau ngirup.
22 Lebuh sida benung rindu ati, beberapa iku orang ke jai ba kuta nya ngelingi rumah nya, lalu sida mandam pintu. Sida majak madah ngagai lelaki ke tuai nya: “Bai pansut lelaki ke datai ngagai rumah nuan nya. Kami deka ngereja pengawa seks enggau iya.”
23 Orang ke ngempu rumah nya pan pansut lalu madah ngagai sida: “Bala menyadi aku, anang ngereja utai ti jai tu. Lelaki nya temuai aku. Nyadi, tulung meh, anang ngereja utai ti jai tu.
24 Ba ditu, bisi anak dara aku enggau gundik lelaki nya. Aku ulih mai seduai iya pansut, lalu kita ulih ngereja nama-nama utai ngagai seduai iya, enti kita tak enggai enda ngereja nya.* Tang, anang meh ngereja utai ti jai tu ngagai lelaki nya.”
25 Tang, sida enggai mendingka iya. Nyadi, orang Lewi nya pan narit gundik iya pansut lalu nyerahka iya ngagai sida. Sida pan ngerugul iya lalu ngayahka iya semalam-malam sampai pagi. Maya mata panas nyauka tumbuh, nya baru sida ngelepaska iya.
26 Tumu pagi nya, indu nya datai ngagai rumah orang tuai nya, alai laki* iya bemalam. Iya pan rebah ba depan pintu rumah nya lalu garing-garing ba dia sampai hari nyau tawas.
27 Pagi nya, laki* iya dani lalu deka neruska pejalai. Tang lebuh iya muka pintu, iya tepedaka gundik iya garing-garing ba depan rumah, lalu jari iya ba depan pintu penama.
28 Ku iya madah: “Angkat, aram kitai mupuk.” Tang, indu nya enda nyaut. Nyadi, iya pan ngengkahka indu nya ba atas keledai lalu mupuk pulai ke rumah.
29 Lebuh iya datai ba rumah, iya pan ngambi pisau lalu netak bangkai gundik iya nyadi 12 iti begian. Udah nya, iya nganjung siti begian ngagai tiap iti menua orang Israel.
30 Semua orang ke meda nya lalu madahka: “Kenyau ari maya orang Israel pansut ari Ejip, kami nadai kala meda utai ke baka tu, lalu utai ke baka tu nadai kala nyadi. Perundingka lalu kerandauka utai tu. Udah nya, padah ngagai kami nama patut digaga kami.”
Nota Kaki
^ Jaku Asal, “langkau kain.”
^ Tauka “orang ke bejalai jauh.”
^ Tauka engka, “aku deka gawa ba rumah Jehovah.”
^ Jaku Asal, “Arapka nuan bulih pengelantang.”
^ Tauka “ulih ngayahka seduai iya lalu ngereja utai ti ngena ba mata kita.”
^ Jaku Asal, “tuan.”
^ Jaku Asal, “tuan.”
