Pengulu 20:1-48
-
Perang ngelaban orang Benjamin (1-48)
20 Nyadi, semua orang Israel ke ari Dan sampai ngagai Beer-sheba, pia mega enggau sida ke ari Gilead datai ngagai Mispah. Sida beserakup begempuru ba depan Jehovah.
2 Bala tuai enggau semua raban bansa Israel bisi enggau gempuru nembiak Petara. Semua iya bisi 400,000 iku soldadu ke bejalai kaki sereta mai pedang.
3 Maya nya, orang Benjamin bisi ninga orang Israel ngagai Mispah.
Udah nya, orang Israel madahka: “Padah ngagai kami, baka ni utai ti jai tu tau nyadi?”
4 Orang Lewi nya, iya nya laki indu ke dibunuh nya, lalu nyaut: “Aku enggau gundik aku datai ba Gibeah, iya nya kuta orang Benjamin, lalu deka bemalam ba dia.
5 Tang malam nya, orang* Gibeah ngelingi endur alai aku diau lalu deka nyerang aku. Kebendar iya, sida deka munuh aku, tang udah nya sida iya ngerugul gundik aku sampai iya mati.
6 Ketegal sida udah ngereja utai ti ngemaluka ba Israel sereta ngereja utai ti jai nya, aku lalu ngambi bangkai gundik aku lalu netak bangkai iya nyadi beberapa iti begian. Udah nya, aku nganjung begian nya ngagai tiap iti menua orang Israel.
7 Nyadi, semua kita orang Israel, padahka meh nama runding kita sereta nama utai ke patut digaga.”
8 Udah nya, semua orang Israel sama bela besetuju lalu madahka: “Nadai siku pan ari kitai deka pulai ngagai rumah tauka ngagai langkau kain diri.
9 Tu meh utai ke deka digaga kitai: Kitai deka nyerang Gibeah ngena chara bechabut undi.
10 Ari semua raban bansa Israel, kitai deka milih 10 iku orang ari tiap 100 iku orang, 100 iku orang ari tiap 1,000 iku orang, enggau 1,000 iku orang ari tiap 10,000 iku orang. Sida deka nyediaka utai ke diguna bala soldadu ke deka mansang beperang. Awakka orang ke diau ba Gibeah ke ba kawasan Benjamin diukum ketegal udah ngereja utai ti chukup jai ba Israel.”
11 Nyadi, semua orang Israel pan begelumu lalu bepakat deka nyerang kuta nya.
12 Udah nya, raban bansa orang Israel nganjung orang nanya raban bansa Benjamin. Ku sida: “Nama penyai ke udah digaga kita?
13 Serahka semua orang jai ke ari Gibeah nya, ngambika kami ulih munuh sida lalu muai penyai nya ari Israel.” Tang, orang Benjamin enggai mendingka menyadi sida, orang Israel.
14 Udah nya, orang Benjamin pansut ari kuta sida lalu begelumu ba Gibeah, laban deka nyerang orang Israel ke bukai.
15 Ba hari nya, orang Benjamin ngempuruka 26,000 iku soldadu ke mai pedang, ari semua kuta sida. Kelimpah ari nya, bisi 700 iku soldadu ke dipilih ari Gibeah.
16 Ari semua bala sida, bisi 700 iku ke chawit. Tiap iku sida nya amat landik nikau batu ngena pangwang,* lalu sida enda kala salah sasaran. Indah selambar buk pan ulih kena.
17 Orang Israel ke ukai ari raban bansa Benjamin ngempuruka 400,000 iku soldadu ke mai pedang. Tiap iku sida nya pahlawan ke bisi pengalaman.
18 Sida mupuk ngagai Bethel laban deka nanya Petara. Ku sida nanya: “Sapa entara kami ke patut nyerang orang Benjamin dulu?” Ku Jehovah nyaut: “Raban bansa Judah.”
19 Udah nya, orang Israel mupuk maya pagi hari lalu nirika kem semak Gibeah.
20 Sida lalu ngatur barisan bala soldadu sida ba Gibeah lalu nyerang raban bansa Benjamin.
21 Orang Benjamin pan pansut ari kuta Gibeah lalu munuh 22,000 iku orang Israel ba hari nya.
22 Taja pia, bala soldadu orang Israel enda takut. Sida ngatur barisan bala soldadu sida baru ba endur ti sama, baka hari ti keterubah.
23 Udah nya, orang Israel mansang ngagai Bethel lalu nyabak ba depan Jehovah sampai malam. Sida nanya Jehovah: “Patut kami beperang ngelaban menyadi kami baru ke ari raban bansa Benjamin?” Ku Jehovah nyaut: “Alai meh kita beperang enggau sida.”
24 Nyadi, orang Israel pan nyerang raban bansa Benjamin ba hari ti kedua.
25 Orang Benjamin lalu pansut ari kuta Gibeah deka nyerang sida. Bisi 18,000 iku orang Israel ke mai pedang dibunuh ba hari ti kedua.
26 Udah nya, orang Israel mupuk ngagai Bethel baru. Sida duduk lalu nyabak ba depan Jehovah. Ba hari nya, sida bepuasa sampai malam lalu nyerahka pemeri tunu sereta pemeri bebaik ngagai Jehovah.
27 Udah nya, sida betanya ngagai Jehovah. (Maya nya, peti lampang batu Adat Petara ti bendar bisi ba Bethel.
28 Pinehas anak Eleasar, iya nya uchu Aron, benung bejalaika pengawa iya ba dia.) Ku sida nanya Petara: “Patut kami beperang ngelaban menyadi kami baru ke ari raban bansa Benjamin, tauka patut kami ngetu?” Ku Jehovah nyaut: “Alai meh, laban pagila Aku deka nyerahka sida ngagai kita.”
29 Nyadi, orang Israel lalu ngatur bala soldadu ba serata kuta Gibeah, ngambika sida ulih nyerang enggau ngenyit.
30 Orang Israel nyerang orang Benjamin ba hari ti ketiga. Sida ngatur barisan bala soldadu kena nyerang kuta Gibeah, baka ke digaga sida sebedau tu.
31 Lebuh orang Benjamin pansut deka nyerang munsuh sida, sida majak jauh ari kuta sida. Baka ke sebedau tu, sida nyerang lalu munuh sekeda soldadu Israel ba jalai raya ke nuju ngagai Bethel sereta ke nuju ngagai Gibeah. Bisi kira-kira 30 iku soldadu Israel mati dibunuh ba luar kuta.
32 Orang Benjamin madahka: “Sida alah baru laban kitai, baka ke sebedau tu.” Tang, orang Israel madah: “Kitai deka rari ngambika sida nitihka kitai ngagai jalai raya lalu jauh ari kuta sida.”
33 Nyadi, orang Israel pan angkat ari endur sida, lalu ngatur barisan soldadu sida ba Baal-tamar. Maya nya, bala soldadu ke ngipa ba serata Gibeah pan terus pansut ari endur sida belalai.
34 Bisi 10,000 iku soldadu, iya nya sida ke dipilih ari semua orang Israel, datai ngagai depan kuta Gibeah. Balat amat sida belaban. Tang, orang Benjamin enda nemu diri deka alah.
35 Jehovah ngalahka orang Benjamin ke orang Israel. Ba hari nya, orang Israel udah munuh 25,100 iku soldadu Benjamin ke mai pedang.
36 Lebuh orang Israel rari ari orang Benjamin, orang Benjamin ngumbai orang Israel deka alah. Tang kebendar iya, orang Israel rari ketegal sida ngarapka bala soldadu ba Gibeah deka nyerang enggau ngenyit.
37 Bala soldadu ke ngipa lalu terus nyerang kuta Gibeah. Sida ngagai serata kuta nya, lalu munuh semua orang ke ba dia ngena pedang.
38 Orang Israel ke nyerang kuta nya enggau ngenyit, udah diasuh meri signal ari kuta nya ngena asap.
39 Lebuh orang Israel rari, orang Benjamin nyerang lalu munuh kira-kira 30 iku orang Israel. Ku sida: “Alah baru sida laban kitai, baka perang ke sebedau tu.”
40 Tang, asap ti tebal pansut ari kuta nya. Lebuh orang Benjamin malik, sida meda seluruh kuta nya benung diempa api, lalu asap niki ke langit.
41 Udah nya, orang Israel nikal baru lalu nyerang orang Benjamin. Orang Benjamin pan berasai takut laban nemu diri deka alah.
42 Nya alai, orang Benjamin ngerarika diri ari orang Israel ngagai menua puang. Tang, orang Israel majak begagaika sida. Bala soldadu Israel ke pansut ari kuta nya mega enggau ngalahka orang Benjamin.
43 Sida ngelingi orang Benjamin, lalu sida enda ngetu-ngetu begagaika orang Benjamin. Sida ngalahka orang Benjamin ba depan kuta Gibeah, iya nya ba sepiak timur kuta nya.
44 Pengujung iya, bisi 18,000 iku soldadu Benjamin ti kering mati dibunuh.
45 Orang Benjamin ngerarika diri ngagai bukit batu ba Rimon ba menua puang. Orang Israel munuh 5,000 iku orang Benjamin ba jalai raya. Sida majak begagaika orang Benjamin sampai ngagai Gidom, lalu munuh 2,000 iku orang agi.
46 Ba hari nya, bisi 25,000 iku soldadu Benjamin ke mai pedang mati dibunuh. Semua sida nya pahlawan ti kering.
47 Tang, bisi 600 iku orang Benjamin ngerarika diri ngagai bukit batu ba Rimon ba menua puang. Sida diau ba dia pengelama empat bulan.
48 Udah nya, orang Israel nikal baru lalu nyerang orang Benjamin ke bukai. Sida munuh semua orang enggau jelu tupi ke ba kuta nya ngena pedang. Sida mega nunu semua kuta ke dipansa sida.
