Pengulu 3:1-31
3 Tu meh bansa bukai ke ditejuka Jehovah diau ba Kanaan, ngambika sida ulih nguji semua orang Israel ke nadai kala enggau beperang
2 (ngambika generasi* orang Israel ke bedau kala enggau beperang bulih pengalaman beperang):
3 Lima iku pemerintah orang Pilistin, semua orang Kanaan, orang Sidon, enggau orang Ibi ke diau ba kawasan Gunung Lebanon, berengkah ari Gunung Baal-hermon sampai ngagai Lebo-hamat.*
4 Sida deka dikena nguji orang Israel kena nemu sekalika orang Israel ngasika pesan ke diberi Jehovah ngagai aki ini sida nengah Moses, tauka enda.
5 Nya alai, orang Israel diau begulai enggau orang Kanaan, orang Het, orang Amor, orang Peris, orang Ibi, enggau orang Jebus.
6 Orang Israel kawin enggau anak indu sida, lalu anak indu orang Israel ditejuka kawin enggau anak lelaki sida. Orang Israel mega berengkah nyembah petara-petara sida.
7 Nyadi, orang Israel ngereja utai ti jai ba mata Jehovah, lalu sida enda ingatka Petara sida, Jehovah. Sida nyembah Baal sereta nyembah tiang kayu keramat.
8 Nya alai, Jehovah balat amat ringat ngagai orang Israel. Iya nyerahka* sida ngagai Kusan-risataim, iya nya raja Mesopotamia.* Orang Israel nyadi ulun iya pengelama lapan taun.
9 Lebuh orang Israel ngangauka Jehovah minta tulung, Jehovah milih Otnil nyadi penyelamat kena ngelepaska orang Israel. Otnil nya anak adik Kalep ke benama Kenas.
10 Jehovah meri kuasa kudus* ngagai iya, lalu iya nyadi hakim orang Israel. Lebuh iya mansang beperang, Jehovah nyerahka Kusan-risataim, iya nya raja Mesopotamia,* ngagai iya ngambika iya ulih ngalahka raja nya.
11 Orang ke diau ba menua nya lalu idup lantang pengelama 40 taun. Udah nya, Otnil anak Kenas pan mati.
12 Tang, sekali agi, orang Israel ngereja utai ti jai ba mata Jehovah. Nya alai, Jehovah nejuka raja Eglon ari Moap ngalahka orang Israel, laban sida udah ngereja utai ti jai ba mata Jehovah.
13 Raja nya mai orang Amon enggau orang Amalek nyerang orang Israel lalu sida nguasa kuta pun kayu engkerema.
14 Orang Israel nyadi ulun raja Eglon ari Moap nya pengelama 18 taun.
15 Udah nya, orang Israel ngangauka Jehovah minta tulung. Jehovah lalu milih Ehut anak Gera nyadi penyelamat sida. Iya orang Benjamin, lalu iya orang ke chawit. Maya nya, orang Israel mayar chukai* ngagai raja Eglon nengah Ehut.
16 Sebedau nya, Ehut ngaga siti pedang ke bemata dua lalu pemanjai pedang nya kira-kira 38 sentimeter.* Iya nanchangka pedang nya ba pah kanan iya lalu ditutup enggau gari iya.
17 Udah nya, Ehut nyuaka chukai ngagai raja Eglon. Raja Eglon nya orang ke gemu amat.
18 Pengudah Ehut nyuaka chukai nya, iya enggau orang ke mai chukai nya pan mupuk.
19 Tang, lebuh sida datai ba endur ke bisi patung* ba Gilgal, Ehut nikal baru lalu bejaku ngagai raja: “O tuan raja, aku bisi resia ke deka dipadahka aku ngagai nuan.” Udah nya, raja nya madah: “Pansut kita.” Semua ulun iya pan pansut.
20 Ehut datai lebuh raja nya benung duduk kediri ba bilik atas ke chelap. Ku Ehut madah ngagai raja: “Aku bisi pesan ari Petara ke nuan.” Nya alai, raja nya pan angkat ari kerusi diraja iya.
21 Udah nya, Ehut ngambi pedang ba pah kanan iya ngena jari kiba, lalu ngerejangka pedang nya ngagai perut raja.
22 Seluruh pedang nya, nyengkaum ulu pedang nya, tama ke dalam lalu dibalut lemak perut raja. Ehut enda nyabut pedang nya ari perut raja, lalu tai raja tepansut.
23 Ehut pan pansut* lalu nutup sereta ngunchi semua pintu bilik nya.
24 Pengudah iya mupuk, bala ulun raja nya datai lalu meda pintu bilik nya udah dikunchi. Ku sida madah: “Tentu iya agi ba jamban ba bilik ke chelap nya.”
25 Pengudah sida lama nganti, sida pan berasai irau, laban raja lalu bedau muka pintu. Sida ngambi kunchi lalu muka pintu, lalu tepedaka raja sida mati garing-garing ba lantai.
26 Lebuh bala ulun raja nya agi berunding pasal nama utai ke patut digaga, Ehut udah ngerarika diri. Iya mansa endur ke bisi patung* lalu datai ba Seirah enggau selamat.
27 Pengudah iya datai ba kawasan ke begunung ba Efraim, iya lalu nyepu terumpit.* Orang Israel pan nitihka iya nurun ari kawasan ke begunung nya.
28 Ehut madah ngagai sida: “Titihka aku, laban Jehovah udah nyerahka munsuh kita, orang Moap, ngagai kita.” Nyadi, sida pan nitihka iya lalu nguasa endur alai orang suah meraka Sungai Jordan, ngambika orang Moap enda ulih ngerarika diri. Sida enda ngasuh sapa-sapa meraka sungai nya.
29 Maya nya, orang Israel munuh kira-kira 10,000 iku orang Moap ke kering sereta berani. Nadai siku pan sida ulih ngerarika diri.
30 Ba hari nya, orang Moap alah laban orang Israel, lalu orang ke diau ba menua nya idup lantang pengelama 80 taun.
31 Pengudah Ehut, Samgar anak Anat nyadi penyelamat orang Israel. Iya udah munuh 600 iku orang Pilistin ngena tungkat ke tajam.*
Nota Kaki
^ Tauka “rebak.”
^ Tauka “jalai tama ngagai Hamat.”
^ Jaku Asal, “nyual.”
^ Jaku Asal, “Aram-naharaim.”
^ Peda Penerang Leka Jaku.
^ Jaku Asal, “Aram.”
^ Tauka “meri pemeri.”
^ Jaku Asal, “1 kiubit,” engka kiubit pandak. Peda Rujukan B14.
^ Tauka engka, “kuari.”
^ Tauka engka, “pansut nengah lubang angin.”
^ Tauka engka, “kuari.”
^ Jaku Asal, “tanduk.”
^ Tauka “tungkat kena ngiring sapi bejalai.”
