Pengulu 7:1-25
7 Udah nya, Jerubaal, iya nya Gideon, enggau semua orang ke enggau iya dani tumu lalu nirika kem ba Mata Ai Harot. Kem orang Midian bisi ba begian utara sida, ba Bukit Moreh ke ba kawasan lebak ti rata.
2 Jehovah madah ngagai Gideon: “Kelalu mayuh soldadu ke enggau nuan. Aku enggai nyerahka orang Midian ngagai sida, enggaika sida bejaku begah lalu madah ngagai Aku: ‘Aku menang ketegal pengering aku empu.’
3 Padahka tu ngagai bala soldadu nuan: ‘Barang sapa ke takut sereta rawan, tau pulai ke rumah.’” Nyadi, Gideon pan nguji sida. Pengujung iya, bisi 22,000 iku orang pulai, lalu bisi 10,000 iku orang ke agi tinggal.
4 Tang, Jehovah madah ngagai Gideon: “Agi mayuh bala soldadu nuan. Asuh sida ngagai sungai. Ba dia meh Aku deka nguji sida ke nuan. Enti Aku madah: ‘Siku tu patut enggau nuan,’ iya patut enggau nuan. Tang, enti Aku madah: ‘Siku tu enda enggau nuan,’ iya enda ibuh enggau nuan.”
5 Gideon lalu ngasuh bala soldadu iya ngagai sungai.
Ku Jehovah madah ngagai Gideon: “Seraraka orang ke ngirup ai ngena jari* ari sida ke besugang ngirup ai.”
6 Bisi 300 iku orang ke ngirup ai ngena jari sida, lalu sida ke bukai besugang maya ngirup ai.
7 Jehovah lalu madah ngagai Gideon: “Aku deka nyelamatka kita ngena 300 iku orang ke ngirup ai ngena jari nya. Aku deka nyerahka orang Midian ngagai kita. Asuh sida ke bukai nya pulai.”
8 Pengudah 300 iku soldadu ngambi pemakai sereta terumpit* ari bala soldadu ke bukai, Gideon ngasuh bala soldadu ke bukai nya pulai. Semina 300 iku soldadu aja ke enggau iya. Maya nya, orang Midian nirika kem ba kawasan lebak ti rata, iya nya ba baruh kem orang Israel.
9 Malam nya, Jehovah madah ngagai Gideon: “Angkat lalu serang kem orang Midian, laban Aku udah nyerahka sida ngagai nuan.
10 Tang enti nuan takut deka nyerang sida, bai penulung nuan, Purah, nurun ngagai kem sida.
11 Pendingka utai ke dipadahka sida. Pengudah nya, nuan deka bulih pemerani* kena nyerang sida.” Nyadi, Gideon enggau penulung iya, Purah, pan nurun lalu datai semak ngagai kem sida.
12 Orang Midian, orang Amalek, enggau semua orang ari Timur ngemenuhka kawasan lebak ti rata baka buntak. Penyampau unta sida enda alah diitung, baka pasir ke ba tebing tasik.
13 Lebuh Gideon datai ba dia, iya ninga siku orang madahka mimpi iya ngagai siku kaban. Ku orang nya madahka: “Aku bisi mimpi. Aku tepedaka siti tuku roti barli ke segala beguling ngagai kem orang Midian. Udah nya, roti nya balat amat ngelantak siti langkau kain, nyentukka langkau kain nya tebalit lalu runtuh.”
14 Ku kaban orang nya nyaut: “Nya tentu pedang Gideon anak Joas, orang Israel nya. Petara udah nyerahka orang Midian enggau bala soldadu kitai ngagai iya.”
15 Pengudah Gideon ninga pasal mimpi nya enggau reti mimpi nya, Gideon lalu besugang nyembah Petara. Udah nya, iya pulai ngagai kem orang Israel. Ku iya madahka: “Angkat kita, laban Jehovah udah nyerahka orang Midian ngagai kita.”
16 Iya lalu magi 300 iku soldadu ngagai tiga iti raban. Iya meri terumpit enggau kebuk ti besai ngagai tiap iku sida. Ba dalam kebuk nya bisi sempun api.
17 Udah nya, iya pan madah ngagai bala soldadu: “Peda aku lalu titihka utai ke digaga aku. Lebuh aku udah datai ba tisi kem orang Midian, kita mesti ngereja utai ke digaga aku.
18 Lebuh aku nyepu terumpit, semua kita ke enggau aku mesti nyepu terumpit ba serata kem nya, lalu manjung: ‘Ke Jehovah enggau ke Gideon!’”
19 Maya nyauka tengah malam, Gideon enggau 100 iku soldadu iya datai ba tisi kem orang Midian lebuh bala jejaga baru udah betukar.* Sida pan nyepu terumpit, lalu mechahka kebuk ti besai ke dipegai sida.
20 Ketiga-tiga iti raban soldadu orang Israel pan nyepu terumpit lalu mechahka kebuk sida. Sida ngangkatka sempun api ngena jari kiba sida, lalu nyepu terumpit ngena jari kanan sida. Udah nya, sida manjung: “Pedang Jehovah enggau pedang Gideon!”
21 Tiap iku soldadu enda nginsit ari endur sida bediri ngelingi kem nya. Semua bala soldadu munsuh nyau beterauh rari.
22 Tiga ratus iku soldadu nya majak nyepu terumpit, lalu Jehovah ngasuh semua munsuh belaban enggau pangan diri ba serata kem. Sida ngerarika diri ngagai Bet-sitah, udah nya ngagai Sererah, sampai ngagai sempadan Abel-meholah ke semak enggau Tabat.
23 Raban bansa Naptali, raban bansa Aser, enggau semua raban bansa Manasi pan dibai sama begagaika orang Midian.
24 Gideon lalu ngasuh orang ngirumka pesan ngagai serata kawasan ke begunung ba Efraim. Ku iya: “Nurun kita lalu serang orang Midian. Alai kita mansang dulu ari sida ngagai Bet-barah enggau Sungai Jordan. Kita mesti nguasa endur alai orang suah meraka sungai, ngambika sida enda ulih meraka sungai.” Nyadi, semua orang Efraim pan begelumu lalu nguasa semua sungai, sampai ngagai Bet-barah enggau Sungai Jordan.
25 Sida mega nangkap dua iku pegawai orang Midian ke benama Orep enggau Zep. Sida munuh Orep ba Batu Orep, lalu sida munuh Zep ba endur nganchurka anggur Zep. Sida majak begagaika orang Midian, lalu sida mai pala Orep enggau Zep ngagai Gideon ke ba kawasan Jordan.
Nota Kaki
^ Jaku Asal, “orang ke nilat ai baka ukui.”
^ Jaku Asal, “tanduk.”
^ Jaku Asal, “jari nuan deka nyadi kuat.”
^ Jaku Asal, “lebuh gintir jaga tengah malam berengkah.” Iya nya, kira pukul 10 malam nyentuk ngagai pukul 2 pagi.
