Pengulu 9:1-57
9 Bisi sekali, Abimelek anak Jerubaal betemu enggau bala aya iya ke ari sepiak indai iya ba Shikem. Ku iya madah ngagai sida enggau ngagai semua ruang bilik aki iya ke ari sepiak indai iya:
2 “Tanya semua tuai orang* Shikem: ‘Ni manah agi ke kita, diperintah 70 iku anak lelaki Jerubaal tauka diperintah siku orang aja? Ingat au, aku pan darah getah kita empu.’”*
3 Nyadi, bala aya iya ke ari sepiak indai iya pan ngarika iya bejaku ngagai semua tuai orang Shikem. Sida tetarit ati deka nitihka Abimelek, laban sida madahka: “Iya endang menyadi kitai.”
4 Udah nya, sida meri iya 70 singkap duit pirak ari kuil Baal-berit. Abimelek lalu ngena duit nya ngupah orang ke nadai kereja sereta orang ke dadak ngambika nitihka iya.
5 Abimelek lalu mupuk ngagai rumah apai iya ba Oprah. Iya munuh bala menyadi iya, iya nya 70 iku anak lelaki Jerubaal, ba atas sigi batu. Semina Jotam aja, iya nya anak lelaki Jerubaal ke biak sekali, ke selamat laban iya belalai.
6 Udah nya, semua tuai orang Shikem enggau semua orang ke diau ba Bet-milo begempuru semak pun kayu ti besai, ke semak enggau tiang ba Shikem. Ba dia meh sida ngelantik Abimelek nyadi raja.
7 Lebuh Jotam nerima berita pasal nya, iya terus mupuk lalu bediri ba Gunung Gerisim. Ku iya bejaku enggau nyawa ti inggar ngagai sida: “Pendingka aku, kita bala tuai orang Shikem, udah nya baru Petara deka mendingka kita.
8 “Bisi sekali, mayuh pun kayu deka ngelantik* siku raja nyadi pemerintah sida. Nyadi, sida madah ngagai pun kayu kana: ‘Nuan meh ke nyadi raja kami.’
9 Tang, pun kayu kana nyaut sida: ‘Patut aku ngetu ngasilka minyak* ke dikena ngemuliaka Petara enggau mensia, ketegal deka ngayunka dan aku ba atas pun kayu bukai?’
10 Udah nya, pun kayu ke bukai madah ngagai pun kayu ara: ‘Nuan meh ke nyadi raja kami.’
11 Tang, pun kayu ara nyaut sida: ‘Patut aku ngetu ngasilka buah ti manah sereta manis, ketegal deka ngayunka dan aku ba atas pun kayu bukai?’
12 Pun kayu ke bukai pan bejaku ngagai pun anggur: ‘Nuan meh ke nyadi raja kami.’
13 Ku pun anggur nyaut sida: ‘Patut aku ngetu ngasilka wain ti baru ke ngasuh Petara enggau mensia gaga ati, ketegal deka ngayunka dan aku ba atas pun kayu bukai?’
14 Pengujung iya, semua pun kayu ke bukai madah ngagai pun kayu ti beduri: ‘Nuan meh ke nyadi raja kami.’
15 Ku pun kayu ti beduri nya nyaut sida: ‘Enti kita amat deka ngelantik* aku nyadi raja kita, datai meh kitu lalu belindung ba aku. Tang enti enda, awakka api pansut ari aku lalu nganguska pun kayu sidar ba Lebanon.’
16 “Kati kita ikhlas sereta amat ngereja utai ti betul lebuh kita ngelantik Abimelek nyadi raja? Kati kita ngayanka pemanah ngagai Jerubaal enggau ruang bilik iya? Kati kita ngereja utai ti patut ngagai Jerubaal?
17 Lebuh apai aku belaban ngarika kita, iya berambunka nyawa diri kena nyelamatka kita ari orang Midian.
18 Tang diatu, kita angkat ngelaban ruang bilik apai aku lalu munuh 70 iku anak lelaki iya ba atas sigi batu. Udah nya, kita ngelantik Abimelek, iya nya anak ulun indu apai aku, nyadi raja orang Shikem semina ketegal iya bala kita.
19 Enti kita amat ikhlas sereta ngereja utai ti betul ngagai Jerubaal enggau ruang bilik iya, gaga ati meh kita enggau Abimelek, lalu awakka iya mega gaga ati enggau kita.
20 Tang enti enda, awakka api pansut ari Abimelek lalu nganguska semua tuai orang Shikem enggau orang ke diau ba Bet-milo. Pia mega, awakka api pansut ari semua tuai orang Shikem enggau orang ke diau ba Bet-milo, lalu nganguska Abimelek.”
21 Udah nya, Jotam ngerarika diri ngagai Beer lalu diau ba dia, laban iya takutka menyadi iya, Abimelek.
22 Abimelek merintah* Israel pengelama tiga taun.
23 Udah nya, Petara nejuka Abimelek enggau bala tuai orang Shikem bemunsuh enggau pangan diri. Sida angkat ngelaban Abimelek.
24 Utai nya nyadi kena malas penyai ke udah digaga ngagai 70 iku anak lelaki Jerubaal. Tu ketegal Abimelek enggau semua tuai orang Shikem ke udah nulung iya munuh sida patut betanggungjawapka nyawa orang ke udah dibunuh sida nya.
25 Bala tuai orang Shikem ngasuh beberapa iku orang ngipa lalu nyerang Abimelek ba atas gunung. Sida deka ngerumpak sapa-sapa aja ke nengah jalai nya. Pekara nya lalu dipadahka ngagai Abimelek.
26 Udah nya, Gaal anak Ebet enggau bala menyadi iya pindah ngagai Shikem. Bala tuai orang Shikem pan berengkah arapka iya.
27 Orang Shikem mansang ngagai ladang lalu ngumpul buah anggur. Sida nganchurka buah anggur nya kena ngaga wain, lalu sida ngaga siti pengerami. Udah nya, sida makai sereta ngirup, lalu nyumpah Abimelek ba kuil petara sida.
28 Udah nya, Gaal anak Ebet madahka: “Sapa Abimelek enggau sapa Shikem* nyentukka kitai patut nyadi ulun seduai iya? Ukai ke iya nya anak Jerubaal, lalu Zebul nya pengari iya? Kapa kitai nyadi ulun iya. Manah agi kitai nyadi ulun peturun Hamor, apai Shikem.
29 Enti aku ke merintah orang tu, buai aku Abimelek nya.” Udah nya, iya bejaku ngagai Abimelek: “Tambahka mayuh agi bala soldadu nuan. Aram kitai beperang.”
30 Lebuh Zebul, pegawai kuta Shikem, ninga utai ku Gaal anak Ebet, iya pan balat amat ringat.
31 Nyadi, iya belalai ngasuh orang ngirumka pesan tu ngagai Abimelek: “Gaal anak Ebet enggau bala menyadi iya bisi ba Shikem. Sida ngasut orang ba kuta tu angkat ngelaban nuan.
32 Nya alai, mupuk meh nuan enggau bala soldadu nuan maya malam hari, lalu nganti ba luar kuta.
33 Lebuh mata panas niki hari siti, kita patut dani tumu lalu nyerang kuta nya. Lebuh Gaal enggau bala iya pansut nyerang kita, kereja meh nama-nama utai kena ngalahka iya.”
34 Nyadi, Abimelek enggau semua orang ke enggau iya pan mupuk maya malam hari. Sida dibagi ngagai empat iti raban, lalu sida ngipa ba luar kuta Shikem.
35 Lebuh Gaal anak Ebet pansut lalu bediri ba pintu penama kuta, Abimelek enggau orang ke enggau iya pan angkat ari endur alai sida belalai.
36 Lebuh Gaal meda sida, iya madah ngagai Zebul: “Peda! Bisi orang nurun ari gunung.” Tang Zebul nyaut iya: “Eh, bayang-bayang gunung ke baka orang peda nuan nya.”
37 Ku Gaal bejaku baru: “Peda! Bisi orang nurun ba tengah nyin, lalu bisi siti raban ke datai nengah jalai pun kayu ti besai Meonenim.”
38 Ku Zebul nyaut iya: “Sehari nya besai jaku nuan: ‘Sapa Abimelek nyentukka kami patut nyadi ulun iya?’ Sida iya meh ke dikeleseka nuan sehari nya. Alai meh nuan mansang kin belaban enggau sida.”
39 Nya alai, Gaal nguluka bala tuai orang Shikem, lalu nyerang Abimelek.
40 Abimelek pan ngagai Gaal, lalu Gaal ngerarika diri ari iya. Mayuh orang mati dibunuh ba sepemanjai jalai, nyentuk ngagai pintu penama kuta.
41 Abimelek lalu diau ba Arumah, lalu Zebul muru Gaal enggau bala menyadi iya ari Shikem.
42 Hari siti, Abimelek ninga pasal orang Shikem pansut ngagai luar kuta.
43 Nyadi, Abimelek mai bala iya lalu magi sida ngagai tiga iti raban. Sida ngipa ba luar kuta. Lebuh iya meda bisi orang pansut ari kuta, iya nyerang lalu munuh sida.
44 Abimelek enggau raban ke enggau iya nyerang lalu bejaga ba pintu penama kuta. Dua iti raban ke bukai nyerang lalu munuh orang ke ba luar kuta.
45 Abimelek nyerang kuta nya sepemanjai hari, lalu nguasa kuta nya. Iya munuh semua orang ke diau ba kuta nya. Udah nya, iya ngeruntuhka kuta nya, lalu nabur garam ba kuta nya.
46 Lebuh semua tuai ke ba menara Shikem ninga pasal nya, sida jampat-jampat ngagai endur alai belalai* ke ba kuil El-berit.
47 Pengudah Abimelek ninga pasal semua tuai ke ba menara Shikem begelumu,
48 Abimelek enggau bala iya pan terus niki ngagai Gunung Zalmon. Udah nya, Abimelek ngambi kapak lalu netak dan kayu. Iya lalu ngesan dan kayu nya, lalu bejaku ngagai bala iya: “Jampat! Kereja utai ke digaga aku.”
49 Nya alai, semua bala iya pan netak dan kayu lalu nitihka iya. Udah nya, sida ngengkahka dan kayu nya ngelingi endur alai orang belalai lalu nunu endur nya. Nyadi, semua orang ke ba menara Shikem mega mati. Bisi kira-kira 1,000 iku lelaki enggau indu ke mati.
50 Udah nya, Abimelek mupuk ngagai Tebes. Iya nirika kem ba dia lalu nguasa kuta nya.
51 Ba tengah-tengah kuta nya bisi siti menara ti tegap. Semua indu enggau lelaki sereta semua tuai kuta nya ngerarika diri kia. Sida ngunchi pintu ari dalam lalu niki ngagai perabung menara nya.
52 Abimelek lalu mansang ngagai menara nya, laban deka nyerang menara nya. Lebuh iya datai semak ngagai pintu menara nya laban deka nunu menara nya,
53 bisi siku indu ngelabuhka batu kisar ngagai pala Abimelek, nyentukka pala Abimelek retak.
54 Abimelek pan jampat-jampat ngangauka penulung iya ke mai senyata iya. Ku iya madah ngagai penulung iya: “Sintak pedang nuan lalu bunuh aku, enggaika orang madah: ‘Siku indu udah munuh iya.’” Nyadi, penulung iya ngerejang iya, lalu iya pan mati.
55 Lebuh orang Israel meda Abimelek udah mati, sida pan pulai.
56 Baka nya meh Petara malas penyai ke digaga Abimelek ngagai apai iya, laban iya udah munuh 70 iku menyadi iya.
57 Petara mega ngasuh semua penyai ke digaga orang Shikem ninggang sida empu, baka ke dipadahka Jotam anak Jerubaal lebuh iya nyumpah sida.
Nota Kaki
^ Tauka engka, “orang ke ngempu menua.”
^ Tauka “aku bisi pertalian darah enggau kita.”
^ Jaku Asal, “nata.”
^ Tauka “buah.”
^ Jaku Asal, “nata.”
^ Tauka “ngumbaka diri nyadi pemerintah.”
^ Engka merujuk ngagai Zebul, iya nya pengari orang Shikem.
^ Tauka “kubu.”
