Penyampau 10:1-36
10 Ku Jehovah bejaku ngagai Moses:
2 “Gaga meh dua iti terumpit ari pirak ngena tukul. Kena meh terumpit nya kena ngangau orang Israel begelumu sereta kena ngasuh sida mindahka kem.
3 Lebuh kedua-dua iti terumpit nya disepu, semua orang Israel mesti mansang ngagai nuan lalu begelumu ba depan pintu penama langkau gempuru.
4 Tang enti siti aja terumpit ke disepu, semina bala tuai orang Israel aja ke mesti mansang ngagai nuan. Sida tu tuai atas beribu iku orang Israel.
5 “Lebuh terumpit disepu ngena nada tinggi enggau nada baruh, raban kem ke ba begian timur mesti mupuk.
6 Lebuh terumpit nya disepu kedua kali ngena chara ti sama, raban kem ke ba begian selatan mesti mupuk. Tiap kali enti siti ari raban kem patut mupuk, terumpit nya mesti disepu ngena chara ti sama.
7 “Lebuh ngangauka orang Israel begelumu, kedua-dua terumpit nya mesti disepu ngena siti nada aja, ukai ngena nada ke dikena ngasuh raban kem mupuk.
8 Terumpit nya mesti disepu bala anak lelaki Aron ke gawa nyadi imam. Baka nya meh chara kita nyepu terumpit. Nya deka nyadi adat ti tetap ari generasi ke generasi.*
9 “Lebuh kita beperang dalam menua kita ngelaban munsuh ke nyerang kita, kita mesti nyepu terumpit kena ngangauka orang beperang. Aku, Jehovah, Petara kita, deka ingatka kita lalu deka nyelamatka kita ari munsuh.
10 “Sepu terumpit nya lebuh kita rami gaga, iya nya lebuh kita ngintu pengerami sereta ba tiap kali pun bulan. Kita mesti nyepu terumpit nya lebuh kita nyerahka pemeri tunu sereta pemeri bebaik. Enggau nya, Aku, Jehovah, Petara kita, deka seruran ingatka kita.”
11 Kena hari ke-20, dalam bulan ti kedua, ba taun ti kedua, remang* ke ba atas Langkau Sembiang* angkat ari langkau nya.
12 Orang Israel pan mupuk ari menua puang Sinai nitihka tusun chara ke udah ditetapka. Udah nya, remang nya ngetu ba menua puang Paran.
13 Nya meh keterubah kali sida mupuk nitihka pesan ke dipadahka Jehovah nengah Moses.
14 Raban kem* keterubah ke mupuk nya raban ke diiring raban bansa Judah. Nason anak Aminadap, ketuai raban kem nya.
15 Netanel anak Zuar, tuai raban bansa Isakar,
16 lalu Eliap anak Helon, tuai raban bansa Sebulun.
17 Pengudah Langkau Sembiang dibuka, suku Gerson enggau Merari ke mai langkau nya pan mupuk.
18 Raban kem ti kedua ke mupuk nya raban kem ke diiring raban bansa Reuben. Elizur anak Sediur, ketuai raban kem nya.
19 Selumiel anak Zurisadai, tuai raban bansa Simion,
20 lalu Eliasap anak Duel, tuai raban bansa Gat.
21 Udah nya, suku Kohat, ke mai pekekas ke dikena ba Langkau Sembiang pan mupuk. Langkau Sembiang mesti didirika dulu sebedau sida datai ba kawasan ti baru.
22 Raban kem ti ketiga ke mupuk nya raban kem ke diiring raban bansa Efraim. Elisama anak Amihut, ketuai raban kem nya.
23 Gamaliel anak Pedasur, tuai raban bansa Manasi,
24 lalu Abidan anak Gideoni, tuai raban bansa Benjamin.
25 Raban kem ti kepenudi ke mupuk nya raban kem ke diiring raban bansa Dan. Raban kem nya meh ke nyaga semua raban kem ke bukai ari belakang. Ahieser anak Amisadai, ketuai raban kem nya.
26 Pagiel anak Okran, tuai raban bansa Aser,
27 lalu Ahira anak Enan, tuai raban bansa Naptali.
28 Nya meh tusun ke dititihka orang Israel lebuh sida mupuk. Sida mupuk beraban-raban baka raban soldadu.
29 Reuel,* entua Moses ke lelaki, orang Midian nya, bisi anak lelaki ke benama Hobap. Ku Moses bejaku ngagai Hobap: “Kami deka ngagai endur ke udah disemayaka Jehovah ngagai kami. Jehovah udah besemaya deka merekatka orang Israel. Aram, mupuk meh enggau kami, lalu kami deka ngelayan nuan enggau manah.”
30 Tang ku Hobap nyaut: “Enda aku enggau kita. Aku deka pulai ngagai kaban belayan aku, ngagai menua aku empu.”
31 Ku Moses madahka: “Anang ninggalka kami, laban nuan nemu ba dini kami ulih nirika kem ba menua puang, lalu nuan mega ulih madahka jalai ngagai kami.
32 Enti nuan enggau kami, kami deka bekunsika enggau nuan semua berekat ke diberi Jehovah ngagai kami.”
33 Nyadi, orang Israel pan mupuk ari gunung Jehovah, lalu bejalai pengelama tiga hari laban deka ngiga endur alai berehat. Ba sepemanjai pejalai nya, peti lampang batu Adat Jehovah dibai dulu ari sida.
34 Lebuh orang Israel mupuk maya siang hari, remang Jehovah ngiring sida.
35 Tiap kali peti lampang batu Adat disan, Moses deka nyebut: “Angkat meh, O Jehovah. Asuh munsuh Nuan pambar, lalu asuh orang ke begedika Nuan rari.”
36 Tiap kali peti lampang batu Adat diturunka, Moses deka nyebut: “O Jehovah, pulai meh ngagai beribu-ribu iku orang Israel ke enda alah diitung.”
Nota Kaki
^ Tauka “ari rebak ke rebak.”
^ Tauka “awan.”
^ Tauka “Langkau Sembiang, endur alai peti lampang batu Adat diengkahka.”
^ Dalam siti raban kem, bisi tiga iti raban bansa.
^ Iya nya, Jetro.
