Penyampau 12:1-16
12 Miriam enggau Aron berengkah bejaku jai pasal Moses, laban Moses udah kawin enggau siku indu orang Kus.
2 Ku seduai iya madahka: “Kati nya semina nengah Moses aja Jehovah bejaku? Endaka Iya mega bejaku nengah kami?” Jehovah bisi ninga maya nya.
3 Moses nya orang ke pemadu baruh ati* ba serata dunya.
4 Tiba-tiba, Jehovah bejaku ngagai Moses, Aron, enggau Miriam: “Alai kita tiga mansang ngagai langkau gempuru.” Sida tiga pan mansang kin.
5 Jehovah nurun dalam tiang remang* lalu bediri ba pintu penama langkau gempuru. Iya ngangauka Aron enggau Miriam lalu seduai iya pan datai.
6 Ku Iya madahka: “Dingaka jaku Aku. Enti Aku, Jehovah, bisi nabi ba bala kita, Aku deka mandangka Diri ngagai iya dalam runding iya, lalu Aku deka bejaku enggau iya dalam mimpi.
7 Tang Aku enda ngereja nya ngagai nembiak Aku, Moses. Aku ngasuh iya ngemataka semua nembiak* Aku lalu Aku arapka iya.
8 Aku bejaku betunga mua enggau iya, lalu Aku bejaku enggau terang ngagai iya, ukai ngena teka-teki. Aku, Jehovah, udah ngayanka Diri ngagai iya. Nya alai, nama kebuah seduai enda takut deka bejaku jai pasal nembiak Aku, Moses?”
9 Jehovah balat ringat ngagai seduai iya lalu mupuk ari endur nya.
10 Remang nya mega mupuk ari langkau gempuru. Enggau ngenyit, Miriam kena penyakit kulit ti balat* lalu kulit iya nyadi burak baka seleju. Udah nya, Aron malik ngagai Miriam lalu iya meda Miriam kena penyakit kulit nya.
11 Aron lalu terus madah ngagai Moses: “Tulung meh, tuan! Anang nejuka kami diukum ketegal dosa tu. Kami beli laban udah ngereja utai nya.
12 Anang meh nejuka iya nyadi baka anak mit ke udah mati maya ada, ke udah setengah reput!”
13 Moses lalu bebendar minta ngagai Jehovah: “O Petara, geraika iya! Tulung meh, geraika iya!”
14 Ku Jehovah nyaut Moses: “Enti apai iya ngeludah mua iya, endaka iya deka malu pengelama tujuh hari? Awakka iya dikuarantin ba luar kem pengelama tujuh hari. Udah nya, baru iya ulih tama.”
15 Nyadi, Miriam pan dikuarantin ba luar kem pengelama tujuh hari. Orang Israel enda mindahka kem sida nyentukka Miriam dibai tama baru ngagai kem.
16 Udah nya, orang Israel mupuk ari Haserot lalu nirika kem ba menua puang Paran.
