Penyampau 13:1-33
13 Ku Jehovah bejaku ngagai Moses:
2 “Pilih siku tuai ari tiap iti raban bansa Israel, lalu asuh sida ngintip menua Kanaan, iya nya menua ke deka diberi Aku ngagai orang Israel.”
3 Moses pan ngereja utai ke dipadah Jehovah, lalu ngasuh bala tuai orang Israel nya mupuk ari menua puang Paran.
4 Tu meh nama bala sida: Shamua anak Zakur, ari raban bansa Reuben;
5 Sapat anak Hori, ari raban bansa Simion;
6 Kalep anak Jepuneh, ari raban bansa Judah;
7 Igal anak Josep, ari raban bansa Isakar;
8 Hoshea anak Nun, ari raban bansa Efraim;
9 Palti anak Rapu, ari raban bansa Benjamin;
10 Gadiel anak Sodi, ari raban bansa Sebulun;
11 Gadi anak Susi, ari raban bansa Josep (iya nya raban bansa Manasi*);
12 Amil anak Gemali, ari raban bansa Dan;
13 Setur anak Mikael, ari raban bansa Aser;
14 Nahbi anak Bopsi, ari raban bansa Naptali;
15 enggau Guel anak Makhi, ari raban bansa Gat.
16 Nya meh nama bala tuai ke diasuh Moses ngintip menua Kanaan. Moses nukar nama Hoshea anak Nun ngagai Josua.*
17 Lebuh Moses ngasuh sida ngintip menua Kanaan, iya mega madah ngagai sida: “Alai kita mansang ngagai Negeb, lalu udah nya niki ngagai kawasan ke begunung.
18 Peda kita menua nya. Kati orang ke diau ba dia kuat tauka lemi, mayuh tauka mimit?
19 Kati sida diau ba kuta ke bedinding tauka enda? Kati tanah ba menua nya manah tauka enda,
20 subur tauka enda? Kati endur nya bisi mayuh pun kayu tauka enda? Kita mesti berani, lalu bai sekeda buah ari menua nya.” Maya nya, musin buah anggur baru berengkah.
21 Nyadi, sida pan mupuk lalu ngintip menua nya. Sida berengkah ngintip ari menua puang Zin nyentuk ngagai Rehop, ke semak enggau Lebo-hamat.*
22 Lebuh sida mupuk ngagai Negeb, sida datai ba Hebron, iya nya endur Ahiman, Sheshai, enggau Talmai diau. Sida tiga nya orang Enak. Kuta Hebron digaga tujuh taun dulu agi ari kuta Zoan ba Ejip.
23 Udah nya, sida datai ba Lebak Eskol. Ba dia sida netak setangkai buah anggur. Buah anggur nya mesti disan dua iku orang ngena kayu. Sida mega mai beberapa igi buah delima enggau buah ara.
24 Endur nya dikumbai Lebak Eskol,* laban setangkai buah anggur udah ditetak orang Israel ba dia.”
25 Pengudah 40 hari ngintip menua nya, sida pan pulai.
26 Sida lalu betemu enggau Moses, Aron, enggau semua orang Israel ba menua puang Paran, ba Kades. Sida madahka utai ke dipeda sida, lalu mantaika buah ke dibai sida.
27 Tu meh utai ke dipadahka sida ngagai Moses: “Kami udah ngagai menua nya baka ke diasuh nuan. Menua nya endang kaya enggau ai tusu sereta madu. Tu meh buah ari menua nya.
28 Taja pia, orang ke diau ba menua nya kuat, lalu kuta sida besai sereta bisi dinding ti teguh. Kami mega bisi meda orang Enak ba dia.
29 Orang Amalek diau ba kawasan Negeb. Orang Het, orang Jebus, enggau orang Amor diau ba kawasan ke begunung. Orang Kanaan diau ba tebing tasik sereta ba sepemanjai Sungai Jordan.”
30 Ba depan Moses, Kalep nguji ngasuh orang Israel berasai tenang. Ku iya madah: “Aram kitai mansang kin diatu. Kitai tentu ulih ngalahka sida lalu nguasa menua nya.”
31 Tang, bala pengintip ke bukai madah: “Kitai enda ulih ngelaban sida laban sida kuat agi ari kitai.”
32 Sida majak madah utai ke enda manah pasal menua nya ngagai orang Israel. Ku sida madah: “Kitai tentu mati enti kitai diau ba menua ke diintip kami nya. Orang ke diau ba dia amat-amat besai.
33 Kami mega bisi meda orang ke ngembuan pemesai tubuh enggau peninggi ti luar biasa ari peturun Enak, ke datai ari peturun Nefilim. Enti dibandingka enggau sida, kitai tu mit baka buntak. Tentu baka nya meh kitai dipeda sida.”
Nota Kaki
^ Manasi nya anak Josep.
^ Tauka “Jehosua,” ke mai reti “Jehovah Nya Penyelamat.”
^ Tauka “jalai tama ngagai Hamat.”
^ Reti nya “Tangkai Buah Anggur.”
